Klei Aê Diê Blŭ: II Kôrantô 6:1‑10
Êlan kliăng: “Hmei amâo bi têč hnêč arăng ôh, čiăng kơ arăng amâo dưi ƀuah ôh hlăm bruă hmei ngă, ƀiădah hlăm jih jang klei hmei bi sĭt hmei jing dĭng buăl Aê Diê…” (II Kôrantô 6:3-4a).
Klei êmuh ksiêm mĭn: Khua ƀĭng kna Y‑Pôl iêô mthưr phung ƀuôn sang Aê Diê mă leh klei pap Aê Diê snăn brei hdĭp si ngă? Si ñu bi hmô leh hlăm klei hdĭp leh anăn mă bruă? Si drei hdĭp čiăng năng hŏng klei mâo leh anăn bruă pô klam mă leh mơ̆ng Aê Diê?
Khua ƀĭng Y‑Pôl mñă wĭt dŭm klei Aê Diê ngă leh hlăm klei hdĭp phung đăo kơ Ñu hlăm êlan 5: “ Jih klei anăn kbiă hriê mơ̆ng Aê Diê, Pô bi grăng leh drei hŏng Ñu hlăm Krist, leh anăn jao leh kơ hmei bruă klei bi grăng,” ngă kơ drei “mâo klei kpă ênô Aê Diê” (II Kôrantô 5:18, 21), mơ̆ng anăn ñu iêô mthưr Sang Aê Diê Kôrantô đăm mă ôh klei pap Aê Diê hŏng klei hơăi mang, ƀiădah hlăm djăp mta klei brei “bi klă pô jing dĭng buăl Aê Diê” (êlan 4a) msĕ klei ñu hdĭp leh anăn bi hmô.
Khua ƀĭng kna Y‑Pôl hưn bi sĭt ñu amâo ngă ôh ya klei bi msoh pô mkăn čiăng amâo mâo ôh hlei pô ƀuah hlăm bruă pô ngă leh anăn Khua pô (êlan 3). Êngao anăn, ñu lŏ mprăp kdrăp kpă ênô čiăng ngă bruă bi ala kơ Lăn Adiê, anăn jing klei khăp, klei gĭr, doh jăk, klei blŭ sĭt nik hŏng Yang Mngăt Jăk leh anăn klei myang Aê Diê. Hlăk êjai ngă bruă, ñu amâo djŏ knŏng tuôm hŏng klei găl jăk ôh, ƀiădah khăng tlă anăp hŏng dŭm klei bi mni, mưč mač, hŏng klei dlăng amâo sĭt kơ klei hdĭp ăt msĕ mơh bruă ñu ngă. Lu mnuih dlăng ñu msĕ mnuih amâo kral, msĕ si giăm djiê, msĕ si ƀuah mkra, msĕ si ênguôt hnĭng, msĕ si ƀun ƀin, msĕ si amâo mâo sa mta mnơ̆ng ôh… (êlan 9‑10), ƀiădah ñu ăt thâo gĭr hdĭp kpă ênuah, blŭ klei sĭt nik hlăm Yang mngăt jăk leh anăn hlăm klei khăp sĭt, mă klei kpă ênô jing kdrăp bi blah leh anăn răng mgang, kyua anăn Khua ƀĭng kna Y‑Pôl amâo mgei ai tiê ôh, mprăp hgao jih djăp klei dleh dlan leh anăn hgao djăp klei bi mni, mưč mač mơ̆ng anak mnuih čiăng hdĭp leh anăn mă bruă, năng jing dĭng buăl Aê Diê.
Grăp čô phung đăo mâo Khua Yang Yêsu bi tui hŏng êrah yuôm Ñu čiăng jing dĭng buăl Aê Diê. Êngao kơ klei bi tui, Ñu lŏ brei kơ grăp čô mnuih klei thâo mdê mdê čiăng mă bruă Ñu. Anak mnuih bi mni leh anăn ăt mưč mač mơh, tơdah drei dưm ai tiê hlăm klei hing ang ti lăn ala anei snăn amâo dui bi mơak kơ Aê Diê ôh. Ƀiădah hlăm djăp mta klei brei bi blŭ hrăm năng hŏng anôk dôk leh anăn bruă klam pô mă leh mơ̆ng Aê Diê, čiăng klei pap Ñu amâo jing hơăi mang ôh hlăm klei hdĭp drei.
Drei mđing hdĭp năng jing dĭng buăl Aê Diê mơ̆?
Wah lač: Ơ Aê Diê! Kâo bi mni lač jăk kơ Ih kyua klei jăk prŏng prĭn Ih brei, brei kâo hdơr klei pap Ih leh anăn thâo hdĭp năng jing dĭng buăl Aê Diê čiăng Ih mơak kơ klei hdĭp leh anăn klei kâo mă bruă.
Dlăng klei Aê Diê Blŭ hlăm tlâo thŭn: Y‑Êsai 48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
