Klei Aê Diê Blŭ: Klei Bi Hriêng 19:4-7
Êlan kliăng: “Amâo mâo pô dưi mâo klei khăp prŏng hĭn kơ anei: klei sa čô mnuih djiê kyua phung mah jiăng ñu. Diih jing phung mah jiăng kâo, tơdah diih ngă klei kâo mtă kơ diih” (Y‑Yôhan 15:13-14)
Klei êmuh ksiêm mĭn: Si mtao Salômôn bi hriăm anak ñu kơ klei amâo jăk mơ̆ng klei khăp mah jiăng? Si drei blŭ tlao hŏng phung mah jiăng ƀun ƀin? Si drei bi êdah klei hdơr knga kơ Aê Diê mơ̆ng klei đru ƀĭng găp hlăk êjai dleh dlan?
Phung đưm mâo klei blŭ: “Mah jiăng jing bi đru ; dleh dlan, găl jăk, hgŭm mbĭt bi đru”. Tinei, Mtao Salômôn brei ƀuh boh sĭt kơ klei amâo jăk mơ̆ng klei khăp mah jiăng hlăm ala ƀuôn. Sĭt mdrŏng sah, lu mah jiăng, ƀiădah sĭt dleh dlan, mah jiăng đuĕ kbưi. Ti sang phat kđi, grăp čô thâo sơăi hưn luar arăng srăng bi kmhal, ƀiădah mâo ƀiă snăk jhŏng lač klei kpă ênô čiăng mgang kơ phung ƀun ƀin, êdu awăt. Ti anăp prăk mah, klei dưi, amâodah čiăng duah klei êđăp ênang anăn lu mnuih mplư nai, mplư găp klam klei arăng mčeh, krư̆ kđăl. Hlăk thâo mah jiăng dleh dlan, amâo mâo anôk knang, lŏ lui jih klei bi ƀuăn leh êlâo anăn, leh anăn lač lu mta ngă kơ pô lui găp. Klei amâo jăk mơ̆ng klei khăp mah jiăng jing snăn, hlăk êjai mâo prăk kăk, brei lar ƀar snăn mâo lu găp dôk jŭm dar. Wăt tơdah grăp čô thâo sơăi “khăp kơ mdrŏng, mưč kơ ƀun” jing amâo jăk ôh, ƀiădah klei mâo ênguôt snăk jing grăp čô mnuih čiăng ngă găp hŏng phung mdrŏng. Ênguôt hĭn mơh hlăk lĕ hlăm klei ƀun ƀin, wăt ayŏng amai adei sa amĭ tăp năng ăt ñĕ đuĕ mơh, “bi êmut kơ mnuih”, ka lač ôh kơ phung mah jiăng. Ƀun leh snăn êran tui akâo kơ pô mkăn, diñu ăt ngă ngơi mang, đuĕ, mâo đa đa lŏ suôt, blŭ jhat.
Klei khăp mah jiăng mơ̆ng anak mnuih lu blư̆ knŏng jưh duah klei tŭ dưn kơ pô amâodah kơ êpul lu. Wăt tơdah dŭm Klei Bi Hriêng hruê anei mâo sa klei bi mklă năng ênguôt kơ klei bi hgŭm hlăm klei khăp mah jiăng, ƀiădah anăn jing boh sĭt hlăm klei hdĭp. Klei Aê Diê Blŭ sĭt nik, kpă ênô snăk, mngač ktrâo leh kơ phung ƀuôn sang Aê Diê klă knuih hdĭp anak mnuih mơ̆ng ênuk dưm. Aê Diê čiăng kơ drei thâơ klei hdĭp anak mnuih, ƀiădah Aê Diê amâo čiăng ôh drei hdĭp msĕ diñu. Phung đăo brei jing klei mngač ti krah klei hdĭp mmăt tĭt.
Khua Yang Yêsu brei leh kơ drei sa klei bhiăn mrâo jing brei drei bi khăp msĕ si Khua Yang khăp leh kơ drei. Khua Yang săn asei klei hdĭp čiăng tla ênoh kơ klei soh drei kyua Ñu dlăng drei jing mah jiăng. Tơdah drei bi khăp snăn drei jing mah jiăng Khua Yang (Y‑Yôhan 15:12-17). Akâo kơ Khua Yang đru drei lŏ ksiêm dlăng klei hdĭp pô, ksiêm dlăng si pô blŭ hrăm hŏng mah jiăng, boh nik hŏng phung ayŏng amai adei ƀun ƀin hlăm Khua Yang. Đăm ƀuah ôh anak mnuih ti lăn ala kyua diñu amâo mâo ôh Klei Aê Diê Blŭ, ƀiădah brei ƀuah kơ pô kyua thâo leh Klei Aê Diê Blŭ ƀiădah hdĭp msĕ si arăng mơh.
Drei blŭ tlao jăk mơ̆ hŏng phung ƀĭng găp ƀun ƀin?
Wal lač: Ơ Khua Yang, kâo bi mni kơ Khua Yang kyua Ih pap brei klei soh kâo leh anăn mă kâo jing mah jiăng Ih. Akâo kơ Ih pap brei kơ kâo kyua lu blư̆ kâo wơr, hngah đru kơ ƀĭng găp hlăm boh klei dleh dlan. Akâo kơ Khua Yang đru kâo bi êdah klei khăp Khua Yang mơ̆ng klei đru, khăp kơ ƀĭng găp pô.
Dlăng Klei Aê Diê Blŭ hlăm tlâo thŭn: Y‑Yêrêmi 21:14-32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
