II Kauleethaus 8:9-15
Nqe cim:
“Tsis yog kuv xav kom lwm cov tau zoo tiamsis cia nej txomnyem. Nimno nej muaj ntau, tsimnyog nej pab cov uas tsis muaj. Thaum nej tsis muaj, lawv muaj, lawv ho pab nej. Yog li ntawd nej sawvdaws yuav muaj sib npaug zos. Raws li Vajtswv txojlus hais tias, ‘Tus uas khaws tau ntau nws yeej tsis muaj seem, tus uas khaws tau tsawg los nws yeej muaj txaus’” (II Kauleethaus 8:13-14).
Lus nug rau sawvdaws xav:
- Timthawj Paulus qhia txog ob txojcai twg hauv kev sib pab?
- Nws piav leejtwg tus qauv los txhawb cov ntseeg hauv Kauleethaus sib pab los ntawm kev hlub?
- Peb ua raws zaj kawm no licas hauv lubneej?
Cov ntseeg hauv Kauleethaus tau koom tes pab nyiaj txiag rau Pawg Ntseeg Yeluxalees lub xyoo dhau los thiab lawv coglus yuav pab ntxiv, yog li ntawd Timthawj Paulus thiaj rov hais kom lawv ua tiav lawv tej lus cogtseg. Timthawj Paulus yeej tsis tau yuam kom lawv tiv kev txomnyem pab lwm tus tau zoo (nqe 13), tiamsis nws muab ob txojcai rau lawv coj nyob hauv kev sib pab. Thib ib, “zoo siab hlo pab” (nqe 12), tsis yog yuav pab ntau pab tsawg tiamsis qhov tseemceeb yog zoo siab hlo pab xwb. Timthawj Paulus piav rau lawv nco txog Tswv Yexus tus qauv hais tias, “Txawm yog nws yog tus uas npluanuj los nws zoo siab los ua tus uas pluag.” Vaj Leej Tub tso txhua yam zoo saum ntuj ceebtsheej tseg, nqis los ua neeg ntiajteb, yug hauv qhov chaw phem qias, thiab ua lubneej txomnyem hauv tus kws ntoo pluag lub tsev hauv Naxales, Timthawj Paulus qhia hais tias, “Nws ua li ntawd twb yog nws xav pab nej kom nej ua tau neeg npluanuj” (nqe 9). Qhov ntawd yog yam txhawb Vajtswv cov menyuam lub zog xyaum ua raws Tswv Yexus tus qauv thaum muaj kev pab lwm tus.
Thib ob, Timthawj Paulus qhia txog txojcai “sib npaug zos” (nqe 14), ntawm no kuj yog txojcai uas Vajtswv qhia rau Nws haivneeg thaum lawv tseem nyob tom tiaj suabpuam thaum Nws pub manas rau lawv noj, lawv txhua tus puavleej tau noj tsau npo txawm yog yuav muaj tus khaws tau ntau, tau tsawg (nqe 15, Khiavdim 16:18). Txojcai sib npaug zos qhia tshwm txojkev sib hlub sib hmov tshua thiab sib pab. Timthawj Paulus tsis yuam kom lawv yuav tsum ris lub nra hnyav kom lwm tus tau lub nra sib tiamsis nws xav qhia rau lawv paub txojcai sib pab thaum yus muaj tiamsis lwm tus pluag, Timthawj Paulus qhia hais tias “Nimno nej muaj ntau, tsimnyog nej pab cov uas tsis muaj. Thaum nej tsis muaj, lawv muaj, lawv ho pab nej. Yog li ntawd nej sawvdaws yuav muaj sib npaug zos”. Ntawm no yog kev sib pab sib npaug zos hauv txojkev hlub.
Tus Tswv Pawg Ntseeg niaj hnub nimno kuj cheemtsum kawg txojkev sib hlub, kom tus uas muaj pab tau tus uas pluag, txomnyem. Thiab tus uas tau lwm tus pab lawm, kuj yuav tsum pab lwm tus raug txomnyem thaum tus Tswv pub rau yus muaj txaus. Los ntawm kev hlub, peb txaus siab hlo pab lwm tus kom txhua tus tau tus Tswv pub muaj npluamias hauv lubneej thiab tau ua tus Tswv tsaug.
Thov Vajtswv,
Tswv Yexus! Nyuam yaus ua Koj tsaug vim hlub nyuam yaus Koj tso txhua yam tseg, kom nyuam yaus tau txais txhua yam zoo. Thov pab nyuam yaus zoo siab hlo muab pub lwm tus kom qhia tshwm Koj txojkev hlub uas tabtom tswjkav nyuam yaus lubneej. Amees.
Yam dabtsi thaiv tsis pub peb pab lwm tus ibncig thaum lawv cheemtsum?
Nyeem Vajluskub hauv peb lub xyoo: Exekees 44
Kênh Youtube BHKTHN:
