Yaxayas 9:1-6
Nqe cim:
“Nws lub npe yuav hu ua “Tus Tuavxam tus uas muaj Txujci”, “Vajtswv tus muaj hwjchim”, “Vaj Leej Txiv tus uas nyob mus ibtxhis,” “Vajntxwv tus uas muaj kev thajyeeb.” (Yaxayas 9:6b).
Lus nug rau sawvdaws xav:
- Cov lus cev hais txog tus menyuam los yug rau lub tsamthawj twg? (saib tshooj 7-8)?
- Tus menyuam muaj cov npe hu li cas?
- Cov npe ntawd muaj lub ntsiab li cas rau lub tsamthawj Vajntxwv Ahas kav?
- Cov npe no ua rau peb tau yam dabtsi?
Xyoo 735 U.Y, Ahas los ua vajntxwv kav cov Yudas. Ntxab ntxawm qhov nyuam qhuav ua vajntxwv kav tebchaws, ob tug vajntxwv kav tebchaws Xilias thiab Yixalayees uas hu ua Lexees thiab Lemaliyas hais kom Vajntxwv Ahas koom nrog lawv tawmtsam lub tebchaws Axilias. Vim nyob qab tswjhwm ntawm cov Axilias, Vajntxwv Ahas tsis kam nrog lawv, yog li ntawd Vajntxwv Lexees thiab Lamaliyas tso tubrog tuaj tua cov Yudas. Thaum paub hais tias lawv tuaj, “Ahas thiab nws cov pejxeem lub siab tshee laim dais ib yam li cua ntsawj tej nplooj ntoo hauv hav zoov.” (Yaxayas 7:2). Txawm yog Vajntxwv Ahas yog tus vajntxwv ua phem kawg nkaus, los vim tus Tswv txojkev hlub Daviv cajces, tus Tswv thiaj txib tus cevlus Yaxayas tuaj txhawb zog hais tias: Tej xwm no yuav tsis tshwmsim ib zaug li, ob lub tebchaws ntawd yuav puastsuaj (Yaxayas 7:7-9). Tus Tswv siv ib lub cim los qhia rau Vajntxwv Ahas thiab Nws haivneeg paub tias qhov uas Nws hais yeej muaj tseeb: Muaj ib tug nkaujxwb yuav yug ib tug metub, Nws lub npe hu ua “Tus Tuavxam tus uas muaj Txujci”, “Vajtswv tus muaj hwjchim”, “Vaj Leej Txiv tus uas nyob mus ibtxhis,” “Vajntxwv tus uas muaj kev thajyeeb.” (nqe 6b).
Cov lus cev hais txog tus menyuam uas muaj cov npe hu li ntawd muaj qabhau dabtsi rau tus Tswv haivneeg lub sijhawm ntawd? Lub sijhawm raug kev nyuaj siab thaum Lexees thiab Lamaliyas tuaj tua, twb tsimnyog thov Vajtswv los Vajntxwv Ahas thiab cov pejxeem tseem sib nug “cia li mus nug cov neeg saib hmoov thiab saib yaig” (Yaxayas 8:19). Nyob rau lub tsamthawj zoo li ntawd, lub npe “Tus Tuavxam tus uas muaj Txujci”, lossis “Txawj Qhia Kawg Nkaus” ntawm tus Mexiyas yog ib qhov kev txhawb zog cheemtsum heev. Tus Tswv haivneeg cheemtsum ib tug Tuavxam muaj Txujci, thiab yuav nrhiav tsis muaj ib tug zoo li tus menyuam no lawm. Tom qab no, Timthawj Paulus hais txog Yexus Khetos hais tias, “lub txhab tswvyim thiab kev txawj ntse txhua yam muab zais rau hauv Nws” (Kaulauxais 2:3 – HMOWSV).
Lo lus “hwjchim” hauv lub npe “Vajtswv tus muaj hwjchim” yog hais txog lub zog loj zog nchav muaj yeej. Tus uas los kav tsis yog Txawj Qhia Kawg Nkaus xwb, Nws tseem yog tus thawj tubrog muaj zog loj zog nchav thiab. Yaxayas hais tias Tus Uas Kav ntawd, Nws yog Leej Txiv nyob mus ibtxhis rau Nws haivneeg. Leej Txiv muaj tswvyim thiab muaj zog loj zog nchav coglus yuav pub rau Nws haivneeg tus Vajntxwv uas muaj kev thajyeeb”.
Nyob rau lub tsamthawj tebchaws nyob ntxhov hnyo thiab tsaus ntuj nti zoo li ntawd, cov npe tis rau tus menyuam yuav ua rau lawv muaj kev cia siab thiab tabpov ruaj khov thaum raug tej kev txhawj ntshai ntawd. Thov Vajtswv muab cov npe no ua rau peb muaj kev cia siab ruaj khov thaum peb tseem nyob lub ntiajteb puv npho tej kev nyuaj siab no.
Thov Vajtswv,
Nyuam yaus tus Tswv uas Tuavxam muaj Txujci, Koj yog Vajtswv tus muaj hwjchim, yog Leej Txiv nyob mus ibtxhis, tus Vajntxwv muaj kev thajyeeb. Thov Koj pab kom nyuam yaus ua neej raws li cov npe tis rau Koj hauv nyuam yaus lub neej rau lub koobtsheej xyoo no. Amees.
Lub npe twg ntawm tus menyuam tabtom pab tau koj lub neej?
Nyeem Vajluskub hauv peb lub xyoos: Yelemis 45:1-46:19
Kênh Youtube BHKTHN:
