Klei Aê Diê Blŭ: Klei Bi Hriêng 12:20-22
Êlan kliăng: “Klei mplư dôk hlăm ai tiê phung trông čhai kơ klei jhat,
ƀiădah klei pô trông čhai kơ klei êđăp ênang mâo klei hơ̆k mơak.” (Klei Bi Hriêng 12:20).
Klei êmuh ksiêm mĭn: Si klei mdê ti krah ai tiê phung ƀai hŏng ai tiê phung kpă ênô? Si boh knhal tuč kơ phung kpă ênô leh anăn kơ phung ƀai? Si ai tiê drei hŏng mnuih leh anăn hŏng Aê Diê? Ya mta klei đru diih čuăn krơ̆ng pioh ai tiê dôk kpă ênô hlăm djăp mta klei truh?
Mtao Y‑Salômôn mtô lač kơ anak ñu si hdră êlan dôk hdĭp čiăng dưi mâo ai tiê êđăp ênang, bŏ dlai klei hơ̆k mơak. Hlăm kdrêč tal pă, ñu mñă bi hdơr kơ anak: “Êgao hĭn kơ jih mnơ̆ng, kiă kriê ai tiê ih bi jăk, kyuadah mơ̆ng ñu yơh kbiă akŏ klei hdĭp.” (Klei Bi Hriêng 4:23). Tinei, ñu mtô anak êlan kliăng čiăng kơ ai tiê anak mâo klei êđăp ênang jing dôk hdĭp kpă ênô. Ai tiê phung ƀai hung kơ mnêč jhat ƀai, bŏ hŏng klei luar klei mplư. Ai tiê diñu bi êdah mta klei khŏ mgu, ƀăng êgei diñu kăp blŭ klei mgưt mplư bi jhat arăng, leh anăn wăt kơ diñu pô mơh ti hruê êdei anăp. Ya mta diñu mâo mă mơ̆ng klei diñu mplư luar srăng ram rai djăl mơh, leh anăn boh nik ngă kơ Aê Diê Yêhôwa bi êmut kheh (êlan 22). Mklăk wĭt hŏng phung ai tiê jhat ƀai, jing phung mâo ai tiê kpă ênô diñu mtrŭt mjhar klei êđăp ênang, snăn yơh ai tiê diñu bŏ hŏng klei hơ̆k mơak. Mta bruă diñu ngă amâo djŏ knŏng bi mơak hjăn kơ mnuih ôh ƀiădah wăt bi mơak kơ Aê Diê mơh.
Việt Nam mâo klei duê msĕ snei: “Êa krông êa ksĭ êlam lĭn dưn ăt dưi mkă mơh, ƀiădah hlei pô dưi yua giê treh mkă ai tiê mnuih”. Bi pô čih klei duê knhâo mbruă Nguyễn Du čih msĕ snei: “Ti êngao êmhač tač blŭ tlao, hlăm lam mdjiê mnuih huĭ hyưt amâo guôn yua dhŏng”. Phung mnuih dôk hdĭp ti lăn ala mâo klei bi knal, ƀuh ai tiê mnuih jing mtŭk mtŭl êdimi, amâo dưi mkă ôh, leh anăn ai tiê phung jhat ƀai, diñu yua mnêč mplư luar kăp bi mdjiê mnuih amâo guôn yua hŏng mnơ̆ng dhơ̆ng ôh. Khădah snăn dưn, mtao Y‑Salômôn mtô lač kơ anak, thâodah kyua čiăng mâo đei klei hing ang, lu mnuih ngă klei jhat ƀai, ai tiê bliư̆ mlih, dôk hdĭp gao klei bhiăn, ngă soh hŏng mnuih, hŏng Aê Diê, ti knhal tuč boh diñu mă tŭ jing “klei rŭng răng” (êlan 21) mơ̆ng hlăk êjai klei hdĭp ênuk anei leh anăn wăt klei rai luč hlăm ênuk hlŏng lar, kyuadah Klei Khua Yang Blŭ kñăm leh “ênoh mưn mơ̆ng klei soh jing klei djiê” (Rôm 6:23). Snăn yơh, khua ƀĭng kna Y‑Pôl mtă mtăn kơ phung anak Aê Diê: “Khăp mĭn bĕ kơ mnơ̆ng hlăm adiê, amâo djŏ ôh kơ mnơ̆ng ti lăn ala. Kyuadah diih djiê leh, leh anăn klei hdĭp diih mdăp leh mbĭt hŏng Krist hlăm Aê Diê” (Kôlôs 3:2-3)
Ai tiê kpă ênô amâo djŏ ôh knŏng ba hriê kơ drei klei hơ̆k mơak, êđăp ênang, ƀiădah wăt bi êdah klei kpă ênô klei khăp Aê Diê kơ jih jang mnuih mơh. Ai tiê kpă ênô adôk bi êdah hlăm klei drei đăo knang kơ klei Aê Diê kiă kriê răng mgang, leh anăn đăo kjăp kơ drei srăng mâo kdrêč dưi dưn klei guh kơang mbĭt hlăm ênuk hlŏng lar. Hmăng hmưi grăp čô drei thâodah dôk tŭ klei kƀah knap, dleh dlan hlăm klei hdĭp êjai anei, ăt krơ̆ng kjăp ai tiê dôk kpă ênô hŏng mnuih leh anăn hŏng Aê Diê.
Si ngă mâo mơ̆ ya mta klei drei ngă soh čhuai čiăng akâo kơ Khua Yang pap brei leh anăn đru drei bi mlih?
Wah lač: Ơ Khua Yang, bi mni kơ Ih kyua Klei Blŭ Ih jing klei sĭt nik ktrâo atăt kâo kơ klei hdĭp hlŏng lar. Akâo Ih brei kâo dôk hdĭp kpă ênô, kăp bi êdah klei kpă ênô, klei khăp Ih kơ jih jang mnuih. Akâo Ih krơ̆ng ai tiê kâo êngeh mngač nanao ti anăp Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 2:1-26
Kênh Youtube BHKTHN:
