Klei Aê Diê Blŭ: I Y-Pêtrôs 4:12-14
Êlan kliăng: Ơ phung kâo khăp, tơdah diih dôk ti krah pui klei lông dlăng, đăm bi kngăr ôh msĕ si sa klei mdê truh kơ diih” (I Y-Pêtrôs 4:12).
Klei êmuh ksiêm mĭn: Jing phung đăo kơ Yêsu Krist, kơ ya klei amâo brei drei bi kngăr ôh? Ya ngă? Si srăng ngă čiăng dưi dôk hơ̆k mơak hlăm klei lông dlăng? Si drei srăng prăp êmiêt čiăng kơ drei amâo bi kngăr ôh tơdah tuôm hŏng klei lông dlăng?
Khua ƀĭng kna Y-Pêtrôs jing pô amâo tuôm tŭ ôh kơ klei Yang Krist srăng djiê ti kyâo bi kal (Y-Mathiơ 16:21-22). Ƀiădah leh Khua Yang Yêsu kbiă lŏ hdĭp, ñu mâo klei bi mlih kluôm dhuôm. Ară anei ñu jhŏng mtô kơ phung đăo kơ Yêsu Krist jing phung Yuđa wăt phung tue dôk hdĭp tar ƀar anôk hlăm čar Asi snei: “Ơ phung kâo khăp, tơdah diih dôk ti krah pui klei lông dlăng, đăm bi kngăr ôh msĕ si sa klei mdê truh kơ diih” (êlan 12). Phung đăo kơ Yêsu Krist amâo dưi weh đuĕ ôh mơ̆ng klei arăng ngă jhat, kyuanăn đăm bi kngăr ôh tơdah tuôm hŏng pui klei lông dlăng, leh anăn đăm dlăng kơ klei anăn jing msĕ si klei mdê ôh. Kyuadah anăn jing êlan Khua Yang čiăng kơ drei dưi tŭ klei knap mñai mbĭt hŏng Ñu (êlan 13). Amâo djŏ knŏng amâo bi kngăr ôh, ƀiădah brei phung đăo kơ Krist “dôk hơ̆k mơak” msĕ mơh, čiăng lač hơ̆k mơak amâo dưi mblang ôh!
Ƀiădah čiăng dưi dôk hơ̆k mơak hlăm klei lông dlăng, brei phung đăo kơ Krist thâo hĕ: Tal sa, klei tŭ klei knap mñai jing êlan hdră pioh bi hriăm mjuăt klei đăo, “čiăng kơ diih dưi dôk hơ̆k mơak msĕ mơh ti hruê klei guh kơang Ñu srăng bi êdah” (êlan 13). Tal dua, tŭ klei knap mñai kyua Khua Yang jing klei jăk mơak, Khua Yang Yêsu tuôm lač leh hlăm klei mtô ti dlông čư̆ snei, “Jăk mơak yơh diih tơdah arăng dlao wač, ngă jhat, leh anăn mčeh lu mta klei jhat kyua Kâo” (Y-Mathiơ 5:11). Tal tlâo, Khua Yang amâo lui phung đăo kơ Ñu tŭ klei knap mñai hjăn păn ôh tơdah tơdah dôk sĭt suôr hŏng Ñu, ƀiădah mâo Yang Mngăt Jăk dôk mbĭt leh anăn bi ktang, “kyuadah Mngăt Myang guh kơang, jing Mngăt Myang Aê Diê dôk ti diih” (êlan 14).
Khua Yang amâo tuôm ƀuăn kơ phung tui hlue Ñu jih jang klei srăng jing ênưih leh anăn êđăp ênang ôh. Ƀiădah Ñu lač, “Ơ phung kâo khăp, tơdah diih dôk ti krah pui klei lông dlăng, đăm bi kngăr ôh msĕ si sa klei mdê truh kơ diih” (êlan 12). Kyuanăn, brei phung đăo kơ Krist prăp êmiêt nanao kơ klei srăng tuôm hŏng kpur pui klei lông dlăng hŏng ai tiê amâo mâo klei lŏ bi kngăr ôh, ƀiădah dlăng kơ klei anăn jing mmông găl čiăng kơ klei đăo kơ Khua Yang mâo klei bi hriăm mjuăt leh anăn đĭ hriê kơ prŏng. Hơ̆k mơak bĕ kyuadah yuôm bhăn snăk drei dưi tŭ klei knap mñai kyua Khua Yang, mơ̆ng klei anăn, drei dưi thâo ƀuh si ngă Khua Yang tŭ leh klei knap mñai kyua drei. Klei tŭ klei knap mñai kyua Anăn Khua Yang srăng mâo klei jăk jĭn msĕ si Ñu ƀuăn leh, khă bi drei ăt dôk kjăp amâo hngah kơ klei đăo ôh. Năng ai phung găp djuê, leh anăn phung mah jiăng srăng ñĕ đuĕ kơ drei tơdah drei tŭ klei lông dlăng, klei knap mñai. Ƀiădah Yang Mngăt Jăk ăt êbat mbĭt hŏng drei hlăm jih jang klei rŭng răng bŏ hŏng klei hyưt huĭ anăn. Đăm bi kngăr ôh ƀiădah ăt čhuang êbat bĕ hŏng klei hơĭt ktuê êlan êbat myang.
Si ngă drei bi kngăr mơ̆ tơdah dôk ti krah kpur pui klei lông dlăng?
Wah lač: Ơ Khua Yang, Ama Pô bŏ hŏng klei khăp! Brei klei Ih blŭ hruê anei kđăm čih pioh êlam hlăm ai tiê kâo, čiăng kơ kâo mâo klei prăp êmiêt nanao kơ klei srăng tŭ djăp mta klei lông dlăng, akâo Ama kiă kriê leh anăn bi ktang kâo čiăng kơ kâo dưi găn, leh anăn jing ktang kjăp hĭn hlăm klei đăo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Galati 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
