Yaxayas 5:20-21
Nqe cim:
“Nej cov uas pom hais tias nej ntse thiab nej cov uas xav hauv nej lub siab hais tias nej ntse yuav raug kev puastsuaj lauj!” (Yaxayas 5:21)
Lus nug xav:
– Vim licas tus Tswv ho foom tej lus phem hnyav hnyav rau haivneeg Yixalayees?
– Dhau ntawm qhov ntawd, Vajtswv haivneeg pom tias tus Tswv hlub lawv li cas?
– Peb siv zaj kawm no rau niaj hnub nimno li cas?
Tus Cevlus Yaxayas tau Vajtswv txib mus hais lus ceebtoom haivneeg Yixalayees vim lawv txojkev ntxeev siab thiab kev ua neej phem. Yaxayas tshooj 5 tau sau tseg tej lus foom phem “yuav raug kev puastsuaj” rau Vajtswv haivneeg uas yog cov neeg tsis mloog raws li tus Tswv txoj kevcai, lawv tsis feebmeej qhov zoo qhov phem, qhov tseeb qhov cuav. Nyob hauv nqe 20 thiab 21, tau sau tseg tej lus foom phem rau cov neeg uas ua neej hauv kev phem thiab kev khavtheeb.
Vajtswv yog Tus uas ncaj ncees, Nws tsis txaus siab rau tej yam uas tawmtsam Nws tus mojyam dawbhuv. Vajtswv haivneeg twb tau kawm paub txog tus Tswv txoj kevcai hauv Kaum Nqe Kevcai tseeb meej thiab txhij txhua lawm. Tus uas ncaj ncees yuav tsis pub qhov tseeb raug hloov pauv mus, Nws yuav tsis “muab tej lus phem ntxeev hais ua lus zoo thiab muab tej lus zoo ntxeev hais ua lus phem”, lossis “muab lus qabzib ntxeev ua lus iab lus daw thiab muab lus iab lus daw ntxeev hais ua lus qab zib” (nqe 20). Vajtswv haivneeg tabtom dag lawv tus kheej, lawv xav hauv siab hais tias lawv “ntse”, lawv rov ua tus txiav txim rau lawv thiab niaj hnub xav hais tias tus kheej ua yog (nqe 21). Ua neej li ntawd yog ib qho khavtheeb kawg nkaus rau qhov Vajtswv haivneeg twb tsis quavntsej Vajtswv Txojlus tiamsis ho muab yus tus kheej ua qhov tseemceeb. Ntawd yog lub vimchiv ua rau Tus uas ncaj ncees txib tus Cevlus Yaxayas mus tshajtawm tej lus foom phem “puastsuaj” rau lawv! Txawm li ntawd los, dhau ntawm tej lus hnyav hnyav ntawd, haivneeg Yixalayees kuj pom tau hais tias Vajtswv hlub lawv npaum li cas! Yog tias tus Tswv nplawm tamsim ntawd, ces tsis muaj ib leeg tug twg yuav muaj sia nyob, tiamsis Nws txib Nws tus Cevlus tuaj nqua hu, khob pab kom Nws haivneeg pom qhov yuamkev hauv lubneej thiab hloov siab tig rov los ua raws tus Tswv txoj kevcai. Ua Vajtswv tsaug rau qhov Nws yog tus uas ncaj ncees tiamsis Nws kuj yog tus Vajtswv uas muaj lub siab hlub tshua.
Niaj hnub nimno, peb tabtom nyob rau tiam uas muaj tej tshuab thiab hlwb hlau (công nghệ thông tin) vammeej heev, nyob ibncig peb tsis tsawg tej xov xwm cuav, muaj taug ua rau Vajtswv cov menyuam yoojyim raug qaug mus raws lub ntiajteb, raug plag qhov muag vim tej lus qab thaj nplaig qab ntsev lossis tej kev ua neej yuamkev raws li tibneeg txoj kev xav uas muab zais hauv lub tsho tiam tshiab, phim caij nyoog… ua rau peb tsis quavntsej tus Tswv txoj kevcai hauv Vajluskub. Peb yuav tsum nco ntsoov hais tias Tus uas ncaj ncees yuav tsis zam tej kev ua neej yuamkev ntawd, Nws tej lus ceebtoom pab peb tig rov los ua neej nrog tus Tswv tej kevcai, peb thiaj yuav ua tau ntsev las neeg ntiajteb thiab ua teeb ci rau ntiajteb pom kev. Thov tus Tswv pab peb tuav rawv Nws Txojlus thiab ua neej raws li Vajluskub thiaj yuav qhia tau tus Tswv lub npe rau sawvdaws pom.
Thov Vajtswv,
Tus Tswv, thov ua tsaug vim Koj tau pub Koj Txojlus los ua txojcai rau nyuam yaus lubneej. Thov pub nyuam yaus niaj hnub nyob ze Koj Txojlus, txo hwjchim ua neej raws li Koj Txojlus qhia kom coob leej pom Koj dhau ntawm nyuam yaus lubneej. Nyuam yaus tuav Yexus Khetos lub npe thov, Amees.
Peb yuav tsum ua dabtsi thiaj tsis raug ntxias qaug mus ua neej yuamkev li neeg ntiajteb?
Nyeem Vajluskub hauv peb lub xyoos: Exekees 8
Kênh Youtube BHKTHN:
