Klei Aê Diê Blŭ: Klei Bi Hriêng 1:8
Êlan kliăng: “Anak kâo, dôk hmư̆ bĕ klei ama ih bi hriăm ih, leh anăn đăm hngah hĕ ôh klei amĭ ih mtô” (Klei Bi Hriêng 1:8)
Klei êmuh ksiêm mĭn: Hlei pô mâo bruă klam mtô lač kơ phung anak? Ya jing boh phŭn kơ klei mtô lač? Si bruă klam kơ phung anak wĭt ngă hŏng klei amĭ ama mtô lač? Ya mta klei brei drei duh kơ drei pô čiăng dưi mtô lač bi djŏ kơ phung anak?
Hdruôm hră Klei Bi Hriêng kñăm kơ klei mtô lač čiăng kơ pô răk dlăng hră thâo kral Pô Thâo Mĭn leh anăn čiăng dưi dôk hdĭp thâo mĭn. Sa hlăm klei kñăm phŭn hlăm hdruôm hră anei jing klei mtô kơ bruă klam mtô lač kơ phung anak leh anăn bruă klam phung anak hlăm klei mđing hmư̆ klei mtô lač.
Êlan Klei Bi Hriêng hruê anei mtô kơ drei tlâo klei sĭt nik yuôm. Tal sa, mtô lač kơ phung anak jing sa bruă klam kơ ama wăt kơ amĭ, jih dua mâo bruă klam leh anăn klei dưi msĕ sơăi. Mtao Salômôn lač leh kơ “klei ama ih bi hriăm ih” leh anăn “klei amĭ ih mtô”. Hlăm lu gŏ sang, wăt hlăm gŏ sang phung đăo, knŏng hjăn amĭ amâodah hjăn ama gui klam bruă yuôm anei, leh anăn jing klei ênguôt êdi, diñu klam hjăn pô klei ktrŏ suăi bruă mtô lač kơ phung anak čiăng bi djŏ hdră. Lač kơ bruă klam hlăm gŏ sang hlăm klei mtô lač phung anak, sa čô pô đăo čih hdruôm hră leh anăn mtô mblang, Chuck Colson lač snei: “Amâo mâo gŏ sang, phung anak drei amâo srăng mâo atur klei hdĭp ênuah ênô ôh leh anăn srăng jing mnuih amâo mâo klei mtô lač kơ hdĭp ênuah ênô ôh. Gŏ sang jing sang hriăm tal êlâo hĭn kơ mnuih Aê Diê jao.”
Tal dua, boh blŭ “klei bi hriăm” (instruction) hlăm klei blŭ phŭn čiăng jŭm wăt klei mđăo mkra, bi kmhal leh anăn bi mjuăt hlue klei bhiăn, bi êdah kơ sa knhuang tŭ klei ruă suăi čiăng dưi mă tŭ klei thâo săng. Tŭ ư hdĭp tui hlue klei mtô lač thâo mĭn mâo ênoh brei tla nanao leh anăn tŭ klei ruă klei suăi yơh ƀiădah ti knhal tuč ba boh tŭ jăk siam.
Tal tlâo, boh blŭ “klei mtô” (law, teaching) čiăng lač mâo klei bhiăn (precept) amâodah klei čoh čuăn (statute), leh anăn boh nik nak hŏng phung Israel boh blŭ anei lač kơ Pluh Mta Klei Bhiăn (Decalogue) amâodah Êma Pŏk hdruôm hră Klei Aê Diê Blŭ tal êlâo (Pentateuch). Snăn kñăm phŭn kơ klei mtô lač jing Klei Aê Diê Blŭ. Mtô lač leh anăn bi hriăm mjuăt phung anak amâo lŏ mâo klei mkăn mdê hĭn kơ klei atăt diñu nao kơ Aê Diê leh anăn kơ Klei Ñu Blŭ, leh anăn dôk hdĭp tui si hnơ̆ng čuăn Klei Aê Diê Blŭ.
Ƀiădah lĕ, phung anak ăt mâo mơh dua bruă klam hlăm klei lŏ wĭt ngă. Tal sa jing “hmư̆”, mblang tui si klei blŭ phŭn jing hmư̆ hŏng klei ksiêm, thâo săng, leh anăn gưt asăp. Klei mtă “hmư̆” ƀuh truh kơ 12 blư̆ hlăm hdruôm hră Klei Bi Hriêng, leh anăn mâo truh kơ 8 blư̆ hlăm 9 kdrêč tal êlâo. Tal dua jing “đăm hngah”, amâo djŏ ôh leh hmư̆ dưm hĕ ti êngao ƀăng knga ƀiădah brei gưt ngă hlue. Snăn, hmư̆ leh anăn gưt ngă hlue jing dua knhuang amâo dưi bi ktlah ôh čiăng dưi mâo klei đĭ hriê kơ prŏng (Y‑Yôhan 13:17; Y‑Yakơ 1:19, 22).
Klah čŭn, čiăng dưi bi leh kluôm ênŭm bruă klam yuôm mtô lač phung anak, bruă klam kơ phung amĭ ama brei duh kơ klei hdĭp diñu pô hŏng klei ksiêm hriăm Klei Aê Diê Blŭ, mơ̆ng anăn mtô lač Klei Aê Diê Blŭ kơ phung anak, čiăng kơ phung anak lŏ duh kơ klei hdĭp diñu pô hŏng Klei Aê Diê Blŭ mơh.
Ya jing klei kñăm phŭn drei mtô lač kơ phung anak drei?
Wal lač: Ơ Khua Yang, akâo Ih đru kâo grăp hruê mđing hmư̆ leh anăn ksiêm hriăm Klei Aê Diê Blŭ, čiêm rông leh anăn duh kơ klei hdĭp kâo hŏng Klei Blŭ Ih, hŏng klei anăn kâo dưi yua Klei Ih Blŭ pioh mtô lač kơ phung anak leh anăn kơ phung Khua Yang jao brei kâo răng kriê.
Dlăng Klei Aê Diê Blŭ hlăm tlâo thŭn: Klei Čŏk Hia 1:16–2:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
