Chivkeeb 10:1-4, 6-7, 21, 32
Nqe cim:
“Tagnrho cov neeg uas hais los no puavleej yog Nau-es cov xeebntxwv, ib tiam dhau rau ib tiam raws li lawv tej haivneeg. Tom qab uas dej nyab ntiajteb thiaj muaj ntau haivneeg tawm mus nyob puv lub ntiajteb no, lawv yog Nau-es cov tub tej xeebntxwv” (Chivkeeb 10:32)
Lus nug xav:
– Hauv kev sau keebkwm cajces, ua li cas Nimelaus tau hais ntau dua lwm tus lub npe?
– Peb kawm tau yam dabtsi hauv zaj no thiab keebkwm cajces ntsigtxog txhua haivneeg nyob ntiajteb uas yog Nau-es xeebntxwv?
Peb cheemtsum siv sijhawm los nyeem kom tas Chivkeeb tshooj 10, hais txog keebkwm Nau-es cajces. Muaj tagnrho yog 70 lub npe, thiab los ntawm lawv thiaj muaj txhua haivneeg nyob hauv lub ntiajteb no. Hauv cov npe ntau ntau no, Nimelaus tau hais meej dua (nqe 8-12). Nimelaus “yog thawj tug neeg uas muaj hwjchim kav tebchaws nyob hauv ntiajteb no” (nqe 8). Nimelaus tsa tau cov tebchaws, Npanpees (Npanpiloos). Nimelaus txhim tsa lub nroog Nineves, yog ib lub nroog muaj koob nto npe thiab vammeej, tom qab no dhau los ua cov neeg Axilias lub tuamceeb nroog. Tom qab no, Axilias thiab Npanpiloos yog ob lub tebchaws muaj zog tawmtsam tus Tswv haivneeg thiab ua ntau yam kev phem kev qias. Los ntawm qhov hais meej txog Nimelaus, tus uas sawv cev ib cajces txawj ntse tiamsis kuj yog neeg khav txiv, ntu Vajluskub no hais paub cov neeg uas nyob tom qab dej nyab ntiajteb. Nyob qhov ntawd muaj ib cajces txawj ntse tiamsis tsis ua neeg hwm Vajtswv.
Dhau ntawm Adas thiab Evas, peb pom muaj ob cajces. Muaj ib cajces ntseeg Vajtswv, tus sawv cev yog Anpees thiab tom qab no yog Xej. Lwm cajces ces yog cov neeg tsis ntseeg uas yog Ka-ees sawv cev. Saib zoo yam li ob cajces no yuav tu noob nrog dej nyab ntiajteb. Tiamsis tsis yog li ntawd! Tseem muaj ntxiv. Nimelaus yog Has xeebntxwv, Has yog tus tub uas ua saib tsis tau Nau-es. Txhua haivneeg nyob hauv ntiajteb no puavleej yog Nau-es xeebntxwv, tiamsis muaj cov cajces ntseeg Vajtswv, kuj muaj cov cajces tawmtsam Vajtswv.
Nimelaus tsis yog lub npe tshwjxeeb. Nqe 21 hais txog ib tug neeg uas yog Nau-es lwm tus tub npe hu ua Xees. Qhov zoo yog Vajtswv Txojlus hais txog lub npe tis rau cajces: “nws yog yawgkoob ntawm cov neeg Henplais”. Cov neeg Henplais hu raws lub npe no, thiab Anplahas tus uas yog cov neeg Henplais yawgkoob, yog xeebntxwv ntawm Xees. Yog li ntawd, nyob kiag hauv daim keebkwm cajces no, peb pom tib neeg txojkev ua txhaum, tiamsis kuj pom Vajtswv ua raws li Nws hais thiab txojkev hlub. Los ntawm Xees cajces, Vajtswv xaiv Anplahas los ua ib haivneeg rau Nws. Los ntawm haivneeg no, Yexus Khetos los hauv ntiajteb, ua tes haujlwm cawm neeg ntiajteb. Tseeb tiag, txhua tus neeg uas hais txog hauv daim keebkwm cajces no puavleej yog ib feem nyob hauv zaj lus uas Vajtswv hais.
Thov Vajtswv,
Vajtswv, ua Koj tsaug vim Koj yog Vajtswv rau txhua haivneeg. Txawm yog tibneeg yuav tawmtsam Koj, los Koj twb npaj muaj txojkev cawm dim thaum chivkeeb lawm. Thov Koj pub nyuam yaus muaj feem koom nrog Koj txojkev npaj uas yog qhia Koj txojkev cawm dim mus rau txhua tus neeg. Nyuam yaus tuav Tswv Yexus Khetos lub npe thov, Amees.
Peb puas pom Vajtswv txojkev cawm dim zoo kawg nkaus pub rau txhua haivneeg, nyob hauv muaj peb thiab?
Nyeem Vajluskub hauv peb lub xyoo: Nehemis 8
Kênh Youtube BHKTHN:
