Klei Aê Diê Blŭ: Hêbrơ 4:14-16
Êlan kliăng: “Snăn hŏng klei jhŏng brei drei nao giăm kơ jhưng mtao klei pap, čiăng kơ drei dưi mă tŭ klei jăk leh anăn mâo klei pap đru drei djŏ mông êjai drei mâo klei kƀah.” (Hêbrơ 4:16)
Klei êmuh ksiêm mĭn: Si klei Khua Yang Yêsu jing Khua Ngă Yang Prŏng Hĭn kơ drei? Si ngă phung đăo dưi mâo klei jhŏng nao giăm jhưng mtao klei pap?
Ênuk Klei Bi Mguôp Hđăp, Khua Ngă Yang bi ala kơ phung ƀuôn sang nao ti anăp Aê Diê. Khua Ngă Yang yang đar knŏng bi ala kơ sa čô mnuih amâodah kơ sa êpul mnuih, knŏng hjăn Khua Ngă Yang Prŏng kơh dưi mŭt hlăm Adŭ Doh Jăk Hĭn hlăm Sang čhiăm amâodah Sang Yang grăp thŭn sa blư̆. Kđhăp Hip Klei Bi Mguôp jing kđhăp klei pap brei, bi hmô kơ jhưng mtao Aê Diê ti lăn ala leh anăn pia jing “Jhưng Mtao Klei Pap”. Pô čih hră Hêbrơ hưn mdah, phung đăo amâo djŏ knŏng mâo sa čô Khua Ngă Yang Prŏng tui si yang đar, ƀiădah mâo sa “Khua Ngă Yang Prŏng Hĭn găn leh jih adiê, Yêsu, Anak Aê Diê”. Khua Yang Yêsu jing Khua Ngă Yang Prŏng Hĭn kơ drei kyuadah mâo dua mta phŭn snei:
Tal sa, êjai phung Khua Ngă Yang Prŏng phung Israel knŏng mâo klei dưi mŭt hlăm anôk Aê Diê dôk grăp thŭn sa blư̆, bi ară anei Khua Yang Yêsu “dôk tĭng hnuă kơ Aê Diê, leh anăn đru wah lač brei kơ phung drei” (Rôm 8:34b). Ñu dôk mbĭt hŏng Aê Diê nanao kăp wah lač brei kơ phung anak ƀuôn sang Ñu. Tal dua, sa klei čoh čuăn yuôm kơ pô bi ala jing brei ñu thâo săng kơ phung ñu bi ala brei. Leh anăn jing sa klei tloh ênoh “Khua Ngă Yang Prŏng drei amâo djŏ jing sa čô amâo dưi pap klei awăt drei, ƀiădah Ñu pô tuôm leh hŏng djăp mta klei mplư msĕ si drei, ƀiădah Ñu amâo ngă soh ôh.” (Hêbrơ 4:15). Čiăng bi ala brei kơ anak mnuih, thâo săng leh anăn pap brei kơ anak mnuih, Khua Yang Yêsu, Anak Aê Diê, hriê leh ti lăn ala jing mnuih, kkiêng mơ̆ng sa čô mniê, găn leh djăp mta klei ênguôt klei mơak ti lăn ala, wăt găn djăp mta klei lông dlăng msĕ si drei. Kyuanăn Ñu thâo săng jih djăp mta klei kƀah leh anăn si ai tiê anak mnuih jing.
Mâo sa čô Khua Ngă Yang Prŏng Hĭn leh anăn tloh ênoh msĕ snăn, drei mâo djăp klei dưi “hŏng klei jhŏng nao giăm jhưng mtao klei pap”. Hin snăk mâo sa čô mnuih nao ti anăp mtao hŏng klei kjăp ai tiê, hĭn êjai nao ti anăp Aê Diê doh jăk, bŏ hŏng kơhưm. Ƀiădah kyua mâo Khua Yang Yêsu jing Khua Ngă Yang Prŏng Hĭn, drei dưi “kjăp ai tiê” nao giăm Ñu. Hŏng klei Khua Yang Yêsu djiê leh, čhiăm bi kgăn drei hŏng Aê Diê kơhiêk lui leh. Kyuanăn, brei drei jhŏng nao giăm jhưng mtao klei pap “čiăng kơ drei dưi mă tŭ klei jăk leh anăn mâo klei pap đru drei djŏ mmông êjai drei mâo klei kƀah” (êlan 16).
Ya klei dôk bi kgăn drei jhŏng nao giăm jhưng mtao klei pap Khua Yang?
Wah lač: Bi mni kơ Khua Yang Yêsu kyuadah Ih jing leh Khua Ngă Yang Prŏng Hĭn kơ kâo, wah lač brei kơ kâo nanao ti anăp Aê Diê Ama leh anăn thâo săng djăp mta klei hlăm ai tiê kâo wăt hlăk amâo mâo pô thâo săng kơ kâo ôh. Akâo Ih brei kâo grăp hruê hŏng Ih dưi jhŏng nao giăm Ama čiăng dưi mă tŭ klei pap đru brei.
Dlăng Klei Aê Diê Blŭ hlăm tlâo thŭn: Y‑Yêrêmi 33:10–34:7
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
