Filipis 2:3
“Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug”.
Lus nug rau sawvdaws xav:
– Cia kom muaj kev koom siab, yuav tsum zam kom dhau ob yam twg?
– Tej no pheej ua tawm los ntawm tej yam twg?
– Vim licas koj cheemtsum zam kom dhau tej yam no?
Cia kom cov ntseeg muaj kev koom siab tau, thawj yam uas yuav tsum tau zam kom dhau yog “tsis txhob ua ib yam dabtsi kom zoo rau nej lossis kom neeg qhuas”. “ua…kom zoo rau nej” txhais tau hais tias yog qia dub, ntshaw tsis ncaj ncees, muaj lub siab cais pab pawg, rau siab ntso nrhiav kom tus kheej tau thiab ua kom nws tau xwb tsis xam pom lwm tus.
Vim licas yuav tsum zam kom dhau lub siab “ua…kom zoo rau nej”? Vim “yog muaj kev sib ntxub thiab muaj neeg ntshaw ua tus hlob, yeej yuav muaj kev kub ntxhov thiab yuav muaj ntau yam kev phem” (Yakaunpaus 3:16). Peb tsis kam lees hais tias yus qia dub lossis muaj lub siab ntshaw ua Vajtswv haujlwm, tiamsis yog tsis ceevfaj ntau zaus peb yuav hais tias vim kuv Pawg Ntseeg, vim kuv rooj kawm Hnubkaj, vim txhua pab pawg kuv coj, vim kuv cov menyuam, kuv tsevneeg… Yus tus kheej lub siab qia dub thiab ntshaw kuj yuav ua tau rau peb kev khavtheeb thiab lub siab chim txias, tiamsis nws kuj yuav rhuav tau peb lub neej, kev ua haujlwm thiab tus Tswv pab yaj kom puastsuaj sai heev. Qia dub thiab ntshaw yog kev txhaum pib hauv lub siab tuaj, yog li ntawd qhov uas ua tib zoo tshuaj lub neej thiab lub siab thaum pehawm, ua tus Tswv haujlwm nws tseemceeb heev li. Cia kom peb kovyeej lub siab ua kom zoo rau yus yog yuav tsum “muaj lub siab xav ib yam nkaus, muaj lub siab hlub ib yam nkaus thiab sawvdaws koom ua ib lub siab, ib tug nrog ib tug sib raug zoo…” (Filipis 2:2). Martyn Lloyd-Jones hais tias: “Txojkev cia siab uas ua rau tibneeg nyob muaj kev thajyeeb yog tibneeg txo lawv tus kheej kom qis thiab koom ua ke txhos caug ntawm Vajtswv lub xubntiag xwb”.
Yam tim ob uas cheemtsum zam kom dhau yog “tsis txhob… ua kom neeg qhuas…”. Lo lus “neeg qhuas” raws li lub ntsiab hauvpaus lus yog saib nws tsim txiaj dua lwm tus. Lo lus no hais ib zaug nyob hauv phau Vajluskub Tshiab, qhia paub tus neeg uas nws xwbtim ntaus nqis hais tias nws yog tus zoo tshaj tiamsis qhov tseeb nws tsis zoo li ntawd. Qia dub thiab ntshaw ces yog tus kheej npaj homphiaj, ua kom neeg qhuas ces yog nws tus kheej nrhiav meejmom. “ua kom neeg qhuas” pib hauv lub siab khavtheeb xav ua kom lwm tus pom yus (Loos 11:25). Tus neeg uas nrhiav “ua kom neeg qhuas” yuav tsim kev kub ntxhov, sib ntxub nyob hauv Pawg Ntseeg (Kalatias 5:26). Dua li ntawd, qhov no kuj rhuav tibneeg tus yamntxwv. Lo lus “ua kom neeg qhuas” ntsig txog lwm lo lus uas hais tias “thuam lwm tus”. Nrhiav qhov uas neeg qhuas yuav coj tibneeg mus txog qib uas ua tsis ncaj thiab ua limhiam. Thaum ntawd lawv yuav rov dag lawv tus kheej (Kalatias 6:3). Tus neeg zoo li ntawd tsis mloog hais, tsis kawm lwm tus, tsis hloov kev ua neej li. Yog muaj leejtwg tawm suab pab tswvyim, ntuas, ces nws yuav hais tias nws zaj yog, thiab tawmtsam.
Lub homphiaj uas koj ua Vajtswv haujlwm puas yog vim ua zoo rau koj lossis yog ua kom neeg qhuas xwb?
Thov Vajtswv,
Vajtswv, thov Koj tswj nyuam yaus lub siab, thov Koj pab kom nyuam yaus muab koj Txojlus los ntsuas nyuam yaus lub neej txhua hnub kom nyuam yaus paub meej Koj txoj koob hmoov pub dawb thiab qhov uas nyuam yaus ua tsis tau, nyuam yaus thiaj paub txo hwjchim nrog Koj mus thiab txo hwjchim rau tej kwvtij txhua tus. Amees.
Nyeem Vajluskub hauv peb lub xyoo: Phau Ntawv Nkauj 61:1-63:11
Tshooj Youtube BHKTHN: https://www.youtube.com/c/bhkthn
