Khiavdim 28:15-29
15 Ua daim ntaub npog hauvsiab rau tus Povthawj Hlob tau siv npog hauvsiab li Vajtswv lub siab nyiam. Muab cov ntaub uas xaws lub tsho efaus ua daim npog hauvsiab thiab xaws paj ntaub txaij nraug zees rau thiab.
16 Daim ntaub npog hauvsiab ntawd ua xwmfab xwmmeem thiab muab tais ua ob tsem, ntev ib dos thiab dav ib dos. 17 Cog plaub leej qe zeb muaj nqis rau ntawm daim ntaub npog hauvsiab; thawj leej cog ib lub qe zeb lunpis, ib lub qe zeb taupas thiab ib lub qe zeb nkanes; 18 leej ob, cog ib lub qe zeb emelas, ib lub qe zeb xafiles thiab ib lub qe zeb dawb ci hob; 19 leej peb, cog ib lub qe zeb xiav txho taws, ib lub qe zeb ankates thiab ib lub qe zeb amethis; 20 thiab leej plaub, cog ib lub qe zeb npelis, ib lub qe zeb kanelias thiab ib lub qe zeb yapes. Cov qe zeb no puavleej muab dhos rau ntawm daim phiaj kub. 21 Kaum ob lub qe zeb ntawd puavleej txaug Yakhauj kaum ob leeg tub npe rau, cov qe zeb ntawd zoo ib yam li tej homthawj uas txaug kaum ob xeem ntawd npe rau.
22 Muab cov tseem kub nchuav ua ob txoj saw, thiab muab ntswj zoo li txoj hlua tis rau ntawm daim npog hauvsiab. 23 Ua ob lub khawb kub tis rau daim ntaub npog hauvsiab ob lub ntsej sab Saud, 24 thiab muab ob txoj saw kub tis rau ntawm ob lub khawb kub. 25 Muab ob tog qab tis rau ob daim phiaj, ua li no kom ob txoj saw lo rau lub tsho efaus ob daim tiag xubpwg ntawm xubntiag. 26 Ua dua ob lub khawb kub tis rau ntawm daim ntaub npog hauvsiab ob lub kaum hauvqab ntawm tus npoo uas npuab nkaus lub tsho efaus. 27 Ua dua ob lub khawb kub tis ntxiv rau lub tsho khuam ob txoj hlab khuam xubpwg ob tog tw kawg tom xubntiag uas ze kab xaws thiab txuas nkaus txojsiv uas muab ntaub plaub yaj xaws. 28 Muab ob txoj hlab ntaub xiav khi daim ntaub npog hauvsiab ob lub khawb rau ntawm lub tsho efaus ob lub khawb, kom txuas nkaus rau ntawm txojsiv liab, thiab kom daim ntaub npog hauvsiab nyob ncaj rau ntawm lub tsho efaus. 29 Thaum Aloos mus rau hauv Chav Dawbhuv, nws yuav tsum npua rawv daim ntaub npog hauvsiab uas txaug tagnrho cov Yixalayees kaum ob xeem npe rau lawm, kom kuv uas yog tus Tswv, nco ntsoov kuv haivneeg.
Nqi cim:
“Ua daim ntaub npog hauvsiab rau tus Povthawj Hlob tau siv npog hauvsiab li Vajtswv lub siab nyiam. Muab cov ntaub uas xaws lub tsho efaus ua daim npog hauvsiab thiab xaws paj ntaub txaij nraug zees rau thiab” (Khiavdim 28:15).
Lus nug rau sawvdaws xav:
- Ua daim ntaub npog hauvsiab zoo li cas?
- Txaug Yakhauj kaum ob leeg tub npe rau cov qe zeb ntawm daim ntaub npog hauvsiab qhia txog yam dab tsi?
- Zaj kawm no qhia paub hais tias peb muaj qab hau li cas ntawm tus Tswv xubntxiag thiab tsimnyog peb ua dabtsi rau nws?
Daim ntaub npog hauvsiab uas xaws rau tus povthawj hlob nhav npog hauvsiab yog ua xwmfab, ntev ib dos thiab dav ib dos; muab ntaub xaws lub tsho thiab xaws paj ntaub txaij nraug zees rau daim ntaub (nqi 15). Qhov tshwjxeeb ntawm daim ntaub npog hauvsiab yog log plaub leej qe zeb muaj nqis rau. Cov qe zeb ntawd muaj kaum ob lub, ib lub qe zeb twg txaug Yakhauj cov tub ib lub npe rau (nqi 17-21). Daim ntaub npog hauvsiab muab ob txoj saw kub tis rau ntawm ob lub khawb kub, cam rau lub tsho efaus ob daim tiag xubpwg ntawm sab xubntiag. Muab ob txoj hlab ntaub xiav khi daim ntaub npog hauvsiab ob lub khawb rau ntawm lub tsho efaus ob lub khawb. Thaum Aloos mus rau hauv chav Dawbhuv, nws yuav tsum hnav rawv daim ntaub npog hauvsiab uas txaug muaj cov Yixalayees kaum ob xeem neeg tej npe mus, kom tus Tswv nco ntsoov nws haivneeg (nqi 29).
Tshwmsim tshooj 21 hais txog lub ntuj tshiab, lub ntiajteb tshiab thiab lub nroog Yeluxalees tshiab. Nyob hauv lub nroog ntawd muab tej qe zeb muaj nqis sau cov Yixalayees kaum ob xeem tej npe rau ntawm cov qhov roojvag, zoo ib yam li daim ntaub npog hauvsiab uas sau cov Yixalayees kaum ob xeem tej npe thiab. Dhau tus duab daim ntaub npog hauvsiab thiab lub nroog dawbhuv, peb paub hais tias tus Tswv saib Yakhauj kaum ob leeg tub muaj nqis heev, lawv cov npe tau muab txaug rau ntawm cov qe zeb muaj nqis thiab sau rau ntawm cov roojvag nroog ua kom tus Tswv nco ntsoov nws haivneeg.
Tswv Yexus saib Pawg ntseeg muaj nqis zoo ib yam li nws tus nkaujnyab, thiab zoo li nws lub cev. Tus Tswv hlub peb thiab saib peb muaj nqis rau nws. Ib qhov uas qhia hais tias peb muaj nqis rau Vajtswv yog los ntawm qhov uas Nws tso Tswv Yexus tuag txhiv peb. Lub meejmom tau los ua Vajtswv menyuam, Vajtswv haivneeg qhia hais tias peb muaj nqis thiab tseemceeb rau Vajtswv. Timthawj Yauhas hais tias: “Nej sim ua tib zoo xav saib Leej Txiv hlub peb npaum li cas! Nws hlub peb kawg nkaus li, nws thiaj hu peb ua nws cov menyuam, thiab qhov tseeb peb yeej yog Vajtswv cov menyuam tiag. Twb yog vim li ntawd cov neeg uas tsis paub Vajtswv thiaj tsis paub peb” (1Yauhas 3:1). Paub tau qhov no peb yuav paub ua tau lub neej kom phim rau Vajtswv txojkev hlub uas nws muab pub rau peb thiab yuav ua kom lwm tus paub Vajtswv los ntawm peb lub neej.
Peb ua neej zoo li cas kom phim txoj koob hmoov uas Vajtswv pub rau peb?
Thov Vajtswv:
Tswv Yexus, ua tsaug uas koj tau los tuag saum tus ntoo khaublig txhiv kom nyuam yaus tau los ua neeg dawbhuv ntawm Vajtswv xubntiag! Nyuam yaus paub hais tias koj hlub nyuam yaus thiab nyuam yaus muaj nqis heev rau Vajtswv Vaj Peb Leeg. Thov koj pab kom nyuam yaus txawj npaj txojkev ntseeg, lub neej kheej kom zoo txhua hnub tos hnub uas tau mus pom koj. Ameeg.
Email: kawmvajluskubtxhuahnub@gmail.com
Kênh Youtube BHKTHN:
