Klei Aê Diê Blŭ: II Kôrantô 8: 9-15.
Êlan kliăng: “Kâo amâo čiăng ôh bi hdjul phung mkăn leh anăn bi ktrŏ diih, ƀiădah čiăng mâo klei bi knar. Klei diih mâo lu êbeh ară anei srăng bi djăp klei diñu kƀah, leh anăn čiăng kơ klei diñu mâo lu êbeh srăng bi djăp klei diih kƀah. Snăn srăng mâo klei bi knar” (II Kôrantô 8:13-14).
Klei êmuh ksiêm mĭn: Khua ƀĭng kna Y-Pôl lač kơ ya dua klei bhiăn kơ grăp blư̆ đru mguôp? Hlei pô ñu mñă wĭt čiăng mđĭ ai tiê kah mbha kyua klei khăp mơ̆ng phung đăo ti Sang Aê Diê Kôrantô? Si drei ba yua klei hriăm anei hlăm klei hdĭp?
Jih jang phung đăo ti Sang Aê Diê Kôrantô hgŭm hlăm bruă đru mguôp kơ Sang Aê Diê Yêrusalem mơ̆ng thŭn êlâo leh anăn lŏ ƀuăn srăng lŏ dơ̆ng đru mơh anăn Khua ƀĭng kna Y-Pôl mñă kơ diñu bi sĭt klei ƀuăn. Ƀiădah ñu amâo lač ôh kơ digơ̆ gĭr tŭ klei kƀah čiăng đru kơ pô mkăn (êlan 13), ƀiădah ñu lač kơ dua klei bhiăn čiăng đru mguôp. Tal sa, “mâo klei jăk čiăng ngă”(êlan 12), amâo djŏ ôh jing diñu đru lu amâodah ƀiă, ƀiădah yuôm bhăn hĭn jing diñu mâo ai tiê kah mbha. Khua ƀĭng kna Y-Pôl mñă kơ diñu rup Khua Yang Yêsu, “Ñu jing mdrŏng, ăt Ñu bi ƀun Ñu pô kyua diih”. Anak Aê Diê lui leh klei guh kơang hlăm adiê, trŭn hriê jing mnuih điêt dhiêt, arăng kkiêng hlăm anôk čhŏ mrŏ, leh anăn găn klei hdĭp dleh dlan hlăm gŏ sang pô mkra mnơ̆ng hŏng kyâo ti Nasaret “…čiăng kơ hŏng klei Ñu ƀun ƀin, diih dưi jing mdrŏng” (êlan 9). Kyua klei anăn đuč mtrŭt phung ƀuôn sang Aê Diê tui hriăm klei Khua Yang Yêsu bi hmô kơ klei khăp hlăk êjai bi đru mguôp hdơ̆ng pô.
Tal dua, Khua ƀĭng kna Y-Pôl ba mdah klei bhiăn bi knar (êlan 14), anei ăt jing klei bhiăn Aê Diê ba yua kơ phung ƀuôn sang Ñu hlăm kdrăn tač hlăk Aê Diê rông diñu hŏng mana, grăp čô dưi trei ênŭm msĕ wăt tơdah mâo phung hlăk ai suaih pral duñ lu hĭn, bi phung khua mduôn duñ ƀiă (êlan 15, Klei Kbiă 16:18). Klei bhiăn bi knar bi êdah klei khăp mđing hdơ̆ng bi đru. Khua ƀĭng kna Y-Pôl amâo brei diñu klam klei ktrŏ čiăng kơ pô mkăn hdjul ƀiă ƀiădah ñu čiăng bi hriăm digơ̆ klei bhiăn bi kah mbha hlăk êjai pô mâo êdeh bi ayŏng adei mkăn dôk kƀah, “…čiăng kơ klei diñu mâo lu êbeh srăng bi djăp klei diih kƀah. Snăn srăng mâo klei bi knar”. Anei jing klei bi kah mbha hlăm klei khăp.
Sang Aê Diê hruê anei ăt čiăng snăk klei bi mđing uêñ čiăng mâo mnuih êbeh srăng kah mbha kơ phung êdu kƀah, dleh dlan, leh anăn phung mâo klei arăng đru hruê anei ăt brei kah mbha đru kơ phung mkăn hlăk êjai dleh dlan sĭt Aê Diê brei kơ pô klei êbeh dlai. Kyua klei khăp, drei srăng bi kah mbha čiăng kơ grăp cô thâo sơăi klei Aê Diê brei êdeh dlai hlăm klei hdĭp leh anăn jih ai tiê bi mni Ñu.
Ya klei ngă gun kpăk kơ drei amâo dưi kah mbha kơ phung riêng gah tơdah digơ̆ dôk mâo klei čiăng mjêc?
Ơ Khua Yang Yêsu khăp hơiêng! Kâo bi mni lač jăk kơ Ih kyua klei khăp Ih lui leh djăp mta čiăng kơ kâo thâo kral klei thiê brei êbeh dlai mơ̆ng Aê Diê. Akâo kơ Ih đru kâo srăng kah mbha čiăng bi êdah klei khăp Ih dôk kiă kriê leh anăn atăt gai klei hdĭp kâo.
Dlăng Klei Aê Diê Blŭ hlăm tlâo thŭn: Y-Êsêkiêl 44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
