Klei Aê Diê Blŭ: Rôma 1:8-15
Êlan kliăng: “Kyuadah kâo čiăng snăk nao čhưn kơ diih, čiăng kơ kâo dưi bi mbha kơ diih klei brei mơ̆ng Yang Mngăt Jăk, čiăng bi kjăp diih” (Rôm 1:11)
Klei êmuh ksiêm mĭn: Hŏng si mta klei bi êdah Ai tiê Khua ƀĭng kna Y-Pôl hŏng phung đăo ti ƀuôn Rôm? Si čiăng lač tơdah ñu yua boh blŭ “đuôm nư” hlăm êlan 14? Ya klei mđĭ ai kơ diih mơ̆ng ai tiê Khua ƀĭng kna Y-Pôl?
Rôm jing ƀuôn prŏng yuôm bhăn leh anăn ƀuôn prŏng phŭn mơ̆ng ala mtao Rôm mâo êlan klông truh kơ djăp anôk hlăm ala mtao. Wăt tơdah ka tuôm truh ti Rôma ôh ƀiădah Khua ƀĭng kna Y-Pôl mđing hmư̆ nanao klei hâo hưn leh anăn thâo klei đăo phung đăo ti Rôm ka dưi lar truh kơ djăp anôk ôh (êlan 8). Hlăm Anăn Khua Yang Yêsu, Khua ƀĭng kna Y-Pôl bi mni kơ Aê Diê kơ klei đăo diñu. Ñu čiăng lač: Kyua klei Aê Diê pap anăn klei bi mtlaih dưi brei kơ hlei pô mă tŭ Klei Mrâo Mrang Jăk kơ Anak Ñu jing Khua Yang Yêsu, Pô djiê leh jing mnơ̆ng ngă yang bi tui klei soh kơ anak mnuih, Pô Dôk Ti Krah sa anăn čiăng kơ ñu leh anăn phung đăo ti Rôm dưi bi mguôp hlăm klei bi mguôp hŏng Aê Diê. Grăp blư̆ wah lač, Khua ƀĭng kna Y-Pôl hdơr nanao kơ diñu leh anăn akâo kơ Khua Yang pŏk êlan čiăng kơ ñu mâo gưl nao čhưn hŏng digơ̆ (êlan 9-11).
Khua ƀĭng kna Y-Pôl hur har čiăng nao čhưn hŏng phung đăo tinei čiăng mtô kơ digơ̆ mta kñăm mơ̆ng klei đăo, hriăm mơ̆ng klei digơ̆ găn leh hlăm klei đăo kơ Khua Yang Pô Bi Mtlaih, leh anăn pŏk êlan hiu hưn Klei Mrâo Mrang Jăk găn Español hŏng dŭm krĭng riêng gah nah Yŭ Êa Ksĭ Krah Boh Lăn, ƀiădah truh ară anei ăt dôk gun kpăk (êlan 12-13). Bruă hưn klei đăo kriê dlăng amâo djŏ knŏng đru kơ sa čô mnuih thâo Khua Yang Yêsu, đăo kơ Ñu ôh ƀiădah lŏ dơ̆ng đru digơ̆ kjăp hlăm klei đăo leh anăn hriê kơ prŏng hlăm klei mă bruă Khua Yang.
Hlăm êlan 14, Khua ƀĭng kna Y-Pôl čŏng lač ñu pô đuôm nư wăt kơ mnuih Grek wăt kơ phung măk ƀai (amâo djŏ mnuih Grek), kơ phung hriăm lu wăt kơ phung amâo mâo hriăm. Čiăng lač ñu đuôm nư jih jang mnuih, grăp čô, gưl mnuih kơ Klei Mrâo Mrang Jăk mơ̆ng Khua Yang Yêsu. Đuôm nư snăn brei tla êla jih. Kyua anăn, Khua ƀĭng kna Y-Pôl hur har ngă bruă hiu hưn Klei Mrâo Mrang Jăk kơ phung tue Khua Yang jao leh kơ ñu (Bruă Phung Khua Ƀĭng Kna 9:15, I Kôrantô 9:16-17).
Grăp čô phung đăo đuôm nư Aê Diê sơăi kơ klei pap, klei khăp leh anăn klei jăk mơak Ñu brei. Tơdah drei amâo bi leh bruă klam dĭng ktang Ƀuôn Ala Mtao Adiê snăn amâo mdê ôh hŏng klei đuôm nư ƀiădah amâo tla. Hlăk êjai drei hdĭp mda mă bruă, hdơr mđing tal êlâo hĭn hưn Klei Mrâo Mrang Jăk Aê Diê kơ phung riêng gah leh anăn đru diñu hdĭp hŏng klei đăo. Bruă anei mphŭn hŏng găp djuê, ƀĭng găp, phung riêng gah, ayŏng amai adei hlăm anôk mă bruă leh anăn truh kơ jih jang mnuih, jing phung Aê Diê jao kơ drei (Y-Mathiơ 28:19-20, Bruă Phung Khua Ƀĭng Kna 1:8).
Drei mâo klei mtrŭt wah lač brei, čuă čhưn leh anăn hưn kơ hlei pô hlăm hruê kăm anei?
Wah lač: Ơ Khua Yang, hlăm Anăn Khua Yang Yêsu, kâo bi mni lač jăk kơ Aê Diê kơ klei đăo hlăm kâo ăt msĕ mơh hlăm phung găp djuê, ƀĭng găp kâo! Akâo kơ Ama thiăm brei êa pui mtrang hlăm pui kđen kâo, čiăng kâo mâo nanao klei mđĭ ai hdĭp djŏ leh anăn hur har hiu hưn klei Khua Yang bi tui kơ lu mnuih Ih jao leh kơ kâo.
Dlăng Klei Aê Diê Blŭ hlăm tlâo thŭn: Rôm 5:1-6:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
