Klei Aê Diê Blŭ: Y‑Mathiơ 20:20-28
Êlan kliăng: “Msĕ si Anak Mnuih hriê leh amâo djŏ čiăng kơ arăng mă bruă kơ ñu ôh, ƀiădah čiăng mă bruă kơ arăng, leh anăn jao klei hdĭp ñu pô jing ênoh bi tui kơ lu mnuih” (Y‑Mathiơ 20:28).
Klei êmuh ksiêm mĭn: Ya ngă phung ƀĭng kna “ăl” kơ dua čô ayŏng adei Y‑Yakơ leh anăn Y‑Yôhan? Si dua rup khua kiă kriê, Khua Yang Yêsu hưn mdah? Si Khua Yang mtô lač kơ phung ƀĭng kna klei jing khua kiă kriê? Si rup bi hmô mă bruă Khua Yang bi êdah? Hŏng si ai tiê klei mĭn drei dôk mă bruă?
Leh Khua Yang Yêsu hưn êlâo kơ klei Ñu djiê leh anăn kbiă lŏ hdĭp, mâo mtam yơh mô̆ Y‑Sêbêdê jing amĭ khua ƀĭng kna Y‑Yôhan leh anăn Y‑Yakơ nao čuôn kơŭt ti anăp Khua Yang čiăng akâo sa klei. Ñu akâo brei kơ dua čô anak êkei ñu dưi dôk gŭ dua nah tĭng kơ Khua Yang hlăm Ƀuôn Ala Mtao Ñu (êlan 20-21). Diñu čang hmăng mâo anôk dôk dlông hĭn ƀiădah amâo thâo săng ôh kơ ya klei diñu akâo anăn. Khua Yang Yêsu brei thâo anôk dôk anăn Ama mkra pioh brei, bi kơ diñu dua srăng “mnăm atŏ” Ñu (êlan 23). Phung ƀĭng kna hmư̆ msĕ snăn ăl snăk kơ dua čô ayŏng adei Y‑Yakơ leh anăn Y‑Yôhan (êlan 24) kyuadah diñu dua pral jơ̆ng kngan čiăng plah mă kdrêč jăk hĭn. Khua Yang thâo diñu amâo mơak ôh snăn iêô jih diñu hriê leh anăn mtô lač kơ diñu klei hriăm kơ ai tiê klei mĭn khua kiă kriê.
Khua Yang bi êdah rup khua kiă kriê khăng ƀuh hlăm ƀuôn sang, jing “yua klei ktư̆ juă kiă kriê ƀuôn sang” (êlan 25). Ƀiădah lĕ, Khua Yang čiăng kơ phung ƀĭng kna leh anăn phung anak Aê Diê hruê anei jing khua kiă kriê amâo tui hlue klei mĭn lăn ala ôh, ƀiădah “bi mklăk” hŏng klei anăn, jing ai tiê klei mĭn sa čô dĭng buăl mă bruă. Hdră êlan kiă kriê Khua Yang mtô lač hmư̆ msĕ si amâo găl ôh: “hlei pô čiăng jing prŏng…, brei ñu jing dĭng buăl; hlei pô čiăng jing mrô sa, brei ñu jing hlŭn…” (êlan 26-27). Khua Yang yơh pô ba êlan êlâo ngă tui si hdră êlan anei, kyua klă sĭt Khua Yang trŭn hriê ti lăn ala amâo djŏ čiăng kơ arăng mă bruă kơ Ñu ôh ƀiădah Ñu hdĭp leh sa klei hdĭp săn asei mlei leh anăn mă bruă kơ arăng (êlan 28).
Hlăm thŭn mlan mă bruă ti lăn ala, wăt tơdah Khua Yang Yêsu jing sa čô khua kiă kriê mâo jih klei dưi, mâo lu mnuih tui hlue ƀiădah Ñu bi êdah rup bi hmô mă bruă nanao. Khua Yang bi luă gŭ Ñu pô hriê kơ phung ƀun ƀin, kơ mnuih djŏ phŭng, kơ pô arăng suôt đuê̆ mơ̆ng ƀuôn sang, đru phung mnuih soh leh anăn mnuih mâo klei čiăng. Khua Yang bi hriăm phung ƀĭng kna ai tiê klei mĭn mă bruă leh anăn Ñu kăp ngă bruă sa čô dĭng buăl rao jơ̆ng kơ diñu (Y‑Yôhan 13:1-20). Khua ƀĭng kna Y‑Pôl mpŭ mni rup bi hmô luă gŭ mơ̆ng Khua Yang hlăm hră Philip 2:7 snei: “ƀiădah Ñu toh hĕ klei anăn, leh anăn tŭ klei jing sa čô dĭng buăl, brei arăng kkiêng kơ Ñu jing mnuih”. Wăt khua ƀĭng kna Y‑Pôl ăt lač “hmei pô jing dĭng buăl diih” (II Kôrantô 4:5). Anăn jing hdră êlan khua kiă kriê brei grăp čô phung đăo hriăm leh anăn ngă: khua kiă kriê hŏng ai tiê mă bruă brei jing msĕ si sa čô dĭng buăl sĭt amâo djŏ knŏng hlăm klei blŭ ôh. Hdră êlan khua kiă kriê sĭt êmĭt leh anăn êngeh dưi ƀuh hlăm ai tiê mă bruă kơ arăng. Klei anei čiăng lač khua kiă kriê ngă djăp mta bruă hŏng jih ai tiê hur har leh anăn kăp săn asei mlei kơ arăng, amâo čiăng arăng mă bruă kơ ñu ôh.
Si ngă drei kăp mă bruă kơ ayŏng adei msĕ si sa čô dĭng buăl sĭt mơ̆?
Wah lač: Ơ Khua Yang, akâo Ih đru kâo hriăm mơ̆ng Ih rup bi hmô kơ klei mă bruă. Akâo kơ Ih đăm brei kâo tui duah anôk dôk kơ kâo pô ôh, ƀiădah kăp săn asei mlei, mă bruă hŏng ai tiê klei mĭn sa čô jing dĭng buăl.
Dlăng Klei Aê Diê Blŭ hlăm tlâo thŭn: Y‑Yôp 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
