Klei Aê Diê Blŭ: Rôm 15:4-6
Êlan kliăng: “Kyuadah jih Klei Aê Diê Blŭ čih leh ênuk êlâo jing klei pioh bi hriăm drei, čiăng kơ drei dưi mâo klei čang hmăng kbiă hriê mơ̆ng klei gĭr leh anăn klei bi juh mơ̆ng Klei Aê Diê Blŭ čih leh.” (Rôm 15:4).
Klei êmuh ksiêm mĭn: Si boh tŭ mơ̆ng Klei Aê Diê Blŭ hŏng phung đăo? Si klei yuôm mơ̆ng klei hriăm Klei Aê Diê Blŭ? Ya klei drei bi knal kơ boh tŭ mơ̆ng Klei Aê Diê Blŭ hlăm klei hdĭp?
Khua ƀĭng kna Y-Pôl brei thâo Klei Aê Diê Blŭ čih leh mơ̆ng ênuk êlâo jing klei pioh bi hriăm drei, hriăm mjuăt knuih thâo gĭr leh anăn bi juh drei, leh anăn hŏng Klei Blŭ anăn yơh drei dưi mâo klei čang hmăng (êlan 4). Hlăm hră mơĭt kơ khua pô mtô hlăk ai Y-Timôthê, ñu kñăm: “Jih jang klei čih hlăm hdruôm hră Klei Aê Diê Blŭ kbiă hriê mơ̆ng klei Aê Diê ƀhur êwa, jing yuôm pioh mtô, ƀuah, mkra, leh anăn bi hriăm arăng klei kpă ênô,” (II Y-Timôthê 3:16). Klei Aê Diê Blŭ mâo boh tŭ prŏng snăk kơ klei hdĭp phung đăo. Klei Blŭ anăn ktrâo atăt, ƀuah mkra leh anăn bi hriăm drei hlăm klei kpă ênô Khua Yang. Klei Aê Diê Blŭ ăt ba lu boh tŭ kơ knuih drei tơdah tlă anăp hŏng klei truh mdê mdê êjai ară anei wăt hruê êdei anăp. Knư̆ hriăm lu Klei Aê Diê Blŭ, drei knư̆ thâo kral klă Khua Yang lu hĭn êjai. Dơ̆ng mơ̆ng anăn, drei đăo knang hĭn kơ Ñu leh anăn dưm kluôm dhuôm klei čang hmăng kơ Ñu.
Khua ƀĭng kna Y-Pôl akâo kơ Aê Diê jing akŏ phŭn klei gĭr leh anăn klei bi juh đru drei dôk hdĭp thâo bi guôp hdơ̆ng găp tui si klei bi hmô leh mơ̆ng Khua Yang Yêsu Krist čiăng mâo klei sa ai ti krah jih jang mnuih (êlan 5). Hŏng klei anăn, drei dưi mđrăm mbĭt hŏng sa asăp mpŭ mni kơ Aê Diê (êlan 6) kyua Ñu jing Pô năng kơ arăng mpŭ mni msĕ si Klei Aê Diê Blŭ pô brei thâo: “Yêhôwa jing prŏng leh anăn năng kơ jih klei arăng bi mni” (Klei Mmuñ Hđăp 48:1a; 96:4). Snăn, Klei Aê Diê Blŭ đru phung anak ƀuôn sang Aê Diê hriăm mjuăt knuih jing phung đăo čiăng kơ grăp hruê dưi jing msĕ si Khua Yang hĭn, thâo săng klei Khua Yang čiăng, dưi hdĭp bi mơak kơ Ñu leh anăn ba klei jăk mơak kơ lu mnuih.
Msĕ si sa čô mnuih hriăm mjuăt asei mlei ñu čiăng mâo klei suaih ktang, msĕ snăn mơh brei drei hriăm mjuăt mngăt ai tiê drei pioh mmông hriăm Klei Aê Diê Blŭ grăp hruê. Tơdah drei mđing mĭn kơ Aê Diê hĭn kơ mta klei drei pô khăp leh anăn kčưm dơ̆ng ksiêm mĭn Klei Aê Diê Blŭ, snăn mngăt ai tiê drei srăng jing ktang leh anăn mrâo mda. Aê Diê mtă leh kơ Y-Yôsuê snei: “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt.” (Y-Yôsuê 1:8).
Klei Aê Diê Blŭ ba boh tŭ prŏng snăk kơ klei hdĭp phung anak ƀuôn sang Aê Diê, hlăm hdră êlan bi mĭn leh anăn kơ knhuah drei hdĭp grăp hruê. Kyuanăn, grăp čô anak ƀuôn sang Aê Diê brei čuăn pioh mmông hriăm Klei Aê Diê Blŭ kriêp hjăn grăp hruê. Năng ai hlăk mrâo kčưm hriăm jing dleh ƀiă, ƀiădah tơdah drei ăt gĭr leh anăn amâo phưi lui snăn Yang Mngăt Jăk srăng đru drei thâo kral klei jăk mơak tloh ênoh.
Si ngă drei čuăn pioh mmông kriêp hjăn hriăm Klei Aê Diê Blŭ grăp hruê mơ̆?
Wah lač: Ơ Khua Yang, bi mni kơ Khua Yang brei leh Klei Aê Diê Blŭ dưi čih čiăng bi hriăm kâo. Akâo kơ Khua Yang đru kâo čuăn ksiêm mĭn kơ Klei Ih Blŭ, leh anăn wah lač grăp hruê čiăng bi knal boh tŭ dưn mơ̆ng Klei Aê Diê Blŭ kơ klei hdĭp kâo.
Dlăng Klei Aê Diê Blŭ hlăm tlâo thŭn: Khua Pô Mtô 8:1 – 9:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
