Klei Aê Diê Blŭ: Hêbrơ 10:26-31
Êlan kliăng: “Kyuadah tơdah drei dôk ngă soh hŏng klei čiăng leh drei thâo săng klei sĭt nik, amâo lŏ mâo mnơ̆ng ngă yang kyua klei soh ôh” (Hêbrơ 10:26)
Klei êmuh ksiêm mĭn: “Ngă soh hŏng klei čŏng čiăng” hlăm êlan 26 kơ ya klei čiăng lač? Klei knhal tuč kơ pô ngă msĕ snăn si srăng jing? Si knuih brei drei mâo ti anăp klei sĭt nik anei?
Ih tuôm blŭ luar mơ̆? Tơdah blŭ luar, ih blŭ hŏng klei amâo yŏng mĭn hĕ amâodah ih bi mĭn êlâo leh anăn blŭ? Tơdah snăn amâo djŏ hĕ ih “ngă soh hŏng klei čŏng čiăng” leh anăn srăng tŭ klei bi kmhal knap mñai snăk hlăm war pui? Boh sĭt gơ̆, Klei Aê Diê Blŭ amâo tuôm lač sa čô mnuih đăo kơ Krist kyua mông awăt ngă soh srăng tŭ klei bi kmhal hlăm war pui ôh. Pô čih hră Hêbrơ lač mnuih “ngă soh hŏng klei čŏng čiăng” jing mnuih “juă leh Anak Aê Diê, bi čhŏ êrah klei bi mguôp bi doh ñu leh, leh anăn dlao wač kơ Yang Mngăt Jăk klei pap” (êlan 29). Snăn yơh, “ngă soh hŏng klei čŏng čiăng” amâo djŏ knŏng hjăn klei ngă ôh ƀiădah kluôm jih klei đăo wăt klei dôk dơ̆ng ƀơ̆ng huă sa čô mnuih.
Mâo đa đa mnuih săng “ngă soh hŏng klei čŏng čiăng” lač kơ sa čô mnuih đăo leh kơ Khua Yang ƀiădah truh sa hruê lŏ hngah kơ “klei sĭt nik”, lač klă hĭn jing lui wir klei đăo. Đa đa mnuih mkăn săng “ngă soh hŏng klei čŏng čiăng” jing dôk nanao hlăm klei soh, amâo bi êdah ôh boh mơ̆ng sa čô mnuih mâo klei đăo sĭt. Phung anei thâo kral leh klei sĭt nik, klei Khua Yang mtă, ƀiădah mơ̆ng phŭn diñu amâo tuôm đăo kơ Khua Yang ôh, wăt tơdah arăng pia kơ diñu jing sa čô hlăm Phung Sang Aê Diê dưn mơh. Măng ai hŏng ya êlan săng, ƀiădah ăt dưi bi êdah kơ phung “ngă soh hŏng klei čŏng čiăng” hlăm klei mtă brei răng tinei jing phung lui wir klei đăo, čŏng čiăng hngah amâodah amâo mă tŭ sĭt ôh klei đăo hdĭp. Klei knhal tuč kơ diñu jing: “amâo lŏ mâo mnơ̆ng ngă yang kyua klei soh ôh, ƀiădah mâo klei huĭ dôk guôn klei phat kđi, leh anăn pui hlơr snăk srăng ƀơ̆ng phung bi kdơ̆ng” (êlan 26-27). Wăt tơdah drei đăo sĭt leh kơ Khua Yang ƀiădah drei dôk hdĭp hlăm asei mlei kđeh awăt êdu, hdĭp ti krah lăn ala lĕ leh hlăm klei soh kyuanăn dleh snăk dưi tlaih mơ̆ng klei ngă soh amâo čŏng čiăng. Ƀiădah lĕ, mnuih đăo sĭt kơ Khua Yang mâo Yang Mngăt Jăk ƀuah brei kmhal kơ klei soh. Tơdah ăt ngă klei khăng kŏ, tăp năng Khua Yang srăng mkra mjuăt hŏng “klei ktang” čiăng kơ pô anăn kmhal. Bi phung lui wir leh klei đăo, amâo lŏ mâo êlan dưi bi mtlaih ôh.
Brei phung đăo dlăng klei mtă brei răng anei hŏng klei ksiêm kơ pô msĕ si klei Khua ƀĭng kna Y‑Pôl mtă, “Ksiêm bĕ kơ diih pô čiăng thâo thâodah diih dôk hlăm klei đăo” (II Kôrantô 13:5a). Hdĭp hŏng klei đăo ti krah phung amâo đăo ôh srăng tlă anăp hŏng klei phung roh ngă jhat, klei lăn ala mplư, klei đăo soh mplư, leh anăn wăt knuih kđeh awăt hlăm lam.
Kyuanăn, brei drei knang kơ Khua Yang đru drei dôk kjăp hlăm klei đăo, bi mguôp sĭt suôr hŏng Phung Sang Aê Diê kăp bi đru, bi mđĭ ai hdơ̆ng găp ktuê êlan wĭt kơ Ƀuôn Jăk.
Ya drei srăng ngă čiăng djă pioh klei đăo, dôk sĭt suôr tơl djiê?
Wah lač: Ơ Khua Yang, kâo bi mni kơ Ih brei kâo thâo kral klei sĭt nik, mâo klei đăo kơ Ih, dôk hlăm klei bi mguôp mrâo, bi doh leh kâo hŏng êrah Êđai Biăp. Mgang kâo kơ klei lui wir klei đăo. Akâo kơ Yang Mngăt Jăk bi mlih ai tiê kâo jing mrâo grăp hruê čiăng kơ boh mơ̆ng klei bi mtlaih bi êdah nanao amâo mdei ôh. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 2:5-3:18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
