Klei Aê Diê Blŭ: Klei Bi Hriêng 27:1-2
Êlan kliăng: “Đăm bi mni kơ hruê mgi ôh, kyuadah ih amâo thâo ôh ya srăng truh grăp hruê” (Klei Bi Hriêng 27:1)
Klei êmuh ksiêm mĭn: Ya ngă đăm bi mni ôh kơ hruê mgi? Si Mtao Salômôn bi hriăm anak kơ klei luă gŭ? Si drei ngă čiăng brei klei guh kơang kơ Aê Diê amâo djŏ duah klei bi mni kơ drei pô ôh?
Klei hdĭp amâo mâo dôk sa hnơ̆ng, kyuanăn đăm hưn ktưn leh anăn duah bi mni mă kơ pô ôh. Mtao Salômôn mtă brei drei răng đăm đăo đei ôh kơ hruê ti anăp srăng jing jăk nanao. Mnuih mâo kdriêl leh anăn amâo dưi thâo êlâo ôh ya klei srăng truh kơ klei hdĭp pô. Boh blŭ “hruê mgi” hlăm (êlan 1) jing sa boh blŭ čiăng lač kơ klei čang hmăng hlăm hruê ti anăp msĕ si klei jing hlăm bruă, klei mdrŏng sah, klei đĭ hlăm bruă, klei dưi hlăm klei bi blah, lu klei mkăn đa đa…, ƀiădah đăm bi mni ôh kơ jih jang klei djăl êgao tuč anăn. Tơdah klei hdĭp ti anăp giăm hĭn leh anăn ênưih ƀuh hĭn kăn dôk hlăm klei mnuih dưi gai rei leh anăn amâo mâo thâo klă ôh si jing, snăn ƀai êjai hĭn klei hdĭp dôk kbưi ti anăp amâo dưi thâo klă ôh. Khua pô mtô William McKane čih snei, “Amâo dưi ôh sa čô mnuih thâo mĭn blŭ amâodah mkra hdră msĕ si ñu pô mâo klei dưi čuăn mă kluôm dhuôm klei hdĭp ñu ti anăp.” Êgao hĭn kơnăn, mnuih thâo mĭn đăo kơ Aê Diê srăng mkra hdră kơ klei hdĭp tui si klei kpă ênô, leh anăn bi rai hĕ hdră mnuih amâo bi djŏ ôh hŏng klei kiă kriê kpă ênô Ñu. Bi mni kơ hruê mgi bi êdah klei mgao leh anăn klei knang kơ pô hrô kơ knang kơ Aê Diê. Mnuih thâo mĭn sĭt jing mnuih hdĭp hŏng klei đăo grăp hruê, leh anăn thâo jih jang bruă dôk hlăm klei Aê Diê kiă kriê sơăi.
Ti djiêô anăn, Mtao Salômôn kñăm kơ klei luă gŭ jing klei čiăng blŭ hĭn kơ klei bi mni mă kơ pô: “Brei pô mkăn bi mni kơ ih, leh anăn amâo djŏ ƀăng êgei ih pô ôh” (êlan 2). Tơdah hưn ktưn kơ bruă pô dưi ngă, ênưih snăk anak lĕ hlăm klei mgao leh anăn klei blŭ mčhưr. Hdơr bĕ, Aê Diê bi êmut kơ mnuih mgao (Klei Mmuñ Hđăp 5:5). Leh anăn phung ƀuôn sang, găp djuê riêng gah amâo khăp ôh leh anăn ăt bi êmut mơh kơ mnuih khăng bi mni mă kơ ñu pô. Tơdah anak bi mni kơ anak pô êgao hnơ̆ng, anak čŏng čiăng bi luč mă klei hing ang jăk anak pô kyuadah jih jang mnuih srăng ƀuh anak amâo hdĭp djŏ msĕ si klei anak blŭ ôh. Êgao hĭn kơnăn, klei bi mđĭ pô hŏng klei bi mni mă kơ pô srăng bi mđĭ anak jing kdlưn hĭn kơ klei dưi pô, klei anăn srăng bi hêñ anak leh anăn amâo mâo klei tŭ jing ôh hlăm klei hdĭp. Jăk hĭn brei pô mkăn bi mni kơ anak kyuadah digơ̆ ƀuh jih knuih jăk hlăm anak, amâo djŏ ƀăng êgei anak pô ôh brei arăng mpŭ kơ anak.
Aê Diê mpŭ snăk kơ ai tiê luă gŭ. Brei phung anak ƀuôn sang Khua Yang hdĭp hŏng klei luă gŭ, đăo kơ Klei Ñu Blŭ. Jih jang hdră kơ klei hdĭp, mkra bĕ hdră hŏng klei thâo mĭn, ƀiădah jih jang klei jao nanao kơ Aê Diê. Mă bruă bĕ kơ Khua Yang hŏng klei sĭt suôr, đăm duah klei čiăng kơ arăng ƀuh ôh, kăn duah klei bi mni mơ̆ng mnuih mkăn rei. Aê Diê jing Pô djă klei hdĭp leh anăn Ñu jing Pô mưn kơ hlei pô luă gŭ.
Si drei blŭ klei blŭ sĭt, bŏ hŏng klei khăp leh anăn mâo klei bi mđĭ ai?
Wah lač: Ơ Khua Yang, ksiêm bĕ ai tiê kâo. Brei bĕ kơ kâo mâo klei thâo mĭn čiăng kơ kâo thâo kral klei mplư, leh anăn kiă kriê kâo čiăng kơ kâo amâo lĕ hlăm klei mplư mơ̆ng klei blŭ jăk bŏ hŏng klei mnêč ôh. Brei klei kâo blŭ leh anăn klei hdĭp kâo bi êdah nanao klei luă gŭ leh anăn klei knang kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
