Klei Aê Diê Blŭ: Klei Bi Hriêng 17:5
Êlan kliăng: “Hlei pô mưč kơ mnuih ƀun ƀin dlao wač kơ Pô Mjing gơ̆, hlei pô mơak kyua klei knap mñai truh amâo srăng tlaih kơ klei bi kmhal ôh. (Klei Bi Hriêng 17:5)
Klei êmuh ksiêm mĭn: Ya klei huĭ hyưt srăng truh, mtao Salômôn hưn êlâo brei răng kơ knhuah hdĭp amâo mđing uêñ, mưč mač kơ mnuih ƀun ƀin? Si knhuah hdĭp brei drei mâo hŏng phung knap mñai hdĭp jŭm dar drei?
Mâo sa êlan klei duê phung Israel lač snei: “Čiăng suôt mđuĕ phung ƀun ƀin, brei mâo sa čô mnuih mdrŏng”. Ya ngă mâo đa phung mdrŏng mưč amâodah bi êmut kơ phung mnuih ƀun ƀin? Năng ai bi êdah klei diñu mgao mĭndah hjăn diñu yơh dưi ngă djăp mta klei. Amâodah phung mdrŏng ti lăn ala anei ƀuh mâo klei hơĭt ênang hŏng ngăn drăp diñu pô, amâo djŏ hlăm Aê Diê ôh, kyuanăn diñu khăng răng mgang prăk kăk, ngăn drăp diñu ti anăp klei phung mnuih ƀun ƀin kwưh akâo.
Ƀiădah lĕ, lu mnuih amâo ƀuh ôh knhuah hdĭp diñu hŏng mnuih ƀun ƀin bi êdah knuih jing diñu hŏng Aê Diê, msĕ si klei blŭ mtao Salômôn mtô leh: “Hlei pô mưč kơ mnuih ƀuh ƀin dlao wač kơ Pô Mjing gơ̆”. Boh blŭ “mưč” mblang jing ksŭng bi kdơ̆ng leh anăn knhuah hdĭp dlăng kơ arăng hơăi mang leh anăn mưč mač msĕ hŏng kơ phung roh. Boh blŭ “ƀun ƀin” tinei amâo djŏ kyua alah mă bruă ôh ƀiădah kyua “klei knap mñai truh”. Ƀiădah lĕ, wăt tơdah sa čô mnuih “ƀun ƀin” kyua klei diñu alah mă bruă, Klei Aê Diê Blŭ ăt knŏng ƀuah čiăng kơ diñu mâo klei bi mlih, kăn “mơak” leh anăn “mưč” diñu rei.
Jih jang mnuih, wăt phung “mnuih ƀun ƀin”, jing mnơ̆ng Aê Diê hrih mjing tui si rup Pô Hrih Mjing sơăi. Kyuanăn, klei pô mưč blŭ leh anăn klei ngă amâo djŏ knŏng hŏng “mnuih ƀun ƀin” ôh ƀiădah wăt jing “dlao wač kơ Pô Hrih Mjing gơ̆”. Êgao hĭn mơh, mưč sa čô mnuih kyua anôk bruă amâodah ngăn prăk digơ̆ ăt jing klei hngah kơ klei Pô Hrih Mjing kiă kriê mơh. Blŭ mdê, knhuah sa čô mnuih hdĭp hŏng phung ƀun ƀin bi êdah si jing klei hdĭp mngăt myang ai tiê ñu. Drei ƀuh klă mngač klei mtô anei hlăm klei yăl dliê bi hriêng kơ sa čô mdrŏng leh anăn Y‑Lazar hlăm Y‑Luk 16:19-31. Mnuih mdrŏng dôk hdĭp kƀah klei khăp leh anăn mưč mač Y‑Lazar jing boh mơ̆ng sa klei hdĭp amâo mâo klei đăo kơ “Y‑Môis leh anăn phung Khua Pô Hưn Êlâo”. Ti djiêô anăn, mtao Salômôn ăt hưn êlâo brei thâo snei: “Hlei pô mơak kyua klei knap mñai truh amâo srăng tlaih kơ klei bi kmhal ôh”. Jing phung anak Aê Diê, drei mâo klei iêô mthưr brei dôk hdĭp mâo klei khăp, “Hơ̆k mơak bĕ hŏng phung mâo klei mơak, hia mbĭt hŏng phung hia. Brei diih mâo sa ai hdơ̆ng diih. Đăm jing mgao ôh ƀiădah bi mguôp hŏng phung luă gŭ. Đăm yap diih pô jing phung thâo mĭn ôh” (Rôm 12:15-16). Khua Yang čiăng kơ drei đăm gư̆ bi kngăm arăng hlăm klei knap mñai truh kơ digơ̆ ôh. Đăm ngă mgao ôh tơdah ƀuh arăng dluh lĕ. Brei dôk hdĭp hŏng klei khăp msĕ si Khua Yang khăp leh kơ drei.
Si ngă drei tuôm mơak mơ̆ tơdah dôk ti anăp klei knap mñai leh anăn klei dluh lĕ pô mkăn?
Wah lač: Ơ Khua Yang, brei kâo hdĭp thâo khăp msĕ si Khua Yang khăp leh kơ kâo čiăng kơ kâo hmiêt mkăp kah mbha ya mnơ̆ng Khua Yang brei kơ kâo hŏng phung mnuih ƀun ƀin dôk hdĭp jŭm dar kâo. Akâo Ih đru kâo dôk hdĭp hŏng ai tiê klei mĭn thiê brei msĕ si Khua Yang brei leh klei hdĭp Ih pô kơ kâo.
Dlăng Klei Aê Diê Blŭ hlăm tlâo thŭn: Y‑Yêrêmi 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
