Pajlug 3:1-2
Nqe cim:
“Metub, koj tsis txhob muab kuv tej lus qhuab qhia tso tseg. Nco ntsoov tej lus uas kuv qhia rau koj lawm” (Pajlug 3:1).
Lus nug rau sawvdaws xav:
- Vajntxwv Xalumoos qhuab ntuas nws tej menyuam li cas?
- Ua raws li nws tej lus qhuab ntuas nws cov menyuam yuav tau dab tsi?
- Peb tabtom ua li cas rau tej lus qhuab ntuas no?
Ib tsoom mloog txhua tus,
Ntau tus tibneeg, thaum lawv mus ua txhaum lawm, lawv liam hais tias tim yog lub tsamthawj tsis zoo, tim lwm tus dag lossis tim yog dab dag… tiamsis tej sab nraud tsuas yog yam txhauj tibneeg xwb, lub vimchiv mus ua txhaum yeej yog tim tus tibneeg ntawd lub siab xav ua (Loos 6:12-13). Yog li ntawd, ceev lub siab kom zoo zoo ces yog tawm tsam kev dag ntxias sab nraud uas tuaj ntxias peb ntag (Pajlug 4:23).
Thaum zeem paub li ntawd, vajntxwv Xalumoos thiaj qhia tibneeg txog ob yam kev samhwm. Lus samhwm rau seem tsis zoo yog, “txhob muab tej lus qhuab ntuas tso tseg”. “Txhob muab tso tseg” tsis yog hais txog nco ntsoov txog tus Tswv tej lus xwb tiamsis hais txog mloog ua raws huv tibsi. Muaj tswvyim tsis yog kawm ib zaug ces tau, tiamsis yog cog lus yuav ua raws li tus Tswv tej lus txhua hnub. Lossis hais tau hais tias, ua raws li tus Tswv Txojlus yog neeg muaj tswvyim (II-Kevcai 4:6). Lus samhwm rau seem zoo yog, “Nco ntsoov tej lus uas kuv qhia rau koj lawm”. Vim li cas yuav tau nco ntsoov tus Tswv tej lus? Vim txhua hnub puavleej muaj tubsab tuaj nyiag tus Tswv tej lus tawm hauv peb lub siab mus. Tubsab lossis tej mlom yuav los hloov chaw ntawm tus Tswv tej lus ua rau peb yuav niaj hnub nrhiav xav hais tias yuav tau txaus siab thiab tau kev kaj siab. Tej tubsab lossis mlom ntawd tej zaum yog yus kev ua tau haujlwm ntau ntawm kev nrhiav noj, yog yus lub tsev neeg thiab yog yus rov saib hlob tus kheej.
Thaum tus me tub ncaj ncees rau kev kawm xyaum thiab coj raws li tus Tswv tej lus qhia ces nws lub neej yuav tau“ntxiv nubnyoog rau”. Yog vim li cas? Vim tej lus qhuab ntuas yog tej kevcai tsav tibneeg lub neej mus rau qhov zoo thiab kev paub ua neej muaj quas. Tiamsis qhov uas, “ntxiv hnubnyoog” tsis yog hais txog lub niaj xyoo ua neej nyob hauv ntiajteb xwb, tiamsis yog hais txog kev ua lub neej muaj nqis, lub neej ua tau ntau yam zoo puv npo thiab muaj txoj sia ibtxhis (Yauhas 10:10).
Vajntxwv Xalumoos hais txog yam tim ob uas thaum tus me tub los kawm xyaum thiab coj raws li tus Tswv tej lus qhia nws yuav tau yog, “kev kaj siab”, hauvpaus lus ntawm lo lus kaj siab no yog “Xaloos”. Xaloos yog ib lo lus hais txog kev kaj siab tiamsis hais tau dav dua lo lus kaj siab. Xaloos yog hais tau tas nrho txhua yam sib koom los ua ke nyob sib haum, xws li sib koom nrog Vajtswv, nrog tibneeg thiab tej yam ib ncig yus. Xaloos yog hais txog tau txais lub neej kaj siab puv npo. Xaloos tsis tau txhais hais tias tsis muaj kev kub ntxhov, tiamsis yog hais txog yam zoo hauv lub neej thiab kev ua lub neej muaj nqis. Ua neej nyob ntev tiamsis pheej nyuaj siab ces tsis yog nqi zog zoo, tiamsis cov neeg mloog ua raws tus Tswv tej lus qhia yuav tau txais Xaloos.
Peb paub hais tias, thaum tus tub nco ntsoov tej lus qhuab qhia thiab ua raws tej lus ntawd, tsis muaj lus cog tseg rau nws hais tias yuav paub tshaj lwm tus lossis ntse dua lwm tus, tiamsis yog nws yuav tau txais Xaloos. Ntau zaug peb siv zog ua txhua yam kom peb paub ntau dua lwm tus, totaub lossis ntse tshaj lwm tus, tiamsis tseeb tiag thaum peb ntse raws li tibneeg kev xav, yog peb tsis ua raws li tus Tswv tej lus qhia ces thaum ntawd peb lub neej yuav ntsib teebmeem (Pajlug 3:7).
Thov Vajtswv,
Tus Tswv, nyuam yaus ua Koj tsaug vim Koj pub muaj phau Vajluskub uas yog Koj Txojlus. Nyuam yaus thov cog lus yuav kawm xyuam thiab ua raws Koj Txojlus kom tau txais kev kaj siab. Amees.
Ib tsoom cov mloog uas hmov thiab tshua,
Peb puas tau txais kev kaj siab thaum los kawm thiab ua raws tus Tswv Txojlus?
Nyeem Vajluskub hauv peb lub xyoo: Yauj 9
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
