Pajlug 17:5
Lus nug rau sawvdaws xav:
- Vajntxwv Xalumoos ceebtoom licas rau tus neeg muaj cwjpwm tsis hlub, saib tsis tau cov neeg pluag?
- Qhov twg thiaj yog tus cwjpwm uas tsimnyog peb yuav tsum muaj rau cov neeg pluag nyob puag ncig yus?
Cov neeg Yudais muaj ib nqe lus hais li no: “Yuav ntiab tau tus neeg thov khawv, cheemtsum ib tug neeg npluanuj”. Vim li cas qee tus neeg npluanuj pheej muaj lub siab ua saib tsis taus lossis ntxub cov neeg pluag? Tej zaum yog qhia tshwm lub siab khavtheeb hais tias nws yog tus ua tau txhua yam. Lossis cov neeg npluanuj nimno pheej nrhiav kev tso siab rau lawv lub peevxwm xwb tsis vamkhom Vajtswv li, yog li cov neeg ntawd tsuas yog hais txog kev muaj nyiaj, khav lawv tej khoom tsis hmov tshua cov neeg pluag.
Txawm yog li ntawd los, ntau leej yeej muaj tus cwjpwm ua saib tsis taus cov neeg pluag tabmeeg Vajtswv, Vajntxwv Xalumoos hais tias: “Yog koj saib tsis taus cov neeg pluag, ces yog koj tuam mom Vajtswv tus uas tsim lawv.” Lo lus “saib tsis taus” txhais tau hais tias yog ua thiab hais tsis zoo lwm tus los ntawm qhov thuam thiab saib luag zoo li yeebncuab. Lo lus “pluag” no tsis yog vim tub nkeeg tiamsis yog vim “raug kev txomnyem”. Txawm yog muaj cov “pluag” vim tub nkeeg los tus Tswv Txojlus tsuas ntuas kom lawv hloov ua neeg nquag xwb tsis “luag” lawv plig thiab tsis thuam lawv.
Tagnrho txhua tus tibneeg, leej cov neeg “pluag”, puavleej yog Vajtswv tsim. Yog li tej lus hais thiab ua saib tsis taus lawv, tsis yog ua “saib tsis taus cov neeg pluag”, tiamsis “yog…tuam mom Vajtswv tus uas tsim lawv.”. Dua li ntawd, ua saib tsis taus ib tug neeg poob qis lossis thuam lawv pluag yog tsis lees yuav Vajtswv tus uas tsim neeg txojkev tsomkwm. Hais ua lwm seem lus, muaj tus cwjpwm tsis zoo rau cov neeg pluag qhia paub tus neeg ntawd txojkev ntseeg Vajtswv. Peb pom meej qhov no raws li zaj lus pivtxwv tus neeg npluanuj thiab Laxalus hauv Lukas 16:19-31. Tus neeg npluanuj tsis hlub thiab thuam Laxalus yog nqi zog ntawm lub neej tsis ntseeg “Mauxes thiab tus cevlus”. Dhau qhov no, Vajntxwv Xalumoos kuj ceebtoom hais tias: “Yog koj luag tus uas raug kev txomnyem plig, koj yuav raug txim.” Yog Vajtswv menyuam, peb raug hu los ua neeg muaj kev hlub, “Thaum muaj neeg zoo siab, nej cia li nrog lawv zoo siab; thaum muaj neeg quaj ntsuag, nej cia li nrog lawv quaj ntsuag. Nej yuav tsum koom ua ib lub siab. Nej tsis txhob khavtheeb, yog luag kom nej ua tej haujlwm uas tsis tseemceeb pestsawg los nej cia li ua. Tsis txhob xav hais tias nej yog neeg txawj ntse.” (Loos 12:15-16). Tus Tswv xav kom peb tsis txhob ua limhiam rau ib tug neeg twg thaum lawv tabtom raug kev txomnyem. Thiab kuj tsis txhob khavtheeb thaum pom lwm tus ua tsis tau. Cia li ua neeg muaj kev hlub zoo ib yam li tus Tswv uas hlub peb.
Thov Vajtswv,
Tus Tswv, thov Koj pab kom nyuam yaus ua tau lub neej muaj kev hlub zoo li tus Tswv Koj hlub, nyuam yaus txaus siab hlo muab tej uas Koj pub pab rau tus pluag. Amees.
Puas muaj ib zaug twg peb luag, thaum lwm tus nyuaj siab thiab lub neej poob qis?
Nyeem Vajluskub hauv peb lub xyoos: Yelemis 29
Kênh Youtube BHKTHN:
