Klei Aê Diê Blŭ: Klei Bi Hriêng 1:22-23
Êlan kliăng: “Dôk hmư̆ klei kâo ƀuah, nĕ anei, kâo srăng tuh Mngăt Myang kâo kơ diih, kâo srăng brei diih thâo klei kâo blŭ.” (Klei Bi Hriêng 1:23)
Klei êmuh ksiêm mĭn: Ya mta klei mrâo mrang Klei Knhâo hiu hưn? Wĭt lač kơ klei iêô mthưr, ya klei srăng dưi mă tŭ? Mơ̆ng klei anei si klei bi mđĭ ai drei tui duah Khua Yang leh anăn gưt ngă hlue Klei Ñu Blŭ?
Hŏng ai tiê khăp leh anăn ruă ênguôt kyua phung mnuih soh, Klei Knhâo hưn êdah klei ƀuah khăng ktang – “Ơ phung mluk, dŭm boh sui diih srăng khăp jing mluk?… mơak hŏng klei mưč… bi êmut kơ klei thâo mĭn?” (êlan 22), ƀiădah mbĭt hŏng anăn jing klei iêô mthưr bŏ hŏng klei kwưh akâo – “Dôk hmư̆ klei kâo ƀuah, nĕ anei,” (êlan 23a). Klei Aê Diê čang guôn nanao jing phung mnuih soh “lŏ wĭt” hŏng Ñu, wir đuĕ kơ klei hdĭp hđăp, anăn yơh jing klei mblang yuôm hĭn kơ klei kmhal kơ klei soh. Khua Yang amâo tui duah mnuih jăk klă amâodah ênuah ênô kluôm ênŭm ôh “kyuadah jih jang mnuih soh leh sơăi, leh anăn amâo tơl mâo klei guh kơang Aê Diê ôh” (Rô-ma 3:23), ƀiădah Ñu tui duah phung mnuih amâo ai tiê thâo kmhal, wĭt lač kơ klei Ñu iêô mthưr (Y‑Luk 15:7). “Lŏ wĭt” amâodah kmhal amâo djŏ jing klei bluh ai tiê ôh, ƀiădah jing sa klei čuăn kơ klei hdĭp.
Mâo dua klei ƀuăn yuôm pioh kơ pô mđing hmư̆ Klei Aê Diê Blŭ leh anăn tŭ ư “lŏ wĭt” hŏng Ñu. Klei ƀuăn tal sa, “Dôk hmư̆ klei Kâo ƀuah, nĕ anei, Kâo srăng tuh mngăt Myang Kâo kơ diih”. Mă tŭ “mngăt myang” mơ̆ng Aê Diê jing klei dưi lŏ mjing mnuih mrâo, mâo klei lŏ kkiêng mrâo (Klei Mphŭn Dơ̆ng 1:2), jing mă tŭ klei bi mlih mrâo, klei bi mlih mơ̆ng hlăm lam (II Kôrantô 5:17), leh anăn mă tŭ Yang Mngăt Jăk jing Yang Klei Sĭt Nik (Y‑Yôhan 14:16-17). Klei ƀuăn tal dua, “Dôk hmư̆ klei Kâo ƀuah, nĕ anei,… kâo srăng brei diih thâo klei kâo blŭ”. Hlăk drei êran nao kơ Khua Yang, hŏng klei luă gŭ kmhal kơ klei soh, snăn Khua Yang brei drei “thâo” Klei Ñu Blŭ. Boh blŭ “thâo” mblang jing “klei dôk hŏng” hlăm Klei Mphŭn Dơ̆ng 4:1: “Y‑Ađam dôk hŏng H’ Êwơ, mô̆ ñu”. Blŭ mdê, tơdah drei luă gŭ êran nao kơ Aê Diê, Ñu srăng brei Klei Sĭt Nik amâo djŏ knŏng jing klei mĭn, klei thâo săng ôh, ƀiădah bi hlai mŭt jing sa hlăm klei hdĭp drei, hlăk anăn drei srăng thâo săng Klei Aê Diê Blŭ hŏng klei mrâo mrang, leh anăn Klei Ñu Blŭ srăng bi mlih drei.
Drei dưi “thâo” Klei Aê Diê Blŭ hŏng si êlan? Hŏng “Mngăt Myang” Aê Diê tuh ti dlông drei. Brei drei hdơr Mngăt Myang Aê Diê leh anăn Klei Ñu Blŭ nao mbĭt nanao, amâo dưi bi ktlah ôh (Êphêsô 5:18-19). Blŭ mdê, amâo mâo Yang Klei Sĭt Nik snăn drei amâo dưi thâo săng ôh Klei Sĭt Nik.
Thâo kral klei Khua Yang čiăng hŏng klei Ñu iêô mthưr hŏng klei kwưh, brei drei êran nao kơ Aê Diê leh anăn ksiêm hriăm Klei Ñu Blŭ hŏng klei luă gŭ, mđing hmư̆ klei mtô bi hriăm, bi êdah mơ̆ng Yang Mngăt Jăk (I Têsalônik 5:19-21; Êphêsô 4:30). Anăn yơh jing klei duh knhâo thâo mĭn kơ grăp čô drei.
Si ngă drei wĭt lač kơ klei Khua Yang iêô mthưr drei “lŏ wĭt” hŏng Ñu leh mơ̆?
Wal lač: Ơ Khua Yang, bi mni kơ Ih kyua klei jăk, klei sĭt suôr Ih pioh leh kơ kâo. Akâo Ih brei kâo thâo kral klei jăk Ih leh anăn wĭt lač kơ Klei Ih Blŭ hŏng klei luă gŭ leh anăn đup gưt.
Dlăng Klei Aê Diê Blŭ hlăm tlâo thŭn: Klei Čŏk Hia 3:58–4:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
