Pajlug 3:31-32
Nqe cim:
“Tsis txhob khib tej neeg uas ua phem lossis tsis txhob xyaum ua li lawv ua” (Pajlug 3:31)
Lus nug xav:
– Hauv txhua lub tsamthawj, Vajntxwv Xalumoos ntuas nws cov menyuam yam dabtsi?
– Xalumoos hais txog cov vimchiv twg?
– Zaj kawm hnub no qhia rau peb yam dabtsi txog kev ua neej nrog lwm tus?
Cov ntseeg Tswv Yexus tseeb niaj hnub ntshaw kom muaj ib npoj ntseeg koom siab, sib hlub, thiab kaj siab. Tiamsis, qhov tseeb tiag yeej tsis muaj ib npoj neeg twg uas yuav tsis muaj teebmeem li, qhov tseem ceeb yog peb yuav tabmeeg thiab daws cov teebmeem ntawd li cas xwb. Ib qhov txaus ntshai uas tej zaum ntau leej yuav poob rau yog qhov uas pheej ua pauj, ua phem pauj phem thaum ntsib raug tej uas luag ua rau yus mob siab. Vajntxwv Xalumoos yog ib tug uas twb ntsib raug, nws paub qhov ntawd, yog li nws ntuas nws cov menyuam kom txav deb txojkev ua phem hauv txhua lub tsamthawj: “Tsis txhob khib tej neeg uas ua phem”. “Khib” muaj lub ntsiab hais tias xav tau. Muaj cov neeg uas xav tau ua ib yam li “tej neeg uas ua phem” vim lawv ntsia pom tej yam uas lawv ua tau los ntawm txojkev phem, thiab tej zaum kuj yog vim pom tej teeb meem uas cov neeg ua raws li Vajtswv Txojlus qhia ntsib.
Ua ntej ntawd, nqe 30 qhia tias tsis txhob nrog leejtwg sib cav sib ceg uas nws “tsis ua ib qhov phem rau koj”. Tiamsis yog lawv ua yam dabtsi phem rau yus ces Timthawj Paulus qhia tias: “Tej lus uas kuv thov Vajtswv pab nej, kuv thov kom nej ib tug txawj hlub ib tug heev zuj zus, kom nej paub tseeb thiab totaub txhua yam huv tibsi.” (Filipis 1:9). Cov lus qhia no ua rau peb pom txojkev hlub mus rau ob seem: Kev hlub “ib tug txawj hlub ib tug heev zuj zus”, muaj lub ntsiab hais tias tsis muaj nrim; thiab kev hlub qhia tshwm “kom nej paub tseeb thiab totaub txhua yam huv tibsi”, muaj lub ntsiab hais tias muaj nrim. Lo lus no, peb totaub hais tias muaj tej lub tsam thawj tus hwm Vajtswv yuav tsum tau teb rau tej uas cov neeg phem ua, tiamsis txawm yog hais los kuj tsis cem lawv ib yam li lawv ua, “tsis txhob xyaum ua li lawv ua” (nqe 31).
Nimno, peb tabtom ua neej nyob rau lub ntiajteb uas cov neeg muaj zog yog cov neeg uas yeej, yog li ntawd, cia kom yeej, yuav tsum muaj zog, txawm tias muaj zog los ntawm kev ua phem los yog, tiamsis kev ua phem yeej tsis yog lub tswvyim txhim tsa tau ib lub zej zog uas zoo. Qhov vimchiv uas Vajtswv cov menyuam tsis txhob xaiv cov neeg phem txojkev “rau qhov tus Tswv ntxub tej neeg uas ua phem ua qias”. “Tej neeg ua phem ua qias” kuj muaj lub ntsiab tias yog neeg nruj tsiv, thiab Vajtswv ntxub lawv heev. Peb pheej tau hnov hais tias: Vajtswv ntxub kev txhaum tiamsis hlub tus neeg txhaum. Txawm li ntawd los, yuav tau xyuam xim txog lo lus hais no, vim thaum ib tug neeg pheej muaj lub siab tawv thiab ua neej tsau rawv rau txojkev ua phem ua qias ces Vajtswv yuav “ntxub” lawv. Timthawj Paulus qhia tias: “Vajtswv tus uas nyob saum ntuj ceebtsheej chim rau tej kev txhaum thiab kev phem uas neeg ua, rau qhov lawv tej kev phem ntawd ua rau neeg tsis paub qhov tseeb lawm” (Loos 1:18). Tus neeg uas caum txojkev phem, kev txhaum quas nws txojkev sib raug zoo nrog Vajtswv, kuj tsis muaj kev ua tau phoojtwg nrog Nws (Phau Ntawv Nkauj 24:3-4).
Thov Vajtswv,
Vajtswv, thov Koj tswj nyuam yaus lub siab thiab txojkev xav raws li Koj Txojlus kom nyuam yaus nrog tau Koj mus ncaj ncees, tsis ua phem pauj phem, tiamsis hauv txhua lub tsamthawj qhia tshwm tej kev zoo ntawm Vajtswv tus menyuam. Nyuam yaus tuav Tswv Yexus Khetos lub npe thov, Amees.
Peb pheej ua li cas rau “cov neeg phem?”
Nyeem Vajluskub hauv peb lub xyoo: Yauj 39
Kênh Youtube BHKTHN:
