Klei Aê Diê Blŭ: Galati 6:1; Y-Yôhan 8:1-11.
Êlan kliăng:“Ơ phung ayŏng adei, diih phung mâo klei hdĭp myang, tơdah diih ƀuh sa čô lĕ hlăm klei soh, hŏng klei êdu êun mkra brei ñu wĭt ngă klei djŏ. Răng bĕ kơ diih pô msĕ mơh, huĭdah mâo klei mplư truh kơ diih” (Galati 6:1)
Klei êmuh ksiêm mĭn: Si knuih pô mâo klei hdĭp myang srăng mâo hŏng pô lĕ hlăm klei soh? Tơdah mnuih tui hlue klei bhiăn si knuih ñu srăng mâo? Ya jing klei kñăm čiăng mơ̆ng dua mta mnuih anei? Drei dlăng kơ drei msĕ hŏng hlei pô?
Sa hlăm lu mta klei ba hriê klei bi dlưh lĕ klei hdĭp myang, leh anăn bi rai Phung Sang Aê Diê jing klei bi mĭn mdê hĭn kơ Phung Sang Aê Diê. Lu phung đăo lui klei bi mguôp hlăm Krist leh anăn hroh trŭn klei hdĭp myang tơdah rông ba klei bi mĭn kơ Phung Sang Aê Diê ti lăn ala jing sa êpul êya klă kluôm; hĭn kơ tŭ ư boh klei sĭt Phung Sang Aê Diê ti lăn ala, jing sa êpul êya phung mnuih soh mă tŭ klei pap mơ̆ng Aê Diê leh anăn dôk hdĭp hrăm mbĭt hlăm klei pap anăn, wăt tơdah êjai dôk tlă anăp hŏng klei soh wê mdê mdê hdơ̆ng pô .
Phung Sang Aê Diê ăt adôk nanao lu klei kƀah leh anăn klei soh čhuai, phung đăo wăt tơdah si hnơ̆ng klei hdĭp myang jing dưn, ăt mâo mơh đa đa blư̆ ngă soh (I Y-Yôhan 1:8, 10). Ƀiădah lĕ, hlăk phung tui hlue klei bhiăn tui duah, kđêč kđil klei soh kăp čiăng phat kđi, bi dlưh, bi hêñ mưč mač kơ pô ngă soh, amâodah lĕ hlăm klei soh, leh anăn hŏng klei truh anăn diñu bi mđĭ mni kơ diñu pô, êjai anăn bi pô “mâo Yang Mngăt Jăk”, phung đăo mâo klei hdĭp myang, phung êbat hlăm Yang Mngăt Jăk, bŏ hŏng Yang Mngăt Jăk leh anăn bi êdah boh mơ̆ng Yang Mngăt Jăk (Galati 5:22), wăt tơdah digơ̆ ăt ƀuh mơh klei soh pô mkăn, ƀiădah digơ̆ jao kơ klei khăp leh anăn klei thâo mĭn Yang Mngăt Jăk yua digơ̆ čiăng dưi đru pô anăn kmhal kơ klei soh leh anăn lŏ dưi bi mrâo hlăm klei pap Khua Yang.
Tơdah phung Pharisi leh anăn phung khua čih hră mâo mă sa čô mniê knhông, diñu ba mniê anăn nao bi tuôm hŏng Khua Yang Yêsu mtam, brei bhir boh tâo tui si klei bhiăn Y-Môis, boh nik diñu čiăng lông dlăng leh anăn čiăng dưi kčŭt kơ Khua Yang (Y-Yôhan 8:1-11). Dưi lač snei, klei diñu bi hgăm hŏng bruă ngă dlăng msĕ si djŏ snăk hŏng klei bhiăn leh anăn djŏ snăk hŏng klei đăo anei, jing ai tiê klei mĭn mgao, bŏ hŏng mnêč, amâo mâo klei khăp ôh. Tinei, Khua Yang Yêsu, Pô bŏ hŏng Yang Mngăt Jăk (Y-Luk 3: 22, 4:1), brei ƀuh wăt tơdah Khua Yang ăt thâo kơ mniê anei ngă soh (Y-Yôhan 8:11) ƀiădah klei Khua Yang mđing mĭn amâo djŏ phat kđi leh anăn lui hĕ mniê anei ôh, ƀiădah đru čiăng kơ gơ̆ amâo lŏ ngă soh ôh. Anei ăt jing knuih brei phung tui hlue Khua Yang Yêsu brei mâo hŏng phung lĕ hlăm klei soh (êlan 1). Khua pô mtô R. C. Sproul lač leh snei: “Mta klei yuôm hĭn jing brei mâo sa hnơ̆ng čuăn ti dlông hlăm klei dôk hdĭp hlăm Phung Sang Aê Diê, ƀiădah klei anei atăt truh lu klei dleh dlan hlăm boh klei sĭt, tơdah drei amâo răng ôh dưm ênoh yuôm klei khăp klei pap ti dlông. Akâo kơ Khua Yang đăm brei drei yua hnơ̆ng čuăn doh jăk jing klei djŏ yơh, ƀiădah ngă bi luč hĕ klei khăp klei pap hlăm Phung Sang Aê Diê”.
Si ngă drei khăng mkra mnuih lĕ hlăm klei soh tui si klei bhiăn amâodah hlăm klei pap leh anăn klei khăp?
Wah lač: Ơ Khua Yang, brei kâo dôk hdĭp leh anăn êbat hlăm klei mngač leh anăn klei doh jăk Yang Mngăt Jăk nanao, leh anăn dôk hdĭp nanao hŏng mnuih mkăn hlăm klei pap yuôm bhăn kâo mă tŭ leh mơ̆ng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mika 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
