Mathais 24:1-3
Nqe cim:
“Thaum Yexus nyob pem lub Roob Txiv Ntoo Roj, nws cov thwjtim los cuag nws twjywm thiab nug hais tias, “Thov koj qhia rau peb saib thaum twg mam li muaj tej no, thiab yuav muaj yam twg qhia rau peb paub hais tias, twb txog lub sijhawm uas koj yuav los thiab lub ntiajteb yuav kawg” (Mathais 24:3)
Lus nug xav:
– Tswv Yexus hais dabtsi txog lub nroog Yeluxalees?
– Cov thwjtim lolus nug qhia pom lawv xav paub txog yam dabtsi?
– Peb paub txog qhov uas Tswv Yexus yuav rov qab los thiab hnub lub ntiajteb no kawg li cas?
Tswv Yexus tabtom qhuab qhia thiab txiav txim hnyav heev tshwjxeeb rau cov xibhwb qhia Vajtswv txoj kevcai hauv cov Yixalayees. Thaum lawv tawm hauv tuamtsev Yeluxalees mus, cov thwjtim taw tes kom Tswv Yexus saib tej tsev uas nyob ibncig lub Tuamtsev yog yam uas txaus siab heev, vim nov yog yam uas ua zoo tshaj plaws hauv lub ntiajteb no rau lub sijhawm thaum ntawd. Tiamsis Tswv Yexus tau hais txog ua ntej lub tuamtsev yuav raug puastsuaj: “nej twb pom tej tsev no lawm? tiamsis kuv qhia tseeb rau nej hais tias, tej pobzeb uas muab sib dhos ua ke ntawd txhua lub yuav pluam nyias nyob nyias tas huv tibsi” (nqe 2). Tswv Yexus tej lus hais ua rau cov thwjtim tsis totaub loj heev, vim lub tuamtsev muab ntau lub pobzeb loj thiab hnyav heev los ua.
Nrog Tswv Yexus mus peb lub xyoos lawm, tiamsis cov thwjtim yeej tseem tsis totaub txog Nws tes haujlwm, vim li ntawd thaum hnov txog tej lus uas hais ua ntej lub tuamtsev yuav raug puastsuaj, ua rau lawv xav tsis thoob, lawv thiaj ua twjywm los nug Tswv Yexus: “Thov koj qhia rau peb saib thaum twg mam li muaj tej no, thiab yuav muaj yam twg qhia rau peb paub hais tias, twb txog lub sijhawm uas koj yuav los thiab lub ntiajteb yuav kawg” (nqe 3). Hauv cov Yixakayees kev ntseeg, mas lawv ntseeg hais tias hnub lub ntiajteb kawg mas yog hnub uas tus Mexiyas tshwm los thiab lawv ntseeg hais tias Nws yuav muab cov Yixalayees cov yeebncuab uas tabtom tswj kav lawv ruav tshem thiab yuav sawv ua vajntxwv kav ibtxhis hauv lub nroog Yeluxalees. Lawv txoj kev tsis totaub qhia pom lawv xav paub txog hnub uas Tswv Yexus rov qab los thiab txhawj txog hnub lub ntiajteb kawg. Dhau qhov ntawd, Tswv Yexus qhia yam uas tseemceeb txog lub sijhawm ntiajteb kawg.
Tus sau phau ntawv Henplais qhia paub, peb tabtom nyob rau ntu sijhawm tiam kawg, “Tiamsis tiam kawg no Vajtswv txib Vajtswv tus Tub los qhia peb. Vajtswv tsa Vajtswv tus Tub ua tus tsim lub ntuj thiab lub ntiajteb. Thaum kawg Vajtswv yuav pub ib puas tsav yam huv tibsi ua tus Tub ntawd tug…” (Henplais 1:2), txhais hais tias yuav tsis muaj ib lub sijhawm twg tom qab lub sijhawm no lawm. Qhov ntawd ntuas peb kom yuav tsum paub npaj txog peb lub neej sab ntsujplig tos Tswv Yexus rov qab los. Peb yuav tsum ceevfaj zov tos Tswv Yexus rov los, vim Nws coglus yuav muab nqi zog rau txhua tus uas nyob tos Nws los: “Thaum tus tswv rov los pom cov tubtxib tseem zov tos, cov tubtxib ntawd yuav tau ntsejmuag!…” (Lukas 12:37). Tus Tswv ceebtoom peb txhua hnub vim Nws xav kom peb tau mus nrog Nws nyob thaum rov qab los: “Nej yuav tsum ceevfaj, tsis txhob cia nej lub siab qaug rau kev noj kev haus, thiab tsis txhob txhawj rau nej lub neej lossis yuav cia hnub ntawd los txog thaum nej tsis ceevfaj. Rau qhov hnub ntawd yuav los khwb nkaus tej neeg sawvdaws thoob plaws lub ntiajteb no ib yam li rooj yej” (Lu-ca 21:34-35). Thov Vajtswv pab kom peb paub txhawj txog thiab npaj lub neej sab ntsujplig kom haum Vajtswv siab cia kom npaj txhij tos Nws rov qab los.
Thov Vajtswv,
Vajtswv, thov pab kom nyuam yaus paub txhawj txog thiab npaj lub neej sab ntsujplig kom haum Koj siab cia kom npaj txhij tos Koj rov qab los, kom nyuam yaus tau mus nrog Koj nyob saum Ntuj Ceebtsheej qhov chaw kaj siab. Nyuam yaus tuav Tswv Yexus Khetos lub npe thov, Amees.
Peb puas tau npaj txhij yog Tswv Yexus los hnub no?
Nyeem Vajluskub hauv peb lub xyoos: Exekees 25
Kênh Youtube BHKTHN:
