Klei Aê Diê Blŭ: Klei Kbiă 28:6-14, 22-28
Êlan kliăng: “Hŏng klei mbruă brei diñu ngă ao êphôt hŏng mah, čhiăm piơk, hrah jŭ, hrah huč, leh anăn kbuă điêt aruăt.” (Klei Kbiă 28:6).
Klei êmuh ksiêm mĭn: Si Klei Aê Diê Blŭ lač kơ Êphôt? Ya ngă Aê Diê brei mă dua klŏ boh tâo ônik, leh anăn ktur tinăn anăn phung anak êkei Y‑Israel? Hruê anei, hlei jing Khua Ngă Yang Prŏng kơ phung drei? Ya klei djŏ kơ drei mơ̆ng klei hriăm anei?
Êphôt jing sa kdrêč hlăm čhiăm ao phung khua ngă yang prŏng. Klei Aê Diê Blŭ amâo lač klă ôh gru rup êphôt ƀiădah mơ̆ng mnơ̆ng mkra mjing jing hŏng čhiăm piơk, hrah jŭ, hrah huč, leh anăn kbuă điêt aruăt; mâo dua pŏk čhiăm guôm mra bi mtuôp mbĭt hŏng dua knhal, ti mnal đah da mâo klei săng đai điêt aruăt hŏng mah doh, ƀôñ msĕ si klei kuĭ, drei dưi thâo êphôt msĕ si ao dlông amâo mâo kngan mâo pă blah mnal čiăng hơô hruôm leh anăn mjing tur kơ čhiăm ao doh jăk dưi hơô.
Aê Diê mtă mă dua klŏ boh tâo ônik, leh anăn ktur tinăn anăn phung anak êkei Y‑Israel; năm anăn phung diñu ti sa klŏ boh tâo anei, năm anăn phung mkăn ti sa klŏ boh tâo tal dua, tui si pruê̆ amĭ kkiêng kơ diñu. Brei ktur anăn phung anak êkei Y‑Israel ti dua klŏ boh tâo msĕ si mnuih thâo mbruă ktur ti mnơ̆ng kđăm. Leh anăn dưm dua klŏ boh tâo anăn ti čhiăm guôm mra ao êphôt (êlan 9-12). Aê Diê ăt mtă kwang digơ̆ hŏng griŏ mah. Leh anăn dua klei săng đai điêt aruăt hŏng mah doh ƀôñ msĕ si klei kuĭ; leh anăn bi đuôm ti griŏ (êlan 13-14). Snăn dua hdrăng kơiêng hŏng boh tâo ônik leh anăn klei săng đai điêt aruăt hŏng mah doh kă tĭng kơ gŭ ti čhiăm guôm mra ao êphôt msĕ si kdrăp čŭt hơô phung lĭng kahan.
Bruă ktur anăn pluh dua anăn phung anak êkei Israel bŏ hŏng klei mbruă ti dlông boh tâo leh anăn dưi ktur ti mnơ̆ng kđăm hŏng mah bi mklă kơ Aê Diê khăp snăk leh anăn mpŭ kơ phung anak Y‑Yakôp, bi ala kơ 12 djuê ana Israel. Aê Diê jing kpă ênô, Ñu brei čih anăn djŏ tui si hruê amĭ kkiêng, amâo kah mbha hlei pô jing anak H’Lia, H’Račel amâodah dua čô pô kăp đru. Aê Diê mtă kơ Y‑Arôn brei băk anăn diñu ti dua nah mra ñu jing klei bi hdơr ti anăp Yêhôwa. Jăk mơak snăk kơ pluh dua khua djuê ana Israel; anăn diñu dưi ktur ti dlông boh tâo yuôm čiăng bi hdơr ti anăp Aê Diê!
Hruê anei, Khua Yang Yêsu jing Khua Ngă Yang Prŏng mơ̆ng grăp čô đaŏ kơ Ñu; hlei pô đaŏ kơ Khua Yang Yêsu dưi jing anak Aê Diê, Pô tŭ klei djiê kơ anak mnuih ti kyâo bi kal (Y‑Yôhan 1:12). Khua Yang Yêsu ăt ba anăn grăp čô drei wah lač ti anăp Aê Diê (I Y‑Yôhan 2:1-2). Jing phung đaŏ kơ Aê Diê, drei ăt ktưn hưn mâo Anăn Ñu, dưi pia jing phung đaŏ kơ Krist. Klei yuôm bhăn jing brei drei hdĭp năng hŏng klei pap Aê Diê brei kơ pô.
Drei hdĭp năng leh mơ̆ hŏng klei Aê Diê mpŭ?
Wah lač: Ơ Khua Yang Yêsu jing Khua Ngă Yang Prŏng kơ kâo. Bi mni lač jăk kơ Ih khăp kơ kâo tơl săn asei čiăng bi mtlaih kâo. Bi mni lač jăk kơ Ih hruê mlam wah lač kơ kâo ti anăp Aê Diê jing Ama. Akâo kơ Yang Mngăt Jăk đru kâo hdĭp năng hŏng bruă jing anak Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 22:1-28
Kênh Youtube BHKTHN:
