Henplais 4:14-16
Nqe cim:
“Yog li ntawd, peb cia li ua siab tawv qhawv mus cuag Vajtswv tus uas zaum saum lub Zwmtxwv, rau qhov Nws yog tus uas hlub peb. Nws yuav pab peb thiab foom koob hmoov rau txhua tus uas thov Nws.” (Henplais 4:16).
Lus nug rau sawvdaws xav:
- Tswv Yexus yog tus Povthawj Hlob zoo li cas rau peb?
- Vim li cas cov ntseeg Yexus ua tau siab tawv qhawv mus cuag Vajtswv?
Tiam Vajluskub Qub, tus povthawj sawvcev ntawm cov pejxeem mus cuag Vajtswv. Povthawj tsuas yog sawvcev rau ib tug neeg lossis ib pab neeg, tiamsis tus povthawj hlob sawvcev tagnrho cov pejxeem, thiab muaj cai mus rau hauv Chav Dawbhuv Kawg Nkaus hauv lub Tsevntaub lossis Tuamtsev ib xyoos twg ib zaug. Lub hau phijxab yog qhov chaw tus Tswv nyob thiab muaj dua ib lub npe hu ua “Qhov Chaw Hlub”. Tus uas sau phau Henplais hais tias cov ntseeg Yexus tsis yog muaj povthawj hlob xwb, tiamsis tseem muaj “tus Povthawj Hlob uas twb mus cuag Vajtswv lawm, tus ntawd yog Vajtswv tus Tub Yexus”. Tswv Yexus yog peb tus Povthawj Hlob muaj hwjchim, vim:
Tim ib, cov Yixalayees cov povthawj hlob tsuas tau cai mus cuag Vajtswv ib xyoos twg ib zaug xwb, tiamsis nimno Tswv Yexus tabtom “nyob ntawm Vajtswv sab xis thiab thov Vajtswv pab peb.” (Loos 8:34b). Nws nrog Vajtswv nyob thiab thov Vajtswv pab rau Nws cov menyuam. Tim ob, tus uas sawvcev yuav tsum yog totaub, paub cov neeg uas nws sawvcev ntawd. Thiab qhov uas zoo heev mas yog “peb tus Povthawj Hlob yeej paub tej uas peb qaug zog, rau qhov nws twb raug kev dag ntxias ib yam li peb los lawm. Txawm li ntawd los nws tsis tau ua ib qho txhaum li.” (Henplais 4:15). Cia kom sawvcev rau tibneeg, totaub thiab ua siab ntev rau neeg, Tswv Yexus tus uas yog Vajtswv Leej Tub los hauv ntiajteb no ua neeg, yug los ntawm ib tug nkaujxwb, Nws raug tej kev nyuaj siab, zoo siab, kuj ntsib tej kev sim siab zoo ib yam li peb. Yog li Nws paub txhua yam uas tibneeg cheemtsum.
Muaj ib tug Povthawj Hlob muaj hwjchim loj thiab zoo kawg nkaus li ntawd, “peb cia li ua siab tawv qhawv mus cuag Vajtswv”. Mus ntsib vajntxwv xwb twb ntshai, tseem hais mus cuag Vajtswv tus uas dawbhuv, muaj hwjchim mas haj ntshai dua. Tiamsis vim muaj Tswv Yexus yog tus Povthawj Hlob, peb “ua siab tawv qhawv” mus cuag Nws. Ntawm Tswv Yexus txojkev tuag, daim ntaub quas peb thiab Vajtswv raug muab tshem lawm. Yog li, peb cia li ua siab tawv qhawv mus cuag Vajtswv “kom peb thiaj tau txais txojkev khuvleej thiab ntsib txojkev hlub uas pab tau rau thaum peb cheemtsum” (nqe 16 HMOWSV).
Thov Vajtswv,
Tswv Yexus, Koj yog nyuam yaus tus Povthawj Hlob, Koj niaj hnub thov Vajtswv pab nyuam yaus thiab paub nyuam yaus lub siab. Thov Koj pab kom nyuam yaus vamkhom Koj thaum mus cuag Leej Txiv kom tau txais koob hmoov. Amees.
Yam dabtsi tabtom ua rau peb ua tsis tau siab tawv qhawv mus cuag Vajtswv?
Nyeem Vajluskub hauv peb lub xyoos: Yelemis 33:10-34:7
Kênh Youtube BHKTHN:
