Klei Aê Diê Blŭ: Klei Kbiă 25:17-22
Êlan kliăng: “Tinăn kâo srăng bi tuôm hŏng ih, leh anăn ti dlông kđhăp klei pap brei ti plah wah rup čêrubim dôk ti dlông hip klei bi mguôp anăn, kâo srăng blŭ kơ ih jih jang klei kâo srăng mtă kơ phung ƀuôn sang Israel.” (Klei Kbiă 25:22).
Klei êmuh ksiêm mĭn: Kđhăp klei pap brei dưi ngă hŏng ya hdră? Ya klei drei bi mĭn mơ̆ng klei čêrubim mblang siap guôm Hip klei bi mguôp? Ya ngă drei pia kđhăp klei pap amâo pia ôh kđhăp Hip klei bi mguôp? Ya klei hriăm drei mâo klei Aê Diê Pap hlăm klei hriăm hruê anei?
Hlăk êjai ƀô̆ mơ̆ng Hip klei bi mguôp dưi mkra mjing hŏng kyâo sitim luôm hŏng mah snăn kđhăp klei pap dưi mkra hŏng mah doh. Kđhăp klei pap leh anăn Hip klei bi mguôp mâo sa hnơ̆ng prŏng, awan ñu dua heh mkrah, găn ñu sa heh mkrah. Ti dlông kđhăp klei pap brei mâo dua rup čêrubim hŏng mah; brei ih ngă diñu hŏng mah arăng tia. Čêrubim jing dĭng buăl jăk mâo klei myang dưi lač jing răng mgang mnơ̆ng myang hlăm Hip klei bi mguôp, mâo asei mlei msĕ si êmông gu amâodah êmô, ƀô̆ mta mnuih leh anăn mâo dua siap dlông. Dua čêrubim mblang siap diñu phă dlông, guôm hŏng siap diñu kđhăp klei pap brei, leh anăn ƀô̆ diñu bi anăp mbĭt (êlan 17-20). Rup dua čêrubim mblang siam guôm kđhăp klei pap brei brei drei ƀuh klei yuôm bhăn, kdrưh kơang mơ̆ng Anôk Aê Diê dôk leh anăn guôm hgăm Kđhăp klei pap brei amâo brei hlei pô thâo ƀuh ôh.
Arăng amâo pia ôh kđhăp klei pap brei jing kđhăp Hip bi mklă kyua klei ba yua kđhăp anei amâo djŏ knŏng bi hgăm Hip klei bi mguôp ôh. Kđhăp klei pap brei lŏ jing Anôk Aê Diê dôk čiăng lač hŏng Y-Môis klei bhiăn kơ phung ƀuôn sang Aê Diê ruah (êlan 22). Kyua anăn, đa đa anôk hlăm Klei Aê Diê Blŭ Klei Bi Mguôp Hđăp čih Aê Diê dôk hlăm phung čêrubim (Klei Mmuñ Hđăp 80:1; I Y–Samuel 4:4; II Y–Samuel 6:2; Y-Êsai 37:16). Grăp thŭn, phung ngă yang mŭt hlăm anôk doh jăk hlăm hruê pap brei klei soh. Ñu srăng mdjiê mnơ̆ng myơr čuh leh anăn hƀrah êrah ti kđhăp klei pap brei plah wah dua rup čêrubim čiăng pap brei klei soh kơ phung ƀuôn sang. Aê Diê dôk ti krah dua čêrubim, tơdah ƀuh ƀuôn sang Aê Diê amâo hluê ngă djŏ klei ƀuăn hŏng Aê Diê snăn Ñu srăng bi knhal phung ƀuôn sang. Ƀiădah leh ƀuh êrah pap brei klei soh mơ̆ng mnơ̆ng myơr dưi tuh, ñu srăng brei klei pap brei kơ phung ƀuôn sang Ñu. Êrah mnơ̆ng myơr jing klei bi hmô djiê hrô klei soh mơ̆ng Khua Yang Yêsu kơ anak mnuih hlăm djăp gưl ênuk. Kyua anăn, kđhăp klei pap brei jing kđhăp pap brei klei soh (atonement cover) amâodah klei pap brei (mercy seat).
Kđhăp klei pap brei brei dưm ti dlông Hip klei bi mguôp. Leh anăn sa blư̆ dơ̆ng, Klei Aê Diê Blŭ mñă kơ drei klei bhiăn amâodah Pluh Mta Klei Bhiăn Aê Diê brei dưi dưm hlăm Hip klei bi mguôp (êlan 21). Hip klei bi mguôp leh anăn kđhăp klei pap brei dưi dưm hlăm anôk doh jăk hlăm Sang čhiăm, klei bi knăl Anôk Aê Diê. Aê Diê ruah ti krah phung ƀuôn sang Ñu (êlan 22).
Drei thâo hdơr mơh klei pap Aê Diê brei leh klei soh drei hlăm klei Khua Yang Yêsu djiê hrô leh kơ drei, leh anăn drei ƀuăn hdĭp năng hŏng klei Aê Diê pap mơ̆?
Ơ Khua Yang, kâo bi mni kơ Ih kyua Klei ih pap brei; Ih amâo bi kmhal kâo hlăm klei blŭ, bruă ngă leh anăn kli mĭn soh jhat kâo ƀiădah pap brei klei soh kâo hlăm Êrah Êđai Biăp Ih. Akâo kơ Ih đru kâo hdĭp thâo hdơr knga, bi guh kơang Anăn Ih leh anăn đru hưn klei khăp bi mtlaih mơ̆ng Ih kơ phung ka mă tŭ.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 16
Kênh Youtube BHKTHN:
