Pajlug 21:21
Nqe cim:
“Ua siab dawb siab zoo thiab ua ncaj ua ncees, koj thiaj muaj sia nyob ntev; thiab luag thiaj yuav hwm thiab nyiam koj.” (Pajlug 21:21)
Nyeem ntxiv Phau Txhais Tshiab HMOWSV:
“Tus uas raws ncuj nciav txojkev ncaj ncees thiab txojkev hlub yuav tau txojsia thiab koob meej thiab yuav vam meej.”
Lus nug xav:
– Nqe Pajlug no qhia txog lo lus foom koob hmoov twg rau tus neeg muaj tswvyim?
– Lo lus foom koob hmoov ntawd muaj nqis li cas?
– Nqe Pajlug no pab peb zeem paub txojcai ua neej li cas?
Vajntxwv Xalumoos hais txog ib lo lus cogtseg koob hmoov uas muaj peb yam tseemceeb, uas yog “tau txojsia thiab koob meej thiab yuav vam meej”. Vajluskub qhia hais tias tej no yog tej yam uas yog Vajtswv tug, thiab yog yam uas Nws pub rau cov uas hwm Nws (Ntawv Nkauj 3:1-3; 27:6; 75:4-10; Pajlug 8:18). Vim li ntawd, peb tsis muaj peevxwm nrhiav tau txojsia, koob meej thiab kev vammeej, tiamsis tej no yog koob hmoov uas Vajtswv pub rau tus uas “raws ncuj nciav txojkev ncaj ncees thiab txojkev hlub” (HMOWSV).
Lo lus “raws ncuj nciav” txhais hais tias caum, nrhiav, siv los hais txog kev rau siab, mob siab, ua siab ntev thiab tsis tso tseg txojkev ua lossis nrhiav ib yam dabtsi. Nyob hauv nqe no, yam uas peb yuav tsum nrhiav yog “ua siab dawb siab zoo thiab ua ncaj ua ncees”. “Ua ncaj ua ncees” yog hais txog kev ncaj ncees sab ntsujplig tabmeeg Vajtswv thiab kev ncaj ncees sab nqaijtawv tabmeeg tibneeg. Tshuav “ua siab dawb siab zoo” yog kev ua zoo, ua siab dawb rau lwm tus. Yog li ntawd, tus uas niaj hnub nrhiav ua siab dawb siab zoo yog tus uas muaj tswvyim nqis peev rau txojkev hlub, yog neeg ua lubneej muaj kev sib hlub. Tus uas “ua siab dawb siab zoo thiab ua ncaj ua ncees” yuav tau koob hmoov vim ntawd yog Vajtswv lo lus samhwm thiab haum Nws siab, ib yam li tus Cevlus Mikhas tau hais tias: “…Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo.” (Mikhas 6:8).
Muaj ib yam tshwjxeeb heev, yog tus neeg muaj tswvyim nrhiav “ua siab dawb siab zoo thiab ua ncaj ua ncees”, txhais hais tias rau siab ua neej raws li Vajtswv Txojlus qhia thiab ua neej muaj kev hlub, ces nws yuav tau txais “txojsia, koob meej thiab yuav vam meej.” Hais raws lwm seem, tus uas nrhiav “kev ncaj ncees” yuav tau txais “kev ncaj ncees,” thiab tsis tas li ntawd xwb, nws tseem yuav tau txais “txojsia… thiab kev vammeej”. Tus uas nrhiav “ua siab dawb siab zoo thiab ua ncaj ua ncees” yuav nrhiav tau ntau tshaj qhov uas nws cia siab. Tus ntawd nqis peev rau Vajtswv Txoj Kevcai, nrhiav kev ncaj ncees; qhov uas txais tau rov qab yog lawv nrhiav tau kev ncaj ncees, meejmom thiab txojsia. Tsis muaj dabtsi xav tsis thoob thaum rau siab nrhiav kev ncaj ncees thiab kev ua zoo coj tau tej nqi zog loj kawg li no los, rau qhov tus uas nrhiav tej yam muaj nqis raws li Vajtswv lub siab nyiam yuav tau txais nqi zog raws li Vajtswv lo lus coglus hais tias: “Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33).
Niaj hnub nimno, Tswv Yexus twb pub kev ncaj ncees, txojsia thiab lub meejmom rau peb dhau ntawm txojkev cawmdim lawm. Peb yuav tsum ua pauj rau txoj koob hmoov loj kawg ntawd los ntawm ib lub neej muaj kev ncaj ncees thiab muaj kev hlub.
Thov Vajtswv,
Tus Tswv, ua Koj tsaug uas Koj twb pub txhua yam koob hmoov zoo rau nyuam yaus dhau ntawm Tswv Yexus Khetos. Thov Koj pab kom nyuam yaus niaj hnub ua neej muaj kev hlub thiab kev ncaj ncees rau cov neeg nyob ibncig, kom dhau ntawm tej ntawd qhia tshwm Koj lub tshwjchim uas ci ntsa iab. Nyuam yaus tuav Tswv Yexus Khetos lub npe thov, Amees.
Peb twb txais Vajtswv tej lus cogtseg koob hmoov no hauv peb lub neej li cas lawm?
Nyeem Vajluskub hauv peb lub xyoos: Ntawv Nkauj 119:57-120
Kênh Youtube BHKTHN:
