I-Timautes 2:1-4
Nqe cim:
“Koj cia li thov Kuv, Kuv yuav teb koj; Kuv yuav qhia tej txujci tseemceeb uas koj tsis tau paub rau koj” (Yelemis 33:3).
Lus nug rau sawvdaws xav:
- Timthawj Paulus qhia kom Timautes yuav tsum ua yam haujlwm xub thawj yog dab tsi?
- Thiab Paulus hais tias ua yam ntawm muaj qab hau dab tsi?
- Peb pheej tsa lus taij thov pub rau leejtwg?
Timthawj Paulus cob lus rau Xibfwb Timautes txog tes haujlwm tseemceeb uas xub thawj yuav tsum ua yog “tsum thov Vajtswv pab sawvdaws thiab nej yuav tsum ua Vajtswv tsaug” (nqe 1). Paulus siv lo lus “Qhov tseemceeb uas kuv xav kom nej ua” yog hais txog tes haujlwm yuav tsum ua ua ntej ntawm txhua yam yog tsa lus taij thov. Thov Vajtswv kheev muab piv li “ua pa ntawm sab ntsujplig”, yog li ntawd tus ntseeg tsis muab kev thov Vajtswv ua qhov tseemceeb, ces sab ntsujplig yuav tsis muaj zog thiab yuav “tu siav” ib hnub xwb.
Phau Vajluskub txhais raws lus Nyablaj los, Timthawj Paulus cov lus kom Timautes yuav tsum thov hauv nqe 1 yog li no: “…kuv thov kom nej siv zog thov, taij thov, thov pab lwm tus thiab ua Vajtswv tsaug…”. Tsis yog Timthawj Paulus ntuas kom sawvdaws thov Vajtswv li ib txwm ua xwb, tiamsis nws siv cov lus hnyav uas yog “Siv zog thov”, “taij thov”, “thov ”thiab “ua tsaug” yog nws xav hais txog yam tseemceeb hauv kev thov Vajtswv. “siv zog thov” yog hais txog tas siab ntsws thov kev pab cawm ntawm tus Tswv. “taij thov” yog hais txog tus cwjpwm ntawm kev txo fwjchim thaum los thov Vajtswv kom tau tus Tswv teb tej lus thov. “thov” yog qhia yam yus cheemtsem rau Vajtswv tus muaj fwjchim thiab taij Vajtswv pab rau lwm tus, muaj lub siab tos rawv tus Tswv pub. Thiab “ua tsaug” yog yam yuav tsum muaj nyob hauv zaj thov Vajtswv. Peb yuav tsum niaj hnub hais lus txhawb nqa thiab ua Vajtswv tsaug hauv txhua lub tsamthawj.
Qhov xub thawj, Timthawj Paulus hais rau Timautes paub cov uas nws yuav tsum xav txog thaum tsa suab taij thov Vajtswv ntawd yog: “sawvdaws”, “cov vajntxwv”, “cov nomtswv” (nqe 2). Taij thov pab sawvdaws yog lo lus nqua hu peb cov ntseeg txhua tus. Cov ntseeg yog Yexus Khetos lub cev, peb muaj feem yuav tsum sib hlub sib pab thiab ib tug paub txhawj thov Vajtswv pab ib tug. Ntawd kuj yog yam uas txhua tus ntseeg yuav tsum muaj nyob hauv kev ua lub neej ntseeg. Qhov ntxiv mus yog thov Vajtswv rau “cov vajntxwv thiab cov nomtswv”, uas tswj teb kav chaw. Lub sijhawm uas Paulus sau tsab ntawv no, vajntxwv Nelaus tus uas muaj lub siab tsiv, siab phem tab tom tswj kav tej tebchaws uas nws txeeb tau. Cov ntseeg Yexus uas nyob tim nroog Loos tab tom raug kev tsimtxom hnyav heev, yog li ntawd qhov uas thov Vajtswv pab rau cov vajntxwv thiaj tseemceeb heev. Yog thov Vajtswv pab cov neeg tswj teb kav chaw peb thiaj “yuav tau nyob kaj siab lug ua Vajtswv tes haujlwm thiab tau zoo ua peb lub neej kom phim qhov uas peb yog cov ntseeg” (nqe 2b). thiab hais ntxiv hais tias; “Qhov no yog qhov zoo thiab haum Vajtswv tus uas yog peb tus Cawmseej lub siab” (nqe 3). Tes haujlwm thov Vajtswv pab rau sawvdaws thiab rau tej nomtswv kav tebchaws yog tes haujlwm zoo thiab haum Vajtswv siab, vim Vajtswv xav kom txhua tus tau dim txim thiab paub qhov tseeb (nqe 4).
Niaj hnub nimno, peb nyob rau ncua caij nyoog uas muaj ntau tus tibneeg tsis paub qhov tseeb thiab muaj kev tsimtxom Vajtswv pawg ntseeg. Yog li ntawd, peb muaj feem yuav tsum tas siab thov Vajtswv pab rau tej nomtswv kav tebchaws thiab cov neeg tsis tau paub tus Tswv. Peb yuav tsum ntseeg hais tias, los ntawm peb tej lus thov, tus Tswv yuav ua tej haujlwm loj, ua tej txujci tseemceeb uas tsis tau pom dua rau peb pom.
Peb puas muab tej lus thov Vajtswv rau lwm tus los ua qhov tseemceeb?
Thov Vajtswv,
Tus Tswv, thov qhia kuv nco ncoov tsa lus siv zog thov, taij thov Koj thiab ua Koj tsaug rau txhua yam thiab txhua tus tibneeg, vim qhov ntawd haum koj siab. Amees.
Nyeem Vajluskub hauv peb lub xyoo: II.Xwmtxheej Vajntxwv 18:18-19:11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
