Pajlug 14:28-35
Nqe cim:
“Kev ncaj ncees ua rau lub tebchaws vammeej; kev txhaum ua rau lub tebchaws raug txajmuag” (Pajlug 14:34).
Lus nug rau sawvdaws xav:
- Tus cai tau hais txog kev ua ib tug thawj uas sau nyob hauv ntu Vajluskub no yog li cas?
- Niaj hnub nimno yuav siv tus cai ntawd li cas?
- Peb yuav pab peb tej xeebntxwv li cas kom lawv thiaj tsheej ib tug thawj coj muaj nqis rau sawvdaws?
Xalumoos yog ib tug vajntxwv uas tau Vajtswv pub muaj kev txawj ntse tshaj plaws, thoob ntiajteb tsis muaj ib tug yuav ntse cuag (I-Vajntxwv 3:12). Tsis yog vajntxwv Xalumoos qhia nws tej me nyuam ua neej raws li Vajtswv tus cai xwb, tiamsis nws tseem cob qhia nws tej me nyuam ua ib tug thawj coj zoo raws li Vajtswv siab nyiam. Los ntawm cov lus hauv ntu Pajlug no, dhau ntawm qhov uas fwm tus Tswv (nqe 26-27) lawd, tej me nyuam yuav tau kawm tus cai ntawm ua ib tug thawj coj thiab. Tim ib, ua tus thawj coj yuav tsum paub hlub pejxeem, paub qhov tseemceeb ntawm muaj pejxeem (nqe 28). Yim muaj pejxeem coob, yim vammeej, yim nto koob npe thiab yim muaj meej mom. Tiamsis tsis muaj pejxeem ces vajntxwv kuj puas tsuaj. Tim ob, ua tus thawj coj tsis txhob chim sai thiab ceev lub siab kom tus (nqe 29-30). Thaum chim ces qhia tshwm kev ruam, ua rau tsis totaub thiab txiav txim siab ua yam yuam kev. Tim peb, ua tus thawj coj yuav tsum muaj lub siab zoo pab lwm tus (nqe 31). Kev ua siab zoo pab neeg txomnyem tau muab piv rau yam ua Vajtswv tau koob meej. Los ntawm nws tes haujlwm ua thawj coj yuav ua rau nws tej me nyuam, tej pejxeem zeem paub Vajtswv tus uas muaj siab zoo thiab siab hlub. Tim plaub, paub siv tswvyim los tswj kav ntawm kev txiav txim ncaj ncees, qhuas thiab cem mus raws nraim cai (nqe 32-35). Tus neeg uas ua ncaj tsimnyog tau txais khoom plig, tiamsis tus neeg ua txhaum tsimnyog raug txim thiaj yog ib tug thawj coj ua ncaj.
Cov cai uas Vajtswv qhia rau tus ua thawj coj yeej yog zaj kawm xyaum muaj nqis rau txhua tiam tibneeg. “Kev ncaj ncees ua rau lub tebchaws vammeej; kev txhaum ua rau lub tebchaws raug txajmuag” (nqe 34). Tsis yog haiv neeg Yixalayees yog Vajtswv haiv neeg ces, txawm lawv ua txhaum los Nws cia li zam txim rau, Vajtswv tsis xaiv ntsejmuag, thaum Nws haiv neeg ua txhaum, Nws kuj rau txim rau lawv ib yam li rau txim rau lwm haiv neeg. Nyob ntawm Vajtswv tus uas ncaj ncees lub xub ntiag, tsis muaj leejtwg yuav dim tsis raug txim, yog hais tias pheej ua txhaum tawm tsam tus Tswv (Amaus 1-2; Loos 1:18-32).
“Haivneeg uas muaj Vajtswv ua lawv tus Tswv muaj kev kaj siab, cov neeg uas Nws xaiv ua Nws tug lawm, lawv tau zoo nyob kaj siab lug. Tus Tswv nyob saum ntuj saib tuaj, Nws yeej pom neeg txhua tus huv tibsi.” (Ntawv Nkauj 33:12-13). Tus neeg ua tus thawj coj yuav tsum paub “Saud muaj Ntuj” yus tib txhais tes yuav thaiv tsis tau lub ntuj. Peb txhua tus yuav tau ua lub neej txo fwjchim thiab ua yam haum Vajtswv siab. Ua tus thawj coj, ua yus tes haujlwm coj kom pab tau cov uas yus coj txais kev zoo siab, ua rau cov yus coj muaj lub neej zoo. Yog ib tug yog niam thiab yog txiv, tsis yog peb tsuas nrhiav zaub mov rau cov menyuam noj xwb, tiamsis peb yuav tau qhia tej me nyuam fwm Vajtswv thiab paub ua ib tug thawj coj zoo raws li tus Tswv qhia los txim kho lub tsev neeg lossis lub pawg ntseeg kom sawv ruaj khov thiab vammeej.
Thaum kawm dhau zaj tus cai ua thawj coj no, muaj yam twg peb yuav tau hloov hauv lub neej?
Thov Vajtswv,
Tus Tswv, nyuam yaus ua Koj tsaug rau zaj kawm txog tus cai ua thawj coj dhau los. Thov Koj pab nyuam yaus thiab nyuam yaus tej xeebntxwv kom ua tau ib tug thawj coj txawj ntse, los coj lub tsev neeg, coj lwm tus sawv ntseg thiab vammeej ua rau Koj tau ntsejmuag. Amees.
Nyeem Vajluskub hauv peb lub xyoo: II.Xwmtxheej Vajntxwv 22:1-23:15
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
