Nqe cim:
“Thaum Daniyees paub hais tias Vajntxwv sau npe rau hauv tsab ntawv ntawd lawm, nws txawm rov mus tsev…. Nws mus txhos caug tig xubntiag rau ntawm lub qhovrai ntawd thiab thov Vajtswv ib hnub twg peb zaug raws li nws ib txwm thov.” (Daniyees 6:10).
Lus nug rau sawvdaws xav:
- Daniyees ua li cas thaum nws pom vajntxwv sau npe rau hauv tsab ntawv uas txwv thov lwm tus lawm?
- Yam xwm dab tsis tshwm tuaj raug Daniyees?
- Daniyees ua li cas rau tej ntawd?
- Vajtswv pov puag Daniyees li cas?
- Yoog cai ntawm kev thov Vajtswv muaj qab hau li cas?
Vim yog vajntxwv Dali-us ua zoo thiab hlub Daniyees tshaj nws tej nom tswv, tej tswv xeev, Daniyees thiaj raug tej nom tswv thiab tswv xeev ntxub. Lawv nrhiav kev ua phem Daniyees los ntawm mus hais vajntxwv sau tsab ntawv tseb tawm rau pejxeem sawvdaws tsuas tau cai thov vajntxwv xwb tsis pub thov lwm tus vajtswv hauv peb caug hnub. Thaum paub vajntxwv twb sau npe rau hauv tsab ntawv lawm, Daniyees yeej tsis ntshai thiab tsis theem nws kev thov Vajtswv. Ua li ib txwm, Daniyees nce mus saum nws lub tsev txheej saud, qhib qhov rai tig mus rau lub nroog Yeluxalees txhos caug thov Vajtswv thiab ua tus Tswv tsaug ib hnub twg peb zaug (nqe 10). Txawm paub hais tias teebmeem yuav tuaj raug los xij, Daniyees yeej “tsis theem” lossis “tso tseg” lub sijhawm sib txuas nrog tus Tswv txhua hnub. Lub neej fwm tus Tswv thiab kev ua ncaj uas Daniyees muaj pub rau tus Tswv, tej xwm ib ncig yeej tsis ua rau nws lub siab pauv hloov. Los ntawm yoog cai hauv kev thov Vajtswv txhua hnub, pab tau Daniyees muaj lub siab npluab ruaj khov thiab tso siab plhuav rau tus Tswv, tsis txhawj ntshai ib yam dab tsi.
Ua raws li cov nom tswv tau npaj tseg, lawv tuaj muab tim khawv pom Daniyees tab tom thov Vajtswv, coj mus qhia rau vajntxwv yuam kom vajtxwv ua raws li tau sau ntawv tseg lawm (nqe 11-13). Vajntxwv nyuaj siab heev thiab nrhiav kev pab cawm Daniyees tiamsis tsis muaj ib txoj hau kev uas yuav hloov tau nws tej lus hais tawm lawm. Yog li ntawd, thaum kawg vajntxwv tsuas kawg txib neeg ntes Daniyees coj mus pov rau hauv lub qhov kaw tsov ntxhuav xwb. Txawm li ntawd los, vajntxwv kuj cia siab hais tias tus Vajtswv uas Daniyees pehawm yuav pab cawm tau Daniyees dim (nqe 14-16). Hnub tom qab, vajntxwv maj nroos tuaj mus rau tom lub qhov kaw tsov ntxhuav xauj saib zoo li cas. Muaj raws li uas vajntxwv cia siab rau, Vajtswv tau pov puag tiv thaiv Daniyees nyob kaj siab lug nrog pab tsov ntxhuav uas tsiv thiab tshaib nqhis. Daniyees tau rub tawm hauv qhov kaw tsov ntxhuav los, nws tsis rau mob ib qhov li vim nws tso siab rau nws tus Vajtswv (nqe 19-23). Tom qab ntawd, vajntxwv Dali-us tawm lus hais tias: “…txhua tus pejxeem uas kuv kav yuav tsum fwm thiab saib taus Daniyees tus Vajtswv…” (nqe 26).
Los ntawm Daniyees muaj lub neej yoog cai ntawm kev thov Vajtswv ua rau vajntxwv thiab tej neeg ib ncig pom Vajtswv yog tus uas muaj sia nyob thiab yog tus muaj fwjchim. Yog Daniyees theem, tsis kam thov Vajtswv raws li vajntxwv txoj cai txwv, yuav ua cas Daniyees, Dali-us thiab tej neeg ib ncig thiaj pom txog Vajtswv lub fwjchim uas tswj kav thiab Nws kev ua ncaj ncees pov puag cov neeg uas tso siab rau Nws? Yuav ua cas tus Tswv lub npe thiaj tau qhia tshwm rau txhua haiv neeg? Thaum peb yoog cai ntawm kev thov Vajtswv, yuav ua rau peb muaj lub siab tawv twb taubhau rau tej teebmeem, kev txomnyem thiab peb yim thov Vajtswv ntau dua qub.
Peb puas yoog cai ntawm kev thov Vajtswv hauv txhua hnub?
Thov Vajtswv,
Tus Tswv, thov pab nyuam yaus xyaum Daniyees tus qauv yoog cai ntawm kev thov Vajtswv txhua hnub txawm yuav nyob rau ncua sijhawm zoo li cas los xij. Thov tus Tswv Koj lub npe raug qhuas los ntawm nyuam yaus lub neej. Amees.
T Nyeem Vajluskub hauv peb lub xyoo: II.Xwmtxheej Vajntxwv 10:1-11:4
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
