Klei Aê Diê Blŭ: Klei Bi Hriêng 14:28-35
Êlan kliăng: “Klei kpă ênô bi mđĭ sa phung găp djuê mnuih, ƀiădah klei soh jing klei bi hêñ kơ phung ƀuôn sang” (Klei Bi Hriêng 14:34).
Klei êmuh ksiêm mĭn: Ya êlan hdră khua kiă kriê ƀuh hlăm dŭm êlan Klei Bi Hriêng hruê anei? Si mă yua êlan hdră anei kơ hruê anei? Ya klei drei ktrâo atăt brei kơ phung anak čô čiăng kơ diñu dưi jing phung khua kiă kriê mâo klei tŭ dưn?
Mtao Y‑Salômôn jing sa čô mtao Aê Diê brei mâo klei thâo mĭn kdlưn hĭn kơ jih jang (I Bruă Mtao 3:12). Ñu amâo knŏng mtô anak êlan dôk hdĭp kpă ênô tui si hnơ̆ng Aê Diê čuăn ôh, ƀiădah wăt mtô anak hnơ̆ng čuăn čiăng dưi jing sa čô khua kiă kriê bi mơak kơ Aê Diê mơh. Mơ̆ng dŭm êlan hlăm Klei Bi Hriêng hruê anei, mbĭt hŏng klei huĭ mpŭ kơ Aê Diê (êlan 26-27), brei anak hriăm dŭm hnơ̆ng čuăn kơ khua kiă kriê. Tal sa, sa čô khua kiă kriê brei thâo khăp kơ mnuih ƀuôn sang, thâo kral klei yuôm mnuih ƀuôn sang (êlan 28). Ênoh mnuih ƀuôn sang ktang lu, klei hdĭp mda đĭ kyar hĭn snăn klei hing ang, klei guh kơang kơ anak thiăm hĭn mơh. Ƀiădah knŭk kna srăng rai tuč tơdah kƀah mnuih ƀuôn sang. Tal dua, khua kiă kriê brei êmưt krêñ, krơ̆ng ai tiê êđăp ênang (êlan 29-30). Klei krêñ bi luč klei thâo săng, leh anăn luč klei thâo săng jing phŭn kơ klei dlưh rai kyua čuăn ngă êlan soh wê. Tal tlâo, sa čô khua kiă kriê brei mâo ai tiê jăk (êlan 31). Klei thâo pap kơ phung ƀun ƀin bi msĕ hŏng klei huĭ mpŭ kơ Aê Diê. Mơ̆ng klei anak kiă kriê, jih jang phung ƀuôn sang srăng thâo kral Aê Diê bŏ hŏng klei khăp leh anăn klei pap. Tal pă, brei anak bi êdah klei thâo mĭn sa čô khua kiă kriê hŏng hdră êlan kiă kriê, klei phat kđi mtăp mđơr, klei mưn amâodah bi kmhal hŏng klei klă mngač (êlan 32-35). Sa čô mnuih kpă ênô brei mâo klei mưn, mnuih ngă soh brei tŭ klei bi kmhal, snăn kơh jing sa čô mtao thâo mĭn.
Êlan hdră Aê Diê mtô kơ khua kiă kriê jing klei hriăm yuôm bhăn êdimima kơ jih jang ênuk. “Klei kpă ênô bi mđĭ sa phung găp djuê mnuih, ƀiădah klei soh jing klei bi hêñ kơ phung ƀuôn sang” (êlan 34). Amâo djŏ ôh kyua phung Israel jing phung ƀuôn sang Aê Diê ruah snăn Ñu dlăng amâo mtăp mđơr, ƀiădah tơdah diñu ngă klei wê, klei soh, diñu ăt tŭ klei bi kmhal msĕ si jih jang phung ƀuôn sang mkăn mơh. Ti anăp Pô Kpă Ênô amâo mâo sa čô dưi tlaih mơ̆ng klei bi kmhal ôh tơdah dôk hdĭp nanao hlăm klei soh, bi kdơ̆ng hŏng klei bhiăn Aê Diê (Y‑Amôs 1-2; Rôm 1:18:18-32).
“Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang ñu ruah leh jing ngăn dưn ñu pô. Yêhôwa dlăng mơ̆ng adiê ti dlông, ñu ƀuh jih jang anak mnuih;” (Klei Mmuñ Hđăp 33:12-13). Sa čô khua kiă kriê brei thâo “Ti dlông mâo Adiê”, amâo dưi ôh yua kngan guôm Adiê. Grăp čô drei brei hdĭp gưt asăp leh anăn bi mơak kơ Aê Diê. Jing sa čô khua kiă kriê, êlan hdră klei hdĭp drei brei ba klei hơ̆k mơak, klei jăk jĭn kơ mnuih drei dôk răng kriê. Jing phung amĭ ama, drei amâo knŏng čiêm rông anak ôh, ƀiădah wăt mtô anak thâo huĭ mpŭ kơ Aê Diê leh anăn mtô anak êlan hdră jing khua kiă kriê mơ̆ng Aê Diê čiăng dưi mkŏ mjing gŏ huă kjăp ktang, Phung Sang Aê Diê đĭ kyar, leh anăn lăn čar mdrŏng sah.
Leh hriăm dŭm êlan hdră kơ khua kiă kriê mơ̆ng klei hriăm hruê anei, si ngă mâo ya mta klei drei čiăng mâo klei bi mlih?
Wah lač: Ơ Khua Yang, bi mni kơ Ih kyua klei hriăm kơ khua kiă kriê Ih mtô kâo yuôm bhăn êdi. Akâo kơ Ih đru kâo, anak čô kâo dưi jing phung khua kiă kriê thâo mĭn, kpă ênô čiăng dưi mkŏ mjing gŏ sang, ƀuôn sang kjăp ktang, leh anăn bi guh kơang kơ Anăn Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 22:1 – 23:15
Kênh Youtube BHKTHN:
