Klei Aê Diê Blŭ: II Y-Pêtrôs 1:5-9
Êlan kliăng: “Kyuadah tơdah diih mâo jih klei anăn leh anăn jing êbeh dlai, klei anăn amâo brei ôh diih jing hơăi mang amâodah amâo mâo boh hlăm klei thâo kral Khua Yang drei Yêsu Krist” (II Y-Pêtrôs 1:8)
Klei êmuh ksiêm mĭn: Čiăng hdĭp mâo boh kơ Khua Yang leh anăn amâo dôk mang ôh, brei phung đăo kơ Krist gĭr hriăm čiăng bi mđĭ kơ ya klei? Tơdah kƀah knuih jăk anei si ngă? Ya klei brei drei gĭr thiăm čiăng kơ drei amâo hdĭp amâo mâo boh tŭ ôh ƀiădah mâo boh tŭ kơ Khua Yang?
Kyuadah Aê Diê brei leh kơ drei “klei Ñu ƀuăn yuôm leh anăn prŏng snăk” leh anăn “jih jang klei djŏ kơ klei hdĭp leh anăn kơ klei thâo mpŭ kơ Aê Diê” (êlan 3-4), kyuanăn Khua ƀĭng kna Y-Pêtrôs mtrŭt phung đăo gĭr čiăng dưi đĭ hriê kơ prŏng hĭn, čiăng kơ “tơdah diih mâo jih klei anăn leh anăn jing êbeh dlai, klei anăn amâo brei ôh diih jing hơăi mang amâodah amâo mâo boh hlăm klei thâo kral Khua Yang drei Yêsu Krist” (êlan 8).
Êlâo hĭn, brei phung đăo thâo kral leh Khua Yang “hŏng jih ai tiê brei diih thiăm klei jăk kơ klei diih đăo” (êlan 5a). Sa čô mâo klei đăo srăng hŏng jih ai tiê tui hriăm klei jăk mơ̆ng Khua Yang Yêsu jing Pô jăk. Leh anăn ai tiê jăk msĕ si Khua Yang knŏng mâo mơ̆ng klei thâo săng êlam kơ Klei Aê Diê Blŭ, kyuanăn brei thiăm “klei thâo săng kơ klei jăk…” (êlan 5b). Ƀiădah klei thâo săng kơ Klei Aê Diê Blŭ anăn brei mâo klei djŏ hnơ̆ng, čiăng đăm mâo klei ƀhur êwa amâo sĭt ôh atăt truh kơ klei mgao hlăm klei hdĭp myang, jing hĕ phung pô mtô soh amâodah jing mgao ngă klei pliă plia. Tui tluôn klei djŏ hnơ̆ng jing ai tiê gĭr čiăng gĭr hung kơ klei bi lông êran bŏ hŏng klei dleh dlan hlăm klei hdĭp myang. Leh anăn thiăm bĕ klei thâo mpŭ kơ Aê Diê, jing klei Aê Diê mprăp leh kơ phung thâo kral Ñu (II Y-Pêtrôs 1:3). Ƀiădah jing sa klei kƀah snăk tơdah amâo mâo ôh klei khăp êbeh dlai hdơ̆ng ayŏng adei hlăm klei đăo yuôm bhăn. Mơ̆ng anăn, atăt truh kơ hnơ̆ng dlông hĭn hlăm klei khăp hdơ̆ng ayŏng adei jing klei khăp, jhŏng săn asei kyua klei tŭ dưn kơ pô mkăn, kyuadah “klei khăp bi mguôp jih jang mnơ̆ng hlăm klei jăk klă” (Kôlôs 3:14).
Amâo djŏ Khua ƀĭng kna Y-Pêtrôs čiăng lač brei phung đăo hriăm sa mta, sa mta tơl jih jang knuih jăk yap leh anăn jing kluôm ênŭm ôh. Ƀiădah jih jang knuih jăk anăn brei hriăm mđrăm mbĭt čiăng kơ “tơdah diih mâo jih klei anăn leh anăn jing êbeh dlai, klei anăn amâo brei ôh diih jing hơăi mang amâodah amâo mâo boh hlăm klei thâo kral Khua Yang drei Yêsu Krist” (êlan 8).
Phung đăo kơ Krist srăng hriăm Klei Aê Diê Blŭ čiăng dưi đĭ hriê kơ prŏng nanao hlăm klei hdĭp myang, leh anăn mâo klei hdĭp bŏ hŏng boh mơ̆ng Yang Mngăt Jăk (Galati 5:22-23). Aê Diê jao bruă klam kơ drei jing hriăm leh anăn đĭ hriê kơ prŏng. Tơdah drei pĭt ală kơ klei sĭt nik, jing ktiêl hlăm klei hdĭp myang, atăt truh kơ klei “kƀah klei anăn jing mnuih bum ală, amâo dưi ƀuh kbưi ôh, leh anăn wơr bĭt hĕ Aê Diê bi doh ñu leh mơ̆ng klei soh êlâo” (êlan 9). Leh anăn msĕ snăn yơh, ênưih kơ drei lŏ wĭt kơ klei soh hđăp.
Klei hriăm anei mñă kơ drei ti knuih jăk drei dôk kƀah? Si ngă drei srăng hriăm?
Wah lač: Ơ Khua Yang, kâo hơêč hmưi kơ Ih jing Khua klei hdĭp kâo. Ih brei leh kơ kâo jih jang klei jăk jĭn. Đru kâo hŏng jih ai tiê hriăm čiăng bi mđĭ jih jang knuih jăk Krist, thiăm kơ kâo mmông găl čiăng kâo amâo hdĭp amâo mâo boh tŭ ôh ƀiădah mâo boh kơ Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Rut 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
