Klei Aê Diê Blŭ: Y‑Êsai 9:2-7
Êlan kliăng: “Leh anăn arăng srăng pia anăn ñu, Pô Yuôm Bhăn, Khua Kčĕ, Aê Diê Myang, Ama Dôk Hdĭp Hlŏng Lar, Khua kơ Klei Êđăp Ênang” (Y‑Êsai 9:6b)
Klei êmuh ksiêm mĭn: Klei hưn êlâo kơ Hđeh điêt arăng kkiêng hlăm si boh klei (dlăng kdrêč 7-8)? Ya arăng pia anăn hđeh điêt anăn? Ya klei yuôm bhăn dŭm anăn pia anăn hlăm boh klei ênuk mtao Ahas? Ya klei anăn pia anei kơ drei?
Thŭn 735 êlâo kơ Krist, Y‑Ahas đĭ ngă mtao Yuđa. Bi mjhua dŭm hruê tal êlâo mphŭn kiă kriê, dua čô mtao Syria leh anăn Israel jing Y‑Rêsin leh anăn Y‑Pêka mgô̆ mtao Ahas bi mguôp hŏng pô čiăng bi kdơ̆ng hŏng mtao Asiri dôk ktang. Kyua adôk lu mnơ̆ng myơr leh anăn jưh knang kơ Asiri anăn mtao Ahas hngah, kyua anăn Mtao Y‑Rêsin leh anăn Y‑Pêka blah Yuđa. Leh hmư̆ klei anăn, “ai tiê Y‑Ahas wăt ai tiê phung ƀuôn sang ñu ktư̆ yơ̆ng msĕ si kyâo hlăm kmrơ̆ng mgei hŏng angĭn” (Y‑Êsai 7:2). Wăt tơdah Mtao Ahas jing mtao ƀai, ƀiădah kyua klei sĭt suôr Aê Diê hŏng Sang Y‑Đawit, Aê Diê ăt tiŏ nao Khua pô hưn êlâo Y‑Êsai nao bi juh snei: Đăm huĭ kơ êpul anăn kyua klei arưp anăn amâo srăng jing ôh, dua ala čar anăn srăng rai (Y‑Êsai 7:7-9). Aê Diê yua leh sa klei bi knăl čiăng đru kơ Mtao Ahas leh anăn phung ƀuôn sang Aê Diê thâo klei Ñu lač srăng jing sĭt: Sa čô mniê êra hrông srăng kkiêng sa čô anak êkei, anăn pia anak êkei anăn jing “Pô Yuôm Bhăn, Khua Kčĕ, Aê Diê Myang, Ama Dôk Hdĭp Hlŏng Lar, Khua kơ Klei Êđăp Ênang” (êlan 6b).
Ya klei yuôm bhăn klei hưn êlâo kơ Hđeh điêt hŏng anăn pia anăn hŏng phung ƀuôn sang hlăk anăn? Hlăm klei rŭng răng kyua tlă anăp hŏng klei ksŭng ngă êpul bi hgŭm Y‑Rêsin – Y‑Pêka, hrô kơ êmuh Aê Diê, Mtao Ahas leh anăn phung ƀuôn sang bi lač “ksiêm êmuh kơ phung blŭ hŏng phung djiê leh anăn kơ phung mdian” (Y‑Êsai 8:19). Ti anăp klei anăn, anăn pia “Khua Kčĕ”, amâodah “Pô Đru Kčĕ yuôm bhăn” mơ̆ng Yang Mêsi jing sa klei mđĭ ai čiăng snăk. Phung ƀuôn sang Aê Diê dôk čiăng sa čô mnuih đru kčĕ êdah êdi, leh anăn srăng amâo dưi ƀuh pô mkăn ôh êngao kơ Hđeh điêt anei. Êdei anei, Khua ƀĭng kna Y‑Pôl lač kơ Krist snei, “Jih jang hjiê klei thâo mĭn leh anăn klei thâo săng mdăp leh hlăm Ñu” (Kôlôs 2:3).
Boh blŭ “Myang” hlăm anăn pia “Aê Diê Myang” jing boh blŭ lač kơ klei ktang hlăm klei bi blah. Pô kiă kriê ƀuăn srăng brei amâo djŏ knŏng jing sa čô Khua Kcĕ Yuôm Bhăn Ôh, Ñu lŏ jing sa khua kahan bŏ hŏng klei ktang. Khua pô hưn êlâo Y‑Êsai lač Pô Kiă Kriê anăn amâo djŏ jing Pô ngă ngơi mang hŏng phung ƀuôn sang ôh ƀiădah Ñu jing Ama, amâo djŏ knŏng dôk giăm anak sa wưng bhiâo ôh, ƀiădah jing “Ama Hlŏng Lar”. Ama thâo mĭn leh anăn ktang Aê Diê ƀuăn brei kơ phung ƀuôn sang Ñu jing “Khua kơ Klei Êđăp Ênang”.
Hlăm boh klei kđi čar rŭng răng leh anăn mmăt tĭt anăn, dŭm anăn pia hđeh điêt klă sĭt ba klei rơ̆ng leh anăn klei čang hmăng kơ phung ƀuôn sang dôk rŭng răng, huĭ hyưt. Akâo kơ Aê Diê brei dŭm anăn pia anei ăt ba klei čang hmăng prŏng kơ drei sĭt dôk hdĭp ti krah lăn ala rŭng răng anei.
Ti anăn pia mơ̆ng Hđeh điêt hlăk dôk mâo hlăm klei hdĭp drei?
Wah lač: Ơ Pô Đru Kčĕ Yuôm Bhăn, Aê Diê Myang, Ama Hlŏng Lar, Khua kơ Klei Êđăp Ênang, akâo kơ Ih đru kâo ƀuh anăn pia Ih mâo sĭt hlăm klei hdĭp kâo, boh nik jing hlăm yan bi hdơr hruê Noel thŭn anei.
Dlăng Klei Aê Diê Blŭ hlăm tlâo thŭn: Y‑Yêrêmi 45:1–46:19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
