Klei Aê Diê Blŭ: Y‑Đaniel 6:10-23
Êlan kliăng: “Tơdah Y‑Đaniel thâo mtao čih anăn leh kơ hră anăn, ñu mŭt hlăm sang ñu ƀăng bhă điêt hlăm adŭ tal dlông ñu pŏk jih phă ƀuôn Yêrusalem; leh anăn tlâo bliư̆ grăp hruê ñu čuôn kơŭt wah lač leh anăn bi mni kơ Aê Diê ñu msĕ si ñu bhiăn ngă leh” (Y‑Đaniel 6:10).
Klei êmuh ksiêm mĭn: Si klei Y‑Đaniel lŏ wĭt ngă hŏng klei mtao mtrŭn? Ya klei truh kơ ñu? Si ngă ai tiê mtao? Si ngă klei Aê Diê răng mgang Y‑Đaniel? Ya boh tŭ dưn mâo mơ̆ng klei bi kpĭ mjuăt pô hlăm klei hdĭp wah lač?
Kyuadah mtao Y‑Đarius mơak čiăng mđĭ anôk bruă kơ Y‑Đaniel, snăn phung khua prŏng leh anăn phung khua krĭng nač kơ ñu. Diñu duah êlan čiăng ngă jhat kơ Y‑Đaniel kyuanăn ngă mnêč brei mtao čih anăn kăm ghă jih jang ƀuôn sang amâo dưi iêu wah lač kơ yang mkăn mdê hŏng kơ mtao ôh êjai tlâo pluh hruê. Tơdah Y‑Đaniel thâo mtao čih anăn leh kơ hră anăn, Y‑Đaniel amâo mâo klei huĭ hyưt amâodah kdŭn ôh hlăm klei hdĭp ñu wah lač. Ăt msĕ si ñu bhiăn ngă leh, ñu mŭt hlăm adŭ tal dlông sang ñu, ñu pŏk ƀăng bhă điêt phă ƀuôn Yêrusalem leh anăn tlâo bliư̆ grăp hruê ñu čuôn kơŭt wah lač leh anăn bi mni kơ Aê Diê (êlan 10). Wăt tơdah thâo jŭ jhat srăng truh mtam, ƀiădah amâo djŏ ôh kyua klei anăn Y-Đaniel “mdei êjai” amâodah “bi kdung êjai” mmông ñu pioh bi mguôp hŏng Aê Diê grăp hruê. Ai tiê huĭ mpŭ leh anăn sĭt suôr ñu pioh kơ Aê Diê amâo mâo klei mlih ôh ti anăp ya mta klei truh dưn. Klei bi kpĭ mjuăt ñu pô hlăm klei hdĭp wah lač grăp hruê đru ñu thiăm klei đăo knang kơ Aê Diê kjăp hĭn, amâo mâo huĭ ôh kơ klei jŭ jhat, dleh dlan.
Djŏ msĕ si hdră phung khua prŏng mkra leh, diñu bi mguôp mbĭt nao čiăng mă ti anăp êjai Y‑Đaniel dôk wah lač hŏng Aê Diê ñu. Diñu hưn mtam hŏng mtao leh anăn mgô̆ mtao brei bi sĭt tui si hră ñu čih anăn leh (êlan 11-13). Mtao rŭng răng snăk leh anăn duah êlan čiăng bi mtlaih Y‑Đaniel ƀiădah amâo dưi lŏ bi mlih ôh klei ghă tui si hră mtrŭn leh. Kyuanăn, ti knhal tuč mtao hŏng klei mgô̆ mtă arăng mă Y‑Daniel hwiê ñu hlăm war êmông gu. Khădah snăn dưn, mtao ăt mâo klei đăo mơh kơ Aê Diê Y‑Daniel mă bruă sĭt suôr srăng bi mtlaih ñu (êlan 14-16). Aguah ưm hruê mgi, mtao ruăt nao mtam kơ war êmông gu čiăng ksiêm dlăng. Djŏ msĕ si klei mtao đăo, Aê Diê mgang Y‑Đaniel mâo klei êđăp ênang ti krah phung êmông gu êpa mhao leh anăn jhŏng ktang. Mtao mtă arăng kdjŏng Y‑Đaniel mơ̆ng ƀăng êmông gu, leh anăn amâo ƀuh ôh sa gru êka ti asei mlei ñu, kyuadah ñu knang leh kơ Aê Diê ñu (êlan 19-23). Leh anăn mtao Y‑Đarius mtă tar ƀar ƀuôn ala mtao “brei mnuih ktư̆ yơ̆ng leh anăn huĭ ti anăp Aê Diê Y‑Đaniel” (êlan 26).
Mơ̆ng klei hdĭp bi kpĭ mjuăt Y‑Đaniel pô hlăm klei wah lač yơh brei kơ mtao leh anăn phung riêng gah thâo kral Aê Diê dôk hdĭp hlŏng lar leh anăn bŏ hŏng klei myang. Tơdah Y‑Đaniel kdŭn tluôn ti anăp hră mtao mtrŭn leh anăn amâo jhŏng wah lač kơ Aê Diê ôh, snăn si asei ñu pô, mtao Y‑Đarius mbĭt hŏng lu phung mkăn dưi bi knal klei Aê Diê kiă kriê, klei sĭt suôr leh anăn klei Aê Diê răng mgang kơ pô đăo knang kơ Ñu? Si Anăn Aê Diê dưi bi êdah ti anăp jih jang phung ƀuôn sang? Tơdah djă pioh klei bi kpĭ mjuăt pô wah lač, drei srăng mâo thiăm klei ktang čiăng dưi tlă anăp hŏng klei lông dlăng, dleh dlan leh anăn kjăp ai tiê wah lač lu hĭn mơh.
Si ngă drei sĭt suôr djă pioh klei kpĭ mjuăt pô hlăm klei wah lač grăp hruê mơ̆?
Wah lač: Ơ Khua Yang, akâo kơ Ih đru kâo hriăm mơ̆ng rup Y‑Đaniel bi hmô djă pioh klei kpĭ mjuăt pô hlăm klei wah lač grăp hruê wăt hlăm ya klei truh dưn. Akâo kơ Anăn Khua Yang mâo klei mpŭ mni mơ̆ng klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 10:1 – 11:4
Kênh Youtube BHKTHN:
