Henplais 10:26-31
Nqe cim zaj kawm:
“Peb cov uas twb paub tseeb lawm, yog peb tseem txhob txwm ua txhaum dua yeej tsis muaj ib yam dabtsi yuav theej tau peb lub txhoj li” (Henplais 10:26).
Lus nug rau sawvdaws xav:
– “Txhob txwm ua txhaum” hauv nqe 26 yog txhais li cas?
– Tus neeg uas zoo li ntawd nws lub neej yuav xaus mus li cas?
– Peb cheemtsum muaj tus cwjpwm li cas rau yam uas peb paub tseeb lawm?
Koj puas tau hais lus dag tej zaug lawm? Thaum hais lus dag, yog koj lam tau lam hais lossis koj twb xav ua ntej lawm mam hais tawm cov lus txhaum. Yog muaj li ntawd ces puas yog koj “txhob txwm ua txhaum” thiab koj yuav raug txiav txim poob rau ntuj tawg? Tseeb tiag Vajtswv Txojlus tsis qhia hais tias tus ntseeg yuam kev ua txhaum yuav raug txiav txim poob ntuj tawg, tiamsis tus sau phau Henplais qhia meej hais tias, tus uas “txhob txwm ua txhaum” yog “tus uas saib tsis taus Vajtswv tus Tub hajyam muaj txim loj dua tus uas ua txhaum Mauxes txoj kevcai. Rau qhov nws saib tsis taus Yexus cov ntshav uas twb ntxuav nws tej kev txhaum lawm, kom nws ua tau neeg zoo raws li Vajtswv txoj kevcai tshiab” (nqe 29). Yog li ntawd, “txhob txwm ua txhaum” yog ua tej yam uas yus twb paub yog txhaum los tseem ua qees, ntawd yog tej kev txhaum uas saib tsis taus Vajtswv leej Tub.
Muaj ib txhia to taub qhov uas “txhob txwm ua txhaum” yog hais txog cov uas ntseeg Tswv Yexus txog tog txawm tso kev ntseeg lawm. Muaj ib txhia to taub hais tias “txhob txwm ua txhaum” yog txeev ua neej rau hauv txoj kev txhaum, tsis tawg paj txi txiv rau Vajtswv li. Ntawd yog hais txog cov neeg uas twb txais yuav qhov tseeb ntawm Vajtswv Txojlus qhia lawm, tiamsis lawv yeej tsis ntseeg Vajtswv tas siab ntsws, txawm yog lawv yog ib tus ntseeg hauv Pawg Ntseeg los lawv yog tus ntseeg ntawm lub ncauj xwb. Txawm yog yuav piav li cas txog cov tibneeg “txhob txwm ua txhaum” los lub ntsiab yeej yog hais txog cov neeg uas tawm tsam kev ntseeg, tsis kam txais yuav qhov tseeb, lossis lam txais yuav ntawm lub ncauj xwb tsis pauv hloov. Thaum ib tus neeg zoo li ntawd “…yeej tsis muaj ib yam dabtsi yuav theej tau nws lub txhoj li, tsuas muaj kev txhawj kev ntshai tos rawv hnub uas Vajtswv rau txim thiab muab cov hluavtaws uas kub heev coj los hlawv lawv lawm xwb” (nqe 26-27).
Txawm yog peb twb ntseeg Vajtswv tseeb lawm, tiamsis peb tseem nyob rau sab nqaij tawv uas txawj qaug zog, ua neej rau hauv lub ntiajteb uas muaj kev txhaum, qee lub sijhawm peb yuav zam tsis dhau thiab yuam kev ua txhaum. Txawm li ntawd los, tus uas ntseeg tseeb tiag Vaj Ntsujplig yuav ntuas kom nws tig rov los lees txim rau Vajtswv. Yog nws tseem tawv ncauj tej zaug Vajtswv yuav siv nplawm los nplawm kom nws tig rov qab los cuag Vajtswv. Tiamsis tus uas lam ntseeg thiab tawmtsam kev ntseeg yeej tsis muaj txoj haukev yuav cawm tau nws li lawm.
Cov ntseeg yuav tsum nyeem lo lus ceebtoom nram qab no, tig rov ntsia yus tus kheej li timthawj Paulus qhia, “Nej cia li ua tib zoo xav thoob thoob saib nej puas yog cov uas muab siab rau ntseeg los tsis yog? Nyaj nej yuav paub lawm hais tias Yexus Khetos nyob hauv nej lub siab. Yog nej tsis paub ntshai nej tsis yog cov uas ntseeg tiag” (2 Kauleethaus 13:5). Ua neej ntseeg Tswv Yexus nyob hauv lub ntiajteb no, peb yeej yuav ntsib yeeb ncuab txoj kev tsim txom, lub ntiajteb txoj kev dag ntxias, kev ntseeg cuav haub ntxias thiab peb lub siab sab nqaij tawv uas qaug zog zis. Yog li ntawd, yuavtsum nco ntsoov vamkhom Vajtswv pab kom ceev tau kev ntseeg ruaj khov thiab koom nrog Pawg Ntseeg kom ib leeg txhawb ib leeg peb thiaj yuav sib tuav tau tes rhais ruam mus txog Vajtswv lub Tebchaws.
Thov Vajtswv
Vajtswv, nyuam yaus ua Koj tsaug, uas nyuam yaus tau paub qhov tseeb, ntseeg txais yuav Koj, tau nyob hauv txoj kev coglus tshiab thiab tau Koj tus Tub cov ntshav ntxuav nyuam yaus dawbhuv. Thov pab nyuam yaus tsis txhob ua tus neeg saib tsis taus Vajtswv Leej Tub thiab tawmtsam txoj kev ntseeg. Nyuam yaus tuav Tswv Yexus Khetos lub npe thov, Amees.
Peb ua dabtsi los pab kom peb tuav tau kev ntseeg thiab ncaj ncees mus txog hnub tas simneej?
Nyeem Vajluskub hauv peb xyoos: 1 Kauleethaus 2:5-3:18
Kênh Youtube BHKTHN:
https://www.youtube.com/c/bhkthn
