Mathais 20:20-28
Nqe cim:
“Ib yam li Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” (Mathais 20:28).
Lus nug rau sawvdaws xav:
- Vim licas cov thwjtim “chim” rau ob kwvtij uas yog Yakaunpaus thiab Yauhas?
- Tswv Yexus hais txog ob hom thawjcoj licas?
- Nws qhia cov thwjtim yuav tsum ua thawjcoj licas?
- Tus Tswv ua qauv licas rau kev ua haujlwm?
- Peb tabtom ua haujlwm los ntawm tus cwjpwm zoo licas?
Tomqab uas Tswv Yexus hais ua ntej txog Nws kev tuag thiab kev sawv rov los, Xenpedais tus pojniam uas yog Timthawj Yauhas thiab Yakaunpaus niam tuaj txhos caug ntua ntawm Tswv Yexus kotaw thiab thov ib yam ntawm Tswv Yexus. Nws thov rau nws ob tug tub tau zaum ntawm Tswv Yexus ob sab nyob hauv Vajtswv lub tebchaws (nqe 20-21). Nkawd xav tau ob lub chaw siab dua ntais tiamsis nkawd tsis totaub yam nkawd thov. Tswv Yexus teb hais tias ob lub chaw ntawd yog Vaj Leej Txiv npaj, tiamsis nkawd yuav tsum haus Nws “lub khob” (nqe 23). Thaum cov thwjtim hnov li ntawd lawv chim heev rau ob kwvtij uas yog Yakaunpaus thiab Yauhas (nqe 24) vim nkawd xav txeeb lub chaw zoo dua ntais. Tus Tswv paub hais tias cov thwjtim tsis txaus siab Nws thiaj hu lawv los thiab qhia ib zaj kawm hais txog cwjpwm ntawm tus ua thawjcoj rau lawv.
Tswv Yexus hais txog ob hom thawjcoj, ib hom siv lawv “hwjchim…yuam kom cov pejxeem ua raws li lawv hais” (nqe 25). Tiamsis tus Tswv xav kom cov thwjtim thiab tus Tswv haivneeg niaj hnub nimno tsis txhob coj li neeg ntiajteb coj, tiamsis yuav tsum coj zoo li ib tug tubtxib ua haujlwm. Txojcai uas tus Tswv qhia ntawd tsis zoo li neeg xav: “leejtwg xav ua tus hlob, tus ntawd yuav tsum ua tubtxib; thiab leejtwg xav ua tus thawj, tus ntawd yuav tsum ua … qhev” (nqe 26-27). Tus Tswv tau ua qauv zoo rau txojcai no, vim Nws los hauv ntiajteb tsis yog los kom leejtwg tu Nws tiamsis Nws los tu sawvdaws thiab muab nws txojsia los txhiv ntau leej (nqe 28).
Nyob rau lub sijhawm tseem ua haujlwm, txawm tias Tswv Yexus yog ib tug thawjcoj uas muaj hwjchim, muaj coob tug lawv nws qab, los Nws yeej ua qauv zoo hauv kev ua haujlwm. Tus Tswv txo hwjchim mus cuag cov neeg txomnyem, cov raug mob ruas, cov raug sawvdaws txav deb, Nws pab cov neeg muaj txim thiab cov neeg cheemtsum kev pab. Tus Tswv qhia cov thwjtim txog tus cwjpwm ua haujlwm thiab Nws txaus siab hlo ua ib tug qhev tes haujlwm ntxuav cov thwjtim ko taw (Yauhas 13:1-20). Timthawj Paulus tau qhuas txog tus Tswv kev txo hwjchim nyob hauv Filipis 2:7: “Tiamsis nws zoo siab tso ib puas tsav yam tseg, nws los yug ua neeg. Nws ua nws lub neej zoo li ib tug tubqhe, thiab nws txo hwjchim”. Timthawj Paulus los kuj hu nws tus kheej hais tias“peb yog nej cov tubtxib” (II Kauleethaus 4:5). Ntawd yog txojcai ua thawjcoj uas txhua tus ntseeg yuav tsum kawm thiab xyaum ua raws: ua thawjcoj zoo li ib tug tubtxib tiag tiag tsis yog tsuas lam tuav lub npe. Txojcai ua thawjcoj ncajncees thiab dawbhuv yuav nrhiav pom nyob hauv kev ua haujlwm pab lwm tus. Qhov no txhais tau hais tias tus ua thawjcoj ua txhua yam los ntawm lub siab kub lug thiab txaus siab tuag txhiv lwm tus, tsis yog yuam kom lwm tus ua haujlwm tu yus.
Peb puas txaus siab hlo ua haujlwm rau yus tej kwvtij zoo li ib tug tubtxib lawm tau?
Thov Vajtswv
Tus Tswv, thov pab nyuam yaus kawm tau Koj tus qauv ua haujlwm. Thov pab nyuam yaus txhob nrhiav meejmom, tiamsis txaus siab hlo tso txhua yam tseg, ua haujlwm zoo li ib tug tubtxib. Amees.
Nyeem Vajluskub peb lub xyoos: Yauj 41
Tshooj Youtube BHKTHN: https://www.youtube.com/c/bhkthn
