Mikhas 6:1-8
Nqe cim:
“…xyaum ua neeg zoo nrhiav kev ncaj ncees” (Yaxayas 1:17a)
Lus nug xav:
– Vajtswv ceebtoom haivneeg Yixalayees txog dabtsi, thiab lawv teb li cas?
– Tus cev Vajtswv lus Mikhas qhia tias Vajtswv xav kom lawv ua dabtsi?
– Cov ntseeg yuav tsum rau siab nrhiav thiab ua raws txojkev ncaj ncees li cas?
Vajtswv ceebtoom Nws haivneeg kom nco txog Nws txojkev ua siab ncaj thiab qhia rau lawv paub tias kev ua raws txojkev ncaj ncees tseeb yog li cas. Qhov xubthawj, Vajtswv rov hais txog tej haujlwm uas Nws tau ua rau haivneeg Yixalayees: Nws cawm lawv dim hauv tebchaws Iziv txojkev ua qhev, coj lawv hla dhau ntau yam kev phom sij, thiab tivthaiv tas nrho lawv txoj kev taug (nqe 3-5). Ua neej ncaj ncees yeej ibtxwm pib ntawm kev nco txog Vajtswv txojkev hlub tshua thiab Nws txojkev cawm dim. Thaum Vajtswv haivneeg hnov Vajtswv tej lus ceebtoom, lawv txawm nug hais tias: “Thaum kuv mus pehawm tus TSWV uas yog Vajtswv tus uas kav saum qaum ntuj, kuv yuav coj dabtsi mus rau nws?” (nqe 6). Lawv xav hais tias tej zaum lawv yuav coj tej khoom fij zoo tshajplaws tuaj tua hlawv theej lawv tej kev txhaum (nqe 6-7). Tiamsis Vajtswv tsis nrhiav tej kab ke lossis tej khoom fij ntxiv. Nws nrhiav cov neeg uas muaj lub siab mloog lus thiab muaj lub neej hloov dua tshiab raws li Nws lub siab nyiam. Tus Cevlus Mikhas teb meej raws li Vajtswv hais hauv nqe 8 hais tias: “tus TSWV twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo.” Yam xubthawj uas Vajtswv xav kom Nws haivneeg ua yog ua lub siab ncaj lossis ua raws txojkev ncaj ncees.
Ua neej ncaj ncees txhais hais tias xaiv ua yam yog txawm yog thaum tsis muaj leejtwg pom. Ntawd yog ncaj ncees hauv tes haujlwm, ncaj ncees hauv tej kev txiav txim siab, ncaj ncees hauv kev hais lus, thiab ua ncaj hauv txhua txojkev sib raug zoo. Kev ncaj ncees tsis yog tsuas muaj nyob hauv nomtswv lossis tsev hais plaub xwb, tiamsis tseem tshwm muaj ntawm peb tus kheej lub neej. Ntawd yog qhov uas peb ua zoo rau cov neeg tsis muaj zog, ncaj ncees siv lub hwjchim uas peb muaj, thiab yam peb ua thaum tsis muaj neeg pom peb. Nrhiav txojkev ncaj ncees kuj txhais hais tias kho peb lub neej kom phim Vajtswv tus qauv, tsis yog raws li peb tus kheej lub siab nyiam. Vajluskub niaj zaus qhuab ntuas hais tias Vajtswv saib rau tibneeg lub siab (I Xamuyees 16:7). Nws saib peb lub homphiaj hauv txhua yam uas peb ua. Yog li ntawd, kev ua neej ncaj ncees yuav tsum muaj kev txo hwjchim, kam kho qhov txhaum, tig siab lees txim, thiab kam hloov pauv thaum tau Vajtswv Txojlus qhia pom peb tej kev txhaum.
Nrhiav kev ncaj ncees yog yam uas txhua tus ntseeg yuav tsum ua, thiab kuj yog yam Vajtswv xav kom Nws haivneeg ua. Thaum peb ua neej ncaj ncees, peb tivthaiv lwm tus kom tsis raug kev tsimtxom, txhawb nqa Vajtswv lub npe, thiab qhia tshwm Nws tus yamntxwv uas ncaj ncees thiab zoo kawg nkaus. Ua neej nyob hauv lub ntiajteb uas tsis muaj kev ncaj ncees thiab tibneeg tsis quavntsej qhov tseeb, Vajtswv tseem nqua hu kom peb ua neej ncaj ncees. Thaum peb ruaj siab xaiv ua yam yog, txo hwjchim thiab ua siab ntev, ces yog peb ua rau Vajtswv tau koob meej, Nws yog tus uas qhia peb ua tej yam zoo.
Thov Vajtswv,
Tus Tswv, thov Koj pab kom nyuam yaus niaj hnub rau siab nrhiav txojkev ncaj ncees hauv nyuam yaus lub neej. Thov pab nyuam yaus ua tau raws li Koj lub siab nyiam, kom nyuam yaus lub neej niaj hnub qhuas thiab txhawb nqa Koj. Nyuam yaus tuav Tswv Yexus Khetos lub npe thov, Amees.
Yam dabtsi hauv peb lub neej twb hloov raws li Vajtswv lub siab nyiam lawm?
Nyeem Vajluskub hauv peb lub xyoos: Malakaus 13
Kênh Youtube BHKTHN:
