Klei Aê Diê Blŭ: Klei Mmuñ Hđăp 119:12-16
Êlan kliăng: “Kâo srăng ksiêm mĭn kơ klei Ih čih, leh anăn dlăng kơ êlan Ih” (Klei Mmuñ Hđăp 119: 15).
Klei êmuh ksiêm mĭn: Ya klei pô čih Klei Mmuñ Hđăp akâo kơ Khua Yang bi hriăm ñu? Si knhuah ñu hŏng Klei Aê Diê Blŭ? Ñu brei thâo ya klei ñu srăng ngă hŏng Klei Aê Diê Blŭ? Si knhuah drei hŏng Klei Aê Diê Blŭ?
Klei Mmuñ Hđăp 119 jing Klei Mmuñ Hđăp dlông hĭn leh anăn jing kdrêč dlông hĭn hlăm Hdruôm Hră Klei Aê Diê Blŭ mơh. Lu pô mblang Klei Aê Diê Blŭ lač mtao Y-Đawit yơh jing pô čih leh Klei Mmuñ Hđăp anei. Pô čih kñăm lač kơ Klei Aê Diê Blŭ ktuê jih Klei Mmuñ Hđăp 119. Ñu yua lu boh blŭ mdê mdê tơdah lač kơ Klei Aê Diê Blŭ msĕ si: klei bhiăn, klei mtă, klei hưn, klei čih, klei blŭ, êlan… Knŏng hlăm 5 êlan đŭt hruê anei, pô čih hră ăt yua leh 6 boh blŭ mdê mdê čiăng lač kơ Klei Aê Diê Blŭ mơh.
Tinei, mtao Y-Đawit akâo kơ Khua Yang mtô “klei bhiăn” Ñu (êlan 12). Mtao ƀuăn srăng “hưn jih klei ƀăng êgei Ih mtă” (êlan 13). Amâo djŏ knŏng hriăm Klei Aê Diê Blŭ hjăn kơ ñu pô ôh, ƀiădah brei hưn lar kơ lu mnuih thâo. Anei ăt jing klei Khua Yang mtă kơ phung ƀuôn sang Israel mơ̆ng đưm: “brei ih mtô klei anăn hŏng klei kriăng kơ phung anak ih” (Klei Mtô Mñă Klei Bhiăn 6:6-9). Brei grăp čô phung anak ƀuôn sang Aê Diê hriăm Klei Aê Diê Blŭ leh anăn lŏ mtô kơ phung anak čô drei leh anăn wăt kơ phung riêng gah mơh.
Pô čih Klei Mmuñ Hđăp ăt hưn mơh “Kâo mâo klei mơak tui êlan klei Ih hưn” hĭn kơ tơdah mâo jih klei mdrŏng (êlan 14). Mtao Y-Đawit jing sa čô mtao mdrŏng sah leh anăn mâo klei tŭ jing. Wăt tơdah dôk hdĭp hlăm klei mdrŏng sah kdrưh kơang ƀiădah klei mơak anăn amâo dưi bi mđơr ôh hŏng klei dưi dôk hlăm Sang Yêhôwa leh anăn ksiêm mĭn Klei Ñu Blŭ. Êlan tui tluôn ñu kñăm: “Kâo srăng ksiêm mĭn kơ klei Ih čih” (êlan 15). Ñu čuăn ksiêm mĭn leh anăn “dlăng” Klei Aê Diê Blŭ, čiăng lač mđing mĭn kơ êlan Khua Yang pioh kơ ñu. Anei jing sa klei kruak čua thâo mĭn kyuadah Klei Aê Diê Blŭ yơh srăng jing “pui kđen mtrang” kơ jơ̆ng ñu, “klei mngač kơ êlan” ñu (êlan 105). Klă sĭt ktuê jih klei hdĭp mtao Y-Đawit, êlâo kơ grăp klei bi blah ñu êmuh tui klei Khua Yang čiăng sơăi (I Y‑Samuel 17, 23; II Y‑Samuel 5).
Ti knhal tuč, pô čih hră kñăm: “Kâo srăng mơak hlăm klei bhiăn Ih, kâo amâo srăng wơr bĭt ôh klei Ih blŭ” (êlan 16). Ñu yap yuôm leh khăp kơ Klei Aê Diê Blŭ tơl “djă pioh klei Ih blŭ hlăm ai tiê” (êlan 11) leh anăn ƀuăn amâo wơr bĭt Klei Aê Diê Blŭ ôh. Ñu pô ăt čih mơh: “Klei Ih blŭ jing mmih kơ êlah kâo, mmih hĭn kơ êa hnuê!” (êlan 103). Lu blư̆ snăk hlăm Klei Mmuñ Hđăp anei, mtao Y-Đawit kñăm ñu srăng ksiêm mĭn klei bhiăn Khua Yang kyuadah ñu thâo săng si klei yuôm bhăn leh anăn klei čiăng mâo Klei Aê Diê Blŭ kơ klei hdĭp ñu.
Hruê anei phung anak ƀuôn sang Aê Diê mâo sơăi hdruôm hră Klei Aê Diê Blŭ hlăm kngan. Brei drei thâo Klei Aê Diê Blŭ yơh jing giê ktrâo êlan kơ klei hdĭp grăp čô phung đăo. Knư̆ ksiêm mĭn, drei knư̆ thâo ƀuh hĭn klei yuôm bhăn hlăm klei bhiăn Aê Diê, leh anăn srăng mâo klei bi knal msĕ si mtao Y-Đawit: amâo mâo ôh klei mkăn jing yuôm hĭn, mmih hĭn hŏng klei dưi dôk hdĭp hlăm Klei Aê Diê Blŭ.
Si ngă drei mơak mơ̆ hlăm klei bhiăn Khua Yang leh anăn pioh mmông ksiêm mĭn Klei Aê Diê Blŭ grăp hruê mơ̆?
Wah lač: Ơ Khua Yang, bi mni lač jăk kơ Ih brei leh Klei Blŭ yuôm bhăn jing Klei Aê Diê Blŭ kơ kâo. Akâo Ih bi hriăm kâo klei bhiăn Ih. Akâo Ih đru bi mjuăt kâo pioh mmông ksiêm mĭn Klei Aê Diê Blŭ grăp hruê.
Dlăng Klei Aê Diê Blŭ hlăm tlâo thŭn: Khua Pô Mtô 9:11 – 10:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
