Klei Aê Diê Blŭ: Y‑Đaniel 3:19-30
Êlan kliăng: “Mtao lŏ wĭt lač, “Dlăng bĕ, kâo ƀuh pă čô mnuih tlaih leh, êbat ti krah pui, amâo mâo êka ôh; leh anăn ƀô̆ mta pô tal pă anăn jing msĕ si sa čô anak êkei phung yang.” (Y‑Đaniel 3:25).
Klei êmuh ksiêm mĭn: Leh hwiê tlâo čô Hêbrơ hlăm pui, ya dŏ mtao Y‑Nebukatnetsar ƀuh? Si klei truh kơ phung tlâo čô anăn? Hlei jing pô tal pă êbat hlăm pui mbĭt hŏng diñu? Si klei drei tuôm bi knal mâo Khua Yang dôk mbĭt, êbat mbĭt hlăm pui klei lông dlăng truh?
Djŏ msĕ si klei ñu arưp aram, mtao Y‑Nebukatnetsar brei phung kahan hwiê tlâo čô êkei dam Hêbrơ hlăm kpur pui “brei arăng bi hlơr pui hlăm kpur kjuh blư̆ ktang hĭn tui si arăng khăng ngă”. Ƀiădah yuôm bhăn êdi, phung kahan ktang knŏng dôk ti êngao kpur hwiê tlâo čô digơ̆ hlăm pui, ăt “êlah pui bi mdjiê” mơh, êjai anăn mtao Y‑Nebukatnetsar ƀuh hlăm kpur pui “pă čô mnuih tlaih leh, êbat ti krah pui, amâo mâo êka ôh”. Tinei drei ƀuh hlăm pui klei lông dlăng, tlâo čô êkei dam Y‑Sadrak, Y‑Mêsăk, leh anăn Y‑Abetnêgô amâo mâo čăp diñu ôh. Diñu dưi tlaih, mâo klei êngiê dưi êrô êbat, leh anăn amâo mâo êka keh ôh, “pui amâo dưi ngă kơ asei mlei phung tlâo čô anăn ôh, aruăt ƀŭk ti boh kŏ diñu leh anăn čhiăm ao diñu pui amâo ƀơ̆ng ôh, kăn mâo mnâo pui ti diñu rei.” (êlan 27).
Ya dŏ đru phung tlâo čô Hêbrơ dôk hlăm kpur pui huĭ mduĭ, ƀiădah ăt mâo klei êngiê leh anăn êđăp ênang msĕ snăn? Kyuadah dôk hlăm kpur pui mbĭt hŏng diñu lŏ mâo “pô tal pă anăn jing msĕ si sa čô anak êkei phung yang” (êlan 25). Anei năng ai jing klei Khua Yang Yêsu bi êdah êlâo kơ Ñu trŭn hriê jing mnuih ti lăn ala, amâodah năng ai jing sa čô dĭng buăl jăk. Wăt tơdah mdê bi klei thâo săng dưn, klei truh anei ăt mblang kơ klei mâo Aê Diê dôk mbĭt hŏng tlâo čô êkei dam anei hlăm kpur pui. Diñu amâo êbat hjăn păn ôh hlăm pui trơ̆ng, Aê Diê dôk hlăm anôk anăn mbĭt hŏng diñu. Anei jing klei mdê ti krah sa čô mnuih knang kơ Aê Diê leh anăn mnuih amâo mâo đăo kơ Aê Diê. Leh anăn msĕ mơh anei jing klei bi juh leh anăn klei čang hmăng prŏng kơ drei, duah amâo dưi ƀuh ôh ti lăn ala anei.
Kyuadah mâo Aê Diê dôk mbĭt hlăm klei jhat truh, kyuanăn wăt tơdah Aê Diê amâo ruah ôh klei bi mtlaih drei, snăn klei êngiê ăt kăn bi kpĕ luh liê rei leh anăn klei êđăp ênang ăt sĭt êmĭt hŏng hlei pô đăo knang kơ Aê Diê. Khua sang yang Y‑Êtiên êjai arăng bhĭr boh tâo giăm djiê ăt blŭ knŏng dua mta klei mơh, akâo kơ Aê Diê jum mngăt ñu leh anăn akâo kơ Aê Diê đăm yap klei soh kơ phung bi mdjiê ñu ôh. “Leh gơ̆ lač klei anăn, gơ̆ hlŏng pĭt yơh” (Bruă Ƀĭng Kna 7:59-60). Ñu amâo mâo čăp ñu hŏng klei huĭ, klei ruă, klei đuôm ai ôh. Amâo mâo “mnâo pui” wăt kăn mâo mnâo klei djiê rei.
Klei jhat truh kơ grăp čô mdê mdê. Hdră êlan Aê Diê ruah čiăng mjưh bi ruê̆ klei truh anăn hŏng grăp čô anak ƀuôn sang Aê Diê ăt mdê mdê mơh. Ƀiădah, mâo sa mta klei jing msĕ sơăi hŏng jih jang hlei pô čang guôn kơ Khua Yang, jing klei mâo Khua Yang dôk mbĭt hlăm klei truh, leh anăn dưi mâo klei bi knal klei êngiê, klei êdu êun, klei êđăp ênang mơ̆ng Khua Yang.
Ya mta kpur pui ih tuôm dôk leh, leh anăn hlăk dôk ară anei hin? Si ngă čiăng dưi bi knal klei êngiê leh anăn mnâo drei, amâo djŏ jing mnâo pui ôh ƀiădah jing mnâo ƀâo mngưi klei mmuñ bi mni?
Wah lač: Ơ Khua Yang, kâo hơ̆k mơak leh anăn mâo klei bi juh kyuadah thâo kơ Khua Yang dôk mbĭt hŏng kâo nanao êjai kâo tuôm hŏng klei jhat truh. Akâo kơ Ih brei klei hdĭp kâo jing mnâo ƀâo mngưi klei bi mni êjai dôk hlăm klei mđăo mjuăt.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 7:27-51
Kênh Youtube BHKTHN:
