Klei Aê Diê Blŭ: Y‑Mathiơ 12:9-14
Êlan kliăng: “Leh anăn Yêsu lač kơ diñu, “Hlăm hruê sabat drei bhiăn mơ̆ ngă klei jăk amâodah klei jhat, bi mtlaih klei hdĭp amâodah bi mdjiê?” Ƀiădah diñu dôk ñăt” (Y‑Markôs 3:4)
Klei êmuh ksiêm mĭn: Hlei pô Yang Yêsu bi tuôm hlăm sang bi kƀĭn? Ya klei phung Pharisi êmuh Ñu? Si klei Yang Yêsu lŏ wĭt kơ diñu? Ya klei drei mă yua mơ̆ng klei Yang Yêsu blŭ leh anăn ngă?
Đuĕ mơ̆ng hma mdiê ƀlê, Yang Yêsu mŭt hlăm sang bi kƀĭn, tinăn mâo sa čô mnuih krô kngan, phung Pharisi lŏ êmuh Yêsu čiăng duah êlan kčŭt kơ Ñu. Diñu êmuh: “Bhiăn mơ̆ bi hlao hlăm hruê Sabat?” Diñu čiăng bi dleh Yang Yêsu, tơdah wĭt lač “hơăi” snăn Ñu srăng soh hŏng klei Ñu tuôm mtô leh kơ klei khăp, tơdah wĭt lač “bhiăn” Ñu srăng soh hŏng klei bhiăn hruê Sabat kyuadah klei bhiăn anei kruak čua knŏng dưi đru amâodah bi hlao tơdah klei hdĭp pô ruă srăng truh kơ klei djiê. Yêsu amâo lŏ wĭt lač klă ôh ƀiădah êmuh diñu kơ sa drei biăp diñu lĕ hlăm ƀăng êlam hlăm hruê Sabat, ya diñu srăng ngă? Ktŭng mă gơ̆ mtam amâodah lui êgao hruê Sabat ktŭng mă? Boh nik gơ̆, mgăt biăp phung Yuđa srăng ktŭng mă mtam tơdah biăp diñu lĕ hlăm ƀăng kyuadah diñu huĭ biăp diñu srăng huĭ leh anăn djiê, amâodah tơdah lui sui đei biăp anăn srăng jing mnơ̆ng ƀơ̆ng kơ asâo tan. Mgăt pap kơ biăp ñu amâo čiăng phung biăp ñu luč liê ôh, kyuanăn srăng ktŭng mă mtam biăp anăn wăt hlăm hruê Sabat dưn. Yêsu kñăm brei phung Pharisi hdơr, “sa čô mnuih yuôm hĭn kơ sa drei biăp! Snăn bhiăn mơh ngă jăk hlăm hruê sabat.” Leh anăn Ñu bi hlao mtam mnuih krô kngan hlăm hruê Sabat leh anăn ti sang bi kƀĭn. Phung Pharisi amâo lŏ dưi bi tăng mgăl hŏng Yêsu ôh, kăn dưi kčŭt kơ Ñu rei snăn diñu kbiă leh anăn bi trông čhai duah klei dưi bi mdjiê Yêsu.
Khua ƀĭng kna Y‑Mathiơ čih yăl dliê klei Yêsu wĭt lač klă, “bhiăn mơh ngă jăk hruê Sabat”, Y‑Markôs čih yăl dliê klei Yêsu êmuh phung Pharisi, leh anăn Ñu dlăng kơ phung anăn hŏng “klei ăl, ênguôt” (Y‑Markôs 3:5), Aê Diê brei klei bhiăn kơ phung ƀuôn sang Ñu amâo djŏ čiăng mjing diñu phung ai tiê khăng amâo thâo pap ôh. Aê Diê čiăng diñu yua hruê doh jăk pioh kkuh mpŭ kơ Aê Diê leh anăn čiăng diñu thâo bi uêñ thâo bi đru mơh hdơ̆ng diñu. Diñu khăp kơ Aê Diê, kkuh mpŭ kơ Ñu, mbĭt hŏng klei anăn brei diñu khăp kơ phung ayŏng adei leh anăn đru digơ̆.
Hruê anei, brei grăp čô drei đăm jing msĕ si phung Pharisi ôh, knŏng thâo gưt kơ klei bhiăn khăng gơ̆k, ƀiădah brei drei thâo uêñ kơ phung ayŏng amai adei mkăn dôk hlăm klei dleh dlan, êrĭt rin, kƀah knap, Ngă bĕ bruă jăk, thiê bĕ, đru bĕ… čiăng klei mơak hlăm hruê doh jăk amâo djŏ knŏng kkuh mpŭ kơ Aê Diê ôh ƀiădah wăt thâo msĕ mơh kơ klei dleh dlan phung ayŏng amai adei hlăm klei đăo čiăng dưi bi đru êjai mông dleh dlan. Msĕ si mnuih krô kngan hlăm klei yăl dliê anei, ñu mơak snăk sơưn kyuanăn ñu êbat êjai hơêč hmưi kơ Aê Diê êjai kyua Yêsu uêñ leh anăn bi hlao ñu.
Drei ngă leh mơ̆ bruă jăk kơ phung ayŏng amai adei sa klei đăo hŏng drei?
Wal lač: Ơ Khua Yang, đăm lui kâo ngă klei amâo uêñ ôh kơ klei knap mñai, klei dleh dlan phung ayŏng adei kâo, đru kâo knư̆ kkuh mpŭ kơ Ih knư̆ mơh thâo khăp, thâo uêñ, leh anăn thâo bi mbha hdơ̆ng ayŏng adei.
Dlăng Klei Aê Diê Blŭ hlăm tlâo thŭn: Y‑Êskiêl 10:1–11:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
