Klei Aê Diê Blŭ: I Kôrantô 13:13.
Ară anei tlâo klei ăt dôk: “klei đăo, klei čang hmăng, leh anăn klei khăp; ƀiădah hlăm tlâo klei anei klei khăp jing prŏng hĭn”
Klei êmuh ksiêm mĭn: Khua ƀĭng kna Y-Pôl bi hriăm ară anei ya tlâo mta klei yuôm bhăn adôk? Ya ngă klei yuôm bhăn hĭn hlăm tlâo mta anăn jing klei khăp? Ya klei drei dôk mđing tui duah ară anei leh anăn hlăm êdei anăp?
Khua ƀĭng kna Y-Pôl mphŭn čih hră I Kôrantô kdrêč 13 hŏng tlâo Klei Aê Diê Blŭ lač kơ hnơ̆ng yuôm bhăn mơ̆ng klei khăp. Hlăm êlan 8, ñu mñă klă klei khăp dôk lă lar amâo rai luč. Leh anăn khua ƀĭng kna Y-Pôl klah čŭn hlăm êlan knhal tuč kdrêč 13 mâo tlâo mta klei yuôm bhăn jing klei đaŏ, klei čang hmăng leh anăn klei khăp, ƀiădah klei khăp jing prŏng hĭn kơ klei đaŏ leh anăn klei čang hmăng.
Drei thâo leh Sang Aê Diê Kôrantô hlăk anăn dôk mâo klei bi kah mbha êpul kyua lu phung đaŏ ktưn hưn kơ phung hlăm êpul pô leh anăn bi lông kơ dŭm klei brei mơ̆ng Yang Mngăt Jăk. Khua Ƀĭng kna Y-Pôl dôk bi hriăm diñu kơ klei khăp leh anăn ñu brei thâo ară anei hlăm dŭm hruê dôk hdĭp ti lăn ala, knŏng mâo tlâo mta klei yuôm bhăn jing klei đaŏ, klei čang hmăng leh anăn klei khăp, ƀiădah sĭt “klei jăk truh” snăn knŏng dôk sa klei yuôm bhăn hĭn jing klei khăp. Ya ngă? Kyua Aê Diê khăp leh kơ anak mnuih mơ̆ng ênuk tal êlâo (Y-Yôhan 3:16), leh anăn “klei Aê Diê khăp tuh leh hlăm ai tiê drei hŏng Yang Mngăt Jăk Pô Aê Diê brei leh kơ drei” (Rôm 5:5). Khua Yang Yêsu ăt brei leh kơ drei klei bhiăn mrâo čiăng hdĭp bi khăp tui si Khua Yang khăp leh kơ drei (Y-Yôhan 13:34).
Hĭn mơh, ară anei “kyuadah drei êbat hŏng klei đăo, amâo djŏ ôh hŏng klei ƀuh” (II Kôrantô 5:7). Ƀiădah hlăm ƀuôn jăk snăn drei srăng ƀuh ti anăp, anăn klei đaŏ srăng lui anôk kơ ală ƀuh. Ară anei drei dôk hdĭp hlăm klei čang hmăng dôk guôn hruê Khua Yang Yêsu lŏ hriê ƀiădah sĭt hruê anăn truh, drei amâo lŏ čang hmăng ôh kyua dưi dôk mbĭt hŏng Khua Yang nanao (I Têsalônik 4:17). Leh anăn snăn, knŏng dôk klei khăp jing lă lar, amâo rai tuč, kyua “Aê Diê jing klei khăp” (I Y-Yôhan 4:8b). Anăn jing mta phŭn Y-Pôl lač “Ară anei tlâo klei ăt dôk: klei đăo, klei čang hmăng, leh anăn klei khăp; ƀiădah hlăm tlâo klei anei klei khăp jing prŏng hĭn” (I Kôrantô 13: 13).
Ăt msĕ si phung đaŏ ti Sang Aê Diê Kôrantô hruê êlâo, drei lŏ dlăng wĭt pô, sui hŏng anei hlăm klei tui hluê Khua Yang drei mđing mơ̆ hlăm tlâo mta klei yuôm bhăn jing klei đaŏ, klei čang hmăng leh anăn klei khăp, amâo dah drei knŏng tui duah klei srăng rai tuč hlăm klei hdĭp anei? Tơdah drei bi lông kơ bruă knuă, klei thâo… snăn ênưih luč jih klei yuôm bhăn hĭn leh anăn mâo ênoh dôk lă lar jing klei bi khăp hlăm gŏ sang klei đaŏ.
Ya klei drei čiăng bi mlih leh hriăm hlăm Klei Aê Diê Blŭ kdrêč 13?
Ơ Khua Yang! Kâo bi mni lač jăk kơ Ih kyua Ih brei leh kơ kâo klei đaŏ hlăm Khua Yang čiăng dưi mâo klei hdĭp bŏ hŏng klei čang hmăng hlăm Khua Yang leh anăn dưi thâo klei khăp lă lar mơ̆ng Ih brei leh kơ kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
