II Kauleethaus 6:1-10
Nqe cim:
“Peb yeej tsis xav cia leejtwg thuam tau peb tes haujlwm, peb thiaj tsis muab ib yam dabtsi los cuab leejtwg kev. Peb ua txhua yam rau sawvdaws pom hais tias peb yog Vajtswv cov tubtxib” (II Kauleethaus 6:3-4a).
Lus nug rau sawvdaws xav:
- Timthawj Paulus nqua hu tus Tswv cov menyuam tau txais Vajtswv koobhmoov yuav tsum ua lubneej licas?
- Nws lubneej thiab kev ua tus Tswv haujlwm zoo licas?
- Peb yuav tsum ua lubneej zoo licas thiaj phim rau lub meejmom thiab tes haujlwm uas Vajtswv muab pub?
Nyob hauv tshooj 5, Timthawj Paulus rov hais txog tej yam Vajtswv ua rau tus ntseeg yog: “…coj peb rov los nrog Vajtswv sib raug zoo rau qhov peb ntseeg Yexus Khetos. Thiab Vajtswv muab txoj haujlwm uas mus coj neeg los nrog Vajtswv sib raug zoo rau peb ua”, pub rau peb “ua tau neeg ncaj ncees ib yam li Vajtswv yog tus uas ncaj ncees” (II Kauleethaus 5:18, 21), dhau ntawd nws nqua hu Pawg Ntseeg Kauleethaus tsis txhob ua rau tej koob hmoov uas Vajtswv foom tsis muaj nqis, tiamsis yuav tsum “ua txhua yam rau sawvdaws pom hais tias peb yog Vajtswv cov tubtxib” (nqe 4a) zoo ib yam li timthawj Paulus tus qauv hauv kev ua neej thiab kev ua haujlwm.
Timthawj Paulus ua timkhawv hais tias, nws tsis ua ib yam dabtsi los cuab leejtwg kev thiaj tsis muaj leejtwg thuam tau nws tes haujlwm thiab tus Tswv lub npe (nqe 3). Tsis tas li ntawd xwb, nws tseem siv tej cuabyeej ncaj ncees kom npaj txhij ua Tebchaws Ceebtsheej tus tubtxib, ntawd yog muaj lub siab hlub lwm tus, ua siab ntev, ua neeg siab dawb siab zoo, hais qhov tseeb, siv Vaj Ntsujplig tej lus thiab Vajtswv lub hwjchim. Thaum ua Vajtswv tes haujlwm, tsis yog txhua zaus nws puavleej tau zoo, nws raug luag thuam, luag qhuas, tsis muaj neeg lees paub, raug saib zoo li neeg tuag lawm, muaj kev txhawj xeeb, zoo li neeg pluag, tsis muaj ib yam dabtsi,… (nqe 9-10), tiamsis nws yeej tseem ua siab ntev ua neeg ncaj ncees, hais Vaj Ntsujplig tej lus tseeb los ntawm lub siab hlub, nws siv kev ncaj ncees ua cuabyeej tawm tsam yeeb ncuab thiab thaiv ntis nws lub cev, los ntawm tej ntawd Timthawj Paulus thiaj tsis ntshai, nws npaj txhij tiv txhua yam kev txomnyem, tiv dhau lwm tus tej lus qhuas, lus thuam kom ua tau lubneej thiab tes haujlwm phim li Vajtswv tus tubtxib.
Txhua tus ntseeg puavleej tau Tswv Yexus muab ntshav muas los ua Vajtswv cov tubtxib. Tsis tas li ntawd xwb, Nws tseem pub nyias muaj nyias koobhmoov sib txawv los ua Nws tes haujlwm. Tib neeg muaj tug qhuas qhov no, lwm tus qhuas qhov tod, yog peb cia siab rau lub ntiajteb no ces ua tsis tau haum Vajtswv siab. Tiamsis yuav tsum ua txhua yam kom phim lub meejmom thiab tes haujlwm uas tus Tswv muab pub, Nws tej koobhmoov thiaj tsis raug nkim hauv peb lubneej.
Thov Vajtswv
Vajtswv! nyuam yaus ua Koj tsaug rau tej koobhmoov zoo kawg nkaus uas Koj pub, thov pab nyuam yaus niaj hnub cim nco thiab tau txhawb zog ua tau lubneej phim li Koj ib tug tubtxib, Koj thiaj yuav txaus siab rau nyuam yaus lubneej thiab tes haujlwm. Amees.
Peb puas ua lubneej phim li Vajtswv ib tug tubtxib lawm tau?
Nyeem Vajluskub hauv peb lub xyoos: Yaxayas 48
Kênh Youtube BHKTHN:
