Kalatias 6:1
Nqe cim:
“Cov kwvtij, yog nej pom ib tug ua txhaum nej cov uas muab siab rau ntseeg, nej yuav tsum ua tib zoo ntuas tus ntawd kom nws rov qab los ua zoo. Tiamsis thaum nej yuav mus ntuas nws, nej yuav tsum ceevfaj, nyob tsam nej yuam kev nrog nws mus ua txhaum thiab.” (Kalatias 6:1)
Phau Txhais Tshiab HMOWSV
“Cov kwvtij, yog nej pom leejtwg ua txhaum yam twg nej cov uas nyob sab ntsuj plig cia li ua lub siab mos siab muag pab tus ntawd kom rov xyaum dua. Thiab nej yuav ceev faj txog nej tus kheej ntshai tsam ces nej raug ntxias ua txhaum thiab.”
Lus nug xav:
– Tus neeg “muaj Vaj Ntsujplig” yuav tsum ceevfaj txog yam dabtsi thaum pom luag lwm tus txojkev txhaum? Vim li cas?
– Qhov kev zeem paub no coj peb mus rau tus cwjpwm licas thaum mus pab tus neeg uas tsis yog txhob txwm ua txhaum?
Nyob hauv Kalatias 6:1 qhia tshwm tsawg kawg muaj 6 yam mojyam zoo ntawm Vaj Ntsujplig cov txiv, ntawd yog kev hlub, xyivfab, siab tus (lossis thev taus), khuvleej, ua zoo thiab mos muag,… nyob hauv cov ntseeg lub neej thaum pom yus cov kwvtij tej kev txhaum. Yog tsis muaj Vaj Ntsujplig kev ua haujlwm rau thaum tej mojyam no pib muaj thiab loj hlob zuj zus, ces tsis muaj leejtwg muaj cuabkav ua tau raws li nqe Vajluskub saum toj no qhia.
Lo lus “pab” yog ib lo lus siv hauv yibxeeb qhia txog kev qhwv lossis rov tib tej daim txha uas tawg ntsoog lawm, lo lus no hais txog kev kho thiab ua kom rov zoo li qub. Ntawd yog Vaj Ntsujplig tes haujlwm muab tus ntseeg hloov ua neeg dawbhuv dhau ntawm lwm tus ntseeg. Cov ntseeg tsis mus “pab” tus neeg ua txhaum nrog lub siab tsis muaj kev hlub, tabsis yuav tsum muaj kev hlub thiaj pom tau tej teebmeem uas kev txhaum coj los raug tus neeg ntawd, thiab kuj yuav tsum muaj kev hlub kom paub txog qhov kev sib txuas ntawm tej tes taw hauv Yexus Khetos Lub Cev. Tsis tas li ntawd xwb, kuj yuav tsum muaj lub siab ntshaw pab tus neeg txhaum kom rov los nrog tus Tswv thiab cov ntseeg sib raug zoo hauv txojkev hlub ntawm Pawg Ntseeg. Yuav kom ua tau tes haujlwm pab cov neeg yuamkev no, cov ntseeg yuav tsum muaj lub siab mos muag, siab zoo, siab ntev, thiab txawj ua; los ntawm qhov ntawd, thiaj li coj tau tus neeg uas tsis yog txhob txwm ua txhaum los cuag Vajtswv thiab Nws Txojlus, pab lawv zeem paub txog tus Tswv txojkev dawbhuv thiab txoj koob hmoov hlub kom lawv paub txo hwjchim thiab hloov siab tig rov los.
Timthawj Paulus ntuas cov ntseeg kom yuav tsum muaj Vaj Ntsujplig tabsis nws tseem ceebtoom lawv yuav tsum ceevfaj tus kheej nyob tsam “raug ntxias ua txhaum thiab”. Yog peb tsis ceevfaj tuav peb tus kheej hauv Vaj Ntsujplig thiab Vajtswv Txojlus, ces peb kuj yuav ua txhaum ib yam nkaus li ntawd thiab. Qhov kev zeem paub no coj peb mus rau kev txo hwjchim tabmeeg tus Tswv thiab tabmeeg cov kwvtij kiag rau lub sijhawm uas peb tabtom mus “pab” kho tus ntawd. Yuav tsum nco ntsoov tias peb yooj yim raug ntxias kom khav txiv sab ntsujplig, saib tus kheej dawbhuv dua tus neeg ua txhaum, ib yam li tus Falixais thov Vajtswv tias: “Vajtswv, kuv ua koj tsaug, kuv zoo tsis thooj li lwm tus, kuv tsis ua neeg siab hlob, kuv yog neeg ncaj ncees, kuv tsis zes luag tej pojniam thiab kuv tsis zoo li tus sau se ntawd” (Lukas 18:11). Hom neeg li ntawd, lawv tsis muaj lub siab hlub tus neeg ua txhaum, tiamsis lawv luag plig thaum pom luag poob rau hauv kev txhaum. Tsimnyog yuav tsum tu siab rau kev txhaum, tiamsis lawv ho zoo siab thaum pom tias tus kheej zoo dua luag lwm tus ib qib. Qee zaum tsis yog peb xav ua li ntawd, tiamsis txojkev txhaum zais nkaum tob heev ua rau peb nyuaj feeb meej, thiab kev khav txiv muaj zog heev dua li tej uas peb xav txog.
Thov Vajtswv,
Tus Tswv e! Thov pub rau nyuam yaus muaj ib lub siab hlub tshua thaum pom cov kwvtij ua txhaum, thiab thov pub rau nyuam yaus muaj lub siab txo hwjchim kom niaj hnub vam khom Koj. Nyuam yaus tuav Tswv Yexus Khetos lub npe thov, Amees.
Nyeem Vajluskub hauv peb lub xyoos: Mikhas 2
Kênh Youtube BHKTHN:
