Loos 15:4-6
Nqe cim:
“Rau qhov Vajtswv Txojlus uas thaum ub luag muab sau tseg rau hauv ntawv twb yog sau qhia rau peb. Vajtswv Txojlus ua rau peb muaj kev cia siab, ua siab ntev thiab muab siab rau ntseeg ntxiv” (Loos 15:4).
Lus nug rau sawvdaws xav: Vajtswv Txojlus muaj qabhau li cas rau cov ntseeg Yexus? Qhov tseemceeb ntawm tes haujlwm kawm Vajtswv Txojlus zoo li cas? Peb lub neej tau txais dabtsi los ntawm Vajtswv Txojlus?
Timthawj Paulus qhia paub Vajtswv Txojlus uas tau muab sau tseg thaum ub los yog qhia rau peb, kho kom peb ua taus siab ntev thiab txhawb tau peb lub zog, hauv Txojlus ntawd ua rau peb muaj kev cia siab (nqe 4). Hauv tsab ntawv xa mus rau tus xibhwb hluas Timautes, Paulus hais tias: “Vajtswv Txojlus txhua zaj puavleej yog Vajtswv tshoov neeg lub siab kom neeg sau. Vajtswv Txojlus yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawvdaws paub ua lub neej ncaj ncees” (II.Timautes 3:16). Vajtswv Txojlus muaj qabhau heev rau cov ntseeg Yexus lub neej. Txojlus ntawd qhia, qhuab ntuas thiab pab kom peb ua tau lub neej ncaj ncees rau tus Tswv. Vajtswv Txojlus kuj pab rau peb muaj tus cwjpwm zoo thaum ntsib tej tsamthawj sib txawv nimno thiab yav tom ntej. Yim kawm tus Tswv Txojlus ntau, peb yim paub Nws zoo. Thaum ntawd, peb yuav muaj kev ntseeg thiab muaj kev cia siab rau tus Tswv.
Timthawj Paulus thov Vajtswv tus uas muaj lub siab ntev thiab txhawb zog pab kom peb nyob sib haum ib yam li Tswv Yexus tus yamntxwv, sawvdaws thiaj koom tau ib lub siab (nqe 5). Vamkhom qhov no, peb thiaj koom tau ua ib lub siab qhuas tus Tswv (nqe 6), vim Nws yog tus uas tsimnyog qhuas raws li tus Tswv Txojlus qhia: “Tus Tswv yog tus muaj hwjchim thiab tsimnyog qhuas nyob hauv peb tus Vajtswv lub nroog” (Phau Ntawv Nkauj 48:1a; 96:4). Yog li ntawd, Vajtswv Txojlus pab tau Nws haivneeg xyaum ua tus ntseeg zoo txhua hnub zoo li tus Tswv ua, totaub tus Tswv lub siab nyiam thiaj paub ua haum Nws siab thiab coj tau koob hmoov mus rau ntau tus tibneeg.
Zoo ib yam li sib tw dhia, xyaum kom lub cev muaj zog, txhua hnub peb kuj cheemtsum xyaum sab ntsujplig los ntawm kev kawm Vajtswv Txojlus. Thaum ntawd peb yuav rau siab ntso kawm Vajtswv Txojlus heev dua li tej kev ua si uas peb tus kheej nyiam thiab kawm tus Tswv Txojlus pab tau sab ntsujplig muaj zog thiab vammeej. Vajtswv hais rau Yausuas hais tias: “Thaum sawvdaws tuaj ua ke pehawm kuv, yuav tsum muaj neeg nyeem kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej” (Yausuas 1:8).
Tus Tswv Txojlus muaj qabhau heev rau Nws haivneeg lub neej, hloov tau peb txojkev xav thiab kev ua neej txhua hnub. Yog li, tus Tswv haivneeg yuav tau nrhiav sijhawm los thov Vajtswv thiab kawm Nws Txojlus txhua hnub. Thaum pib kawm yuav muaj kev nyuaj tiamsis yog peb ua siab ntev kawm mus tsis tso tseg ces Vaj Ntsujplig yuav pab kom peb tau koob hmoov dhau los ntawm tus Tswv Txojlus.
Thov Vajtswv,
Tus Tswv, nyuam yaus ua Koj ua tsaug vim Koj Txojlus qhia nyuam yaus. Thov Koj pab nyuam yaus siv zog kawm Koj Txojlus, thiab thov Vajtswv txhua hnub kom nyuam yaus lub neej tau txais qhov zoo hauv Koj Txojlus. Amees.
Peb puas muaj kev thov Vajtswv thiab kawm Vajtswv Txojlus txhua hnub?
Nyeem Vajluskub hauv peb lub xyoos: Tej Lus Qhia 8:1-9:10
Kênh Youtube BHKTHN:
