Klei Aê Diê Blŭ: Philip 2:3
Êlan kliăng: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô.” (Philip 2:3).
Klei êmuh ksiêm mĭn: Ya dua mta klei brei ñĕ đuê̆ hĕ čiăng ngă klei jing sa? Si kdrăp rup ti êngao đơ mta klei anei khăng bi êdah? Ya ngă brei drei ñĕ đuê̆ hĕ mơ̆ng mta klei anei?
Čiăng ngă klei jing sa hlăm Krist, mta klei tal êlâo hĭn brei drei ñĕ đuê̆ hĕ “Đăm ngă ôh sa mta klei hŏng klei mĭn kơ pô”. “Klei mĭn kơ pô” čiăng lač kơ klei čuôt klih, klei tluh, klei mĭn bi kah phung, lač kơ sa čô mnuih hmang tui duah klei tŭ dưn pioh hjăn kơ ñu pô leh anăn duah djăp êlan čiăng bi mâo klei anăn amâo lŏ uêñ si klei jing kơ arăng mkăn ôh.
Ya ngă brei ñĕ đuê̆ hĕ mơ̆ng “klei mĭn kơ pô”? “Kyuadah ti anôk mâo klei nač leh anăn klei čuôt klih, tinăn mâo klei rŭng răng leh anăn djăp mta bruă jhat” (Y‑Yakơ 3:16). Drei ƀiă snăk tŭ ư kơ pô jing mnuih čuôt klih amâodah mâo klei tluh čiăng kơ hjăn pô hlăm klei mă bruă kơ Khua Yang, ƀiădah brei răng kyuadah lu blư̆ đa mta bruă drei ngă kyua kơ Phung Sang Aê Diê kâo, kyua kơ adŭ sang hriăm hruê kjuh kâo, kyua kơ êpul kâo, kyua kơ anak, kơ gŏ sang kâo… ƀiădah boh sĭt gơ̆ kyua kơ kâo pô ! Klei čuôt klih leh anăn klei tluh čiăng kơ hjăn pô dưi bi hlai klei mgao leh anăn djăl čôñ ai drei, ƀiădah ăt klei anăn mơh srăng bi rai klei hdĭp, bruă mă leh anăn phung biăp drei pral hĭn kơ jih jang. Klei čuôt klih leh anăn klei tluh čiăng pioh kơ hjăn pô jing klei soh kbiă mơ̆ng ai tiê, kyuanăn bruă ksiêm klei hdĭp pô leh anăn mta klei mtrŭt kkuh mpŭ, mă bruă kơ Aê Diê jing yuôm êdimi. Čiăng mâo klei dưi hĭn hŏng klei mĭn kơ pô brei drei “mâo klei mĭn msĕ, klei khăp msĕ, jing sa ai leh anăn sa klei mĭn…” (Philip 2:2). Martin Lloyd-Jonnes lač: “Knŏng mâo hjăn sa klei čang hmăng kơ klei êđăp ênang ti krah phung mnuih anăn jing bi mdlưh hĕ jhưng mtao pô leh anăn mđrăm mbĭt čuôn kơŭt ti anăp Aê Diê”.
Mta tal dua brei drei ñĕ đuê̆ “Đăm ngă ôh sa mta klei… hŏng klei mgao”. “Klei mgao” hlăm klei mblang phŭn jing klei hưn ktưn kơ pô. Boh blŭ anei yua knŏng sa blư̆ hlăm Klei Bi Mguôp Mrâo čiăng lač kơ sa čô mnuih yap ñu pô yơh jing dlông hĭn ƀiădah boh sĭt gơ̆ amâo djŏ snăn ôh. Êjai klei čuôt klih leh anăn klei tluh čiăng tui duah klei kñăm čiăng kơ pô, bi klei mgao tui duah klei hing ang kơ pô. “Klei hing ang hơăi mang” kbiă hriê mơ̆ng klei mgao čiăng bi mđĭ rup pô nanao yơh (Rôm 11:25). Mnuih tui duah “klei hing ang hơăi mang” ba klei bi mneh msao, bi nač hlăm Phung Sang Aê Diê (Galati 5:26). Kdlưn hĭn mơh klei anei ba klei bi rai kơ knuih sa čô mnuih. Boh blŭ “klei hing ang hơăi mang” djŏ hŏng boh blŭ mkăn jing “krưh, bhuăr”. Tui duah klei hing ang hơăi mang srăng atăt arăng truh kơ klei ƀrư̆ hruê ƀrư̆ mgao leh anăng năng mưč. Mơ̆ng anăn atăt kơ klei jing mnuih mplư ñu pô (Galati 6:3). Mnuih msĕ snăn amâo tuôm čiăng mđing hmư̆, tui hriăm, mkra mjuăt klei hdĭp ñu pô ôh. Tơdah mâo pô đru lač, ƀuah, snăn ñu srăng mgang kơ ñu pô leh anăn lŏ bi kdơ̆ng wĭt.
Si ngă klei kñăm kơ drei mă bruă kơ Khua Yang kyua klei mĭn kơ pô amâodah kyua klei hing ang hơăi mang mơ̆?
Wah lač: Ơ Khua Yang, akâo kơ Ih krơ̆ng ai tiê kâo hlăm Ih, đru kâo grăp hruê mtrang kâo pô hŏng Klei Ih Blŭ čiăng thâo ƀuh klei Ih pap klă hĭn leh anăn klei kƀah kâo pô, čiăng kơ kâo luă gŭ êbat mbĭt hŏng Khua Yang leh anăn hŏng ayŏng amai adei kâo nanao.
Dlăng Klei Aê Diê Blŭ hlăm tlâo thŭn: Klei Mmuñ Hđăp 61:1-8; 62:1-12; 63:1-11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
