I Lu Pơtao 17:17-24
“Inh boih Kră Yang, tơ’ngla pơklaih iĕm đơ̆ng jĭ-jăn.” (LĐ Êyiptơ 15:26)
Nơ̆r jet tơchĕng pơwao:
– Tơdrong kiơ đei truh hăm bơngai drŏkăn Sarepta?
– Êli ‘bok khan lê̆ adrol đei pơm kiơ păng đei yua thoi yơ?
– Đơ̆ng noh, lu bơ̆n băt nhen Kră Yang Tơ’ngla thoi yơ păng bơ̆n mơn đêl bơih thoi yơ?
‘Bok Kei-Dei đei yua bơngai drŏkăn Sarepta wă wei rong ‘bok Êli lăm minh khei năr. Đơ̆ng noh kon drŏnglo sư đei tơdrong jĭ păng kơtĕch jơhngơ̆m. Lăm năr ơh sơ’ngon, sư đei pơma jŏk kơ ‘bok Êli, bơngai mă oei lăm hnam sư. Sư tơchĕng khan Kră Yang ‘Bok Kei-Dei phak sư gah dôm tơdrong yoch mă sư đei pơm na pơm kơ kon sư lôch. Dang ei, phŏ sư lu bơ̆n kon Kră Yang kư̆m đei tơdrong tơchĕng thoi yă Sarepta kơplah đei tơdrong truh lăm chăl arih.
Êli ‘bok khan lê̆ adrol, ưh kơ pơjah hăm yă âu ôh, sư athei ba ăn kon drŏnglo yă noh ăn kơ sư păng pôk kon drŏnglo noh tŏk tơ kơpal krao khan apinh Kră Yang ăn kơ bơngai hơ’lơ̆p noh iung arih dơ̆ng. ‘Nâu bơih tơdrong jang hăm đon lui. ‘Bok Êli ưh kơ hli sơ’ngon mălei lui gơnang tơpă kơ Kră Yang ‘Bok Kei-Dei mă sư bơ̆jang, awih awăn. Sư bơih Tơ’ngla wei rong sư hăm bre mĕ kon adro minh tơdrong hlĭch dêh lăm khei năr đunh mă Kră Yang đei mơnat, ưh kơ wă ăn kon yă noh lôch ngôi. Sư lui gơnang kơ Kră Yang đei tơdrong kơnhăm lăm tôm tơdrong. Kră Yang ‘Bok Kei-Dei mơ̆ng nơ̆r sư krao khan, Kră Yang pơm “bơhngol bơngai hơ’lơ̆p noh wih brŏk tơ sư dơ̆ng păng sư iung arih dơ̆ng.” Sư pôk kơ’mĭn bơngai hơ’lơ̆p noh jur, ăn kơ yă adro păng đei nơ̆r pơma tơpă “Ih lăng âu kon ih arih bơih.” (I Lu Pơtao 17:22-23).
‘Nâu bơih tơdrong krao khan mă Kră Yang đei tơl tơwih păng ăn iung arih blŭng a lăm Sơ̆p Hla bơar ‘Bok Kei-Dei. Lĕch yua đơ̆ng mơsêh mơyang tơiung arih kon drŏnglo yă adro âu jơ̆ yă mă băt nhen tơpă kơ ‘bok khan lê̆ adrol noh ‘bok Êli tơpă sư bơngai đơ̆ng ‘Bok Kei-Dei wơh. Yă ei pơdah đon lui tơpă kơ ‘Bok Kei-Dei đe Isơrael jơ̆ Tơ’ngla mơsêh mơyang. Nơ̆r sư akhan đơ̆ng ‘bơ̆r lu ‘bok khan lê̆ adrol noh tơpă. Sư bơih ‘bok mă mơsêh mơyang gơh ăn arih, pơklaih ăn arih păng pơdrâu iŏk tơdrong arih. Tơdrong kon drŏnglo yă adro bơngai tơmoi lôch păng đei iung arih đei truh wă kơ pơsĭt đon lui sư. Đơ̆ng noh, na sư đei đon lui kơ ‘Bok Kei-Dei păng gơh wơ̆ ‘lŏ lăm đon lui. Truh kơ jơ năr noh, sư khan kơ ‘bok Êli: “Dang ei inh băt kơ ih ‘nâu minh ‘nu bơngai đơ̆ng Kră Yang ‘Bok Kei-Dei, dôm nơ̆r Kră Yang pơm sĭt tơpă.” (trong 24).
Tơdrong mă kăl hloh noh kăl kơ đei lăm chăl arih krao khan đei yua păng mă pran ‘noh bơih đon lui. Kră Yang Yêsu khan: “Mă tơdrong kiơ kiơ iĕm krao khan apinh ‘Bok Kei-Dei, dah iĕm lui kơ Sư gô ăn tơdrong iĕm apinh noh, lei iĕm gô đei tơpă.”” (Mathiơ 21:22). Kơplah lu bơ̆n krao khan hăm Kră Yang athei lui kơ tơdrong mơsêh mơyang, tơdrong gơh hơgei păng tơdrong ‘mêm mơnat Sư. Lui tơpă kơ Kră Yang gô tơl tơwih nơ̆r bơ̆n krao khan apinh pơklaih lu bơ̆n păng Sư gô ăn tơdrong mă ‘lơ̆ng hloh, lăm jơ năr mă ‘lơ̆ng hloh ăn kơ lu kon Sư.
Ơ Kră Yang, inh bơnê kơ Ih yua kơ Ih bơih Kră Yang Rapha, Tơ’ngla pơklaih inh. Apinh Ih tơgŭm inh ling lang iŏk đon lui wă kơ krao khan păng lui gơnang kơ Kră Yang ling lang ăn tơdrong mă ‘lơ̆ng hloh kơ inh kiơ̆ thoi Ih wă. Yua anăn Kră Yang Yêsu Krist, Amen.
Lu bơ̆n hăm băt nhen tơpă păng lui gơnang kơ Kră Yang bơih Tơ’ngla mơsêh mơyang păng đei tơdrong mơsêh gơh pơklaih păng tơiung arih ưh?
Ơ Kră Yang Tơ’ngla mă pơklaih
‘Maih tơl tơwih nơ̆r inh krao khan tơpă
Kơ băt dôm tơdrong anat anot mă oei đei
Hơpơi oei kiơ̆ Kră Yang, kơjăp lăm jơhngơ̆m
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 20
Kênh Youtube BHKTHN:
