Mathais 12:9-14
Nqe cim
“Yexus txawm nug sawvdaws hais tias, ‘Hnub Xanpataus peb txoj kevcai cia peb ua licas? Cia ua zoo lossis cia ua phem? Cawm txojsia lossis cia txojsia tu?’ Tiamsis tsis muaj leejtwg teb li” (Malakaus 3:4).
Lus nug rau sawvdaws xav:
- Tswv Yexus ntsib leejtwg hauv tsev sablaj?
- Cov Falixais nug Nws txog yam dabtsi?
- Tswv Yexus teb licas rau lawv?
- Peb kawm tau dabtsi dhau ntawm Tswv Yexus lo lus hais thiab tej uas Nws ua?
Tomqab uas mus dhau daim teb npleg, Tswv Yexus mus hauv tsev sablaj, nyob qhov ntawd muaj ib tug txivneej qhuav tes, cov Falixais xav nrhiav txim rau Tswv Yexus. Lawv thiaj nug hais tias, “Kho mob Hnub Xanpataus puas txhaum Kevcai?” Lawv xav tsim teebmeem rau Tswv Yexus, yog teb hais tias “txhaum” ces yog Tswv Yexus tsis ua raws li Nws tej lus qhia txog kev hlub, yog teb hais tias “tsis txhaum” ces Tswv Yexus ua txhaum txojcai hnub Xanpataus, vim txojcai no qhia hais tias tsuas pub pab lossis kho mob thaum raug tej teebmeem ua rau txojsia tu. Tswv Yexus tsis teb ncaj nraim, tiamsis Nws nug lawv txog zaj uas yog lawv muaj ib tug yaj raug poob hauv qhovtshij hnub Xanpataus, lawv yuav ua licas? Yuav cawm tus yaj ntawd tawm los, lossis cia dhau hnub Xanpataus mam mus cawm? Tseeb tiag, cov yug yaj neeg Yudais yeej nrhiav kev rub lawv cov yaj uas poob qhovtshij tawm los tamsid vim ntshai tsam tus yaj tuag, lossis cia ntev raug tsiaj tom. Cov yug yaj hlub nws pab yaj tsis xav kom nws pab yaj raug teebmeem, lawv yeej yuav cawm tus yaj ntawd txawm tias hnub ntawd yog hnub Xanpataus. Tswv Yexus hais meej kom cov Falixais nco hais tias, “neeg muaj nqis heev dua tus yaj! Yog li ntawd, txoj Kevcai yeej pub peb pab neeg Hnub Xanpataus”. Hais li ntawd tas, Nws txawm kho tus txivneej qhuav tes ntawd hnub Xanpataus nyob hauv tsev sablaj. Cov Falixais nrhiav tsis tau txim thiab tsis tau lus nkaug Tswv Yexus, lawv thiaj tawm mus sablaj nrhiav tswvyim tua Tswv Yexus.
Timthawj Mathais sau meej txog Tswv Yexus lo lus qhia hais tias, “Txoj Kevcai yeej pub peb pab neeg Hnub Xanpataus”, Malakaus tsuas sau txog Tswv Yexus lo lus nug cov Falixais, tomqab ntawd Nws ntsia lawv, “Nws chim thiab Nws nyuaj siab rau lawv” (Malakaus 3:5), tus Tswv tsis pub kevcai rau Nws haivneeg kom lawv dhau mus ua neeg siab tawv thiab tsis muaj lub siab hlub. Tus Tswv xav kom Nws haivneeg tseg cia ib hnub dawbhuv los pehawm Nws, tiamsis kuj xav kom lawv sib hlub sib pab. Lawv hlub tus Tswv, pehawm tus Tswv, nrog rau qhov ntawd, lawv kuj yuav tsum sib hlub thiab sib pab.
Niaj hnub nimno, peb txhob zoo li cov Falixais uas tsuas coj cai nruj nruj, tiamsis yuav tsum hlub txog lwm tus uas ntsib kev txomnyem, ntsuag nos, tsis muaj noj muaj haus. Yuav tsum ua zoo, muab pub thiab pab lawv… kom kev zoo siab hnub dawbhuv tsis yog tsuas tau pehawm tus Tswv xwb, tiamsis tseem zoo siab vim paub txog lwm tus kev noj nyob thiab sib pab thaum txomnyem. Zoo li tus txivneej qhuav tes hauv ntu Vajluskub no, nws zoo siab thaum tau mus pehawm tus Tswv thiab nws kuj zoo siab thaum tau tus Tswv kho zoo.
Thov Vajtswv
Tus Tswv, thov txhob cia nyuam yaus tsis hlub tshua cov neeg raug teebmeem lossis txomnyem, thov pab kom nyuam yaus yim pehawm Koj, ces yim paub hlub tshua thiab pab lwm leej lwm tus. Amees.
Peb puas ua yam zoo rau cov kwvtij ntseeg lawm tau?
Nyeem Vajluskub hauv peb lub xyoos: Exekees 10:1-11:15
Kênh Youtube BHKTHN:
