I Petus 4:1-2
Nqe cim:
“Yexus Khetos twb raug kev tsimtxom lawm, yog li ntawd nej yuav tsum xav ib yam li Yexus, nej thiaj li yuav muaj zog…” (I Petus 4:1a)
Lus nug xav:
– Vim licas cov ntseeg yuav tsum tiv kev txomnyem raws li Tswv Yexus Khetos tus qauv?
– Tus uas txaus siab tiv kev txomnyem vim tus Tswv lub npe qhia pom txog yam dabtsi?
– Peb yuav tau dabtsi thaum tiv kev txomnyem raws li Tswv Yexus tus qauv?
Qhov uas ib tug ntseeg Tswv Yexus qhia tshwm nws tus cwjpwm li cas thaum ntsib tej kev tsis ncaj ncees, kev txomnyem, lossis kev sim siab raug nws, yuav qhia tau tias nws thiab Yexus Khetos txojkev sib raug zoo nyob qib twg. Timthawj Petus hais meej hais tias, tus neeg uas raws tus Tswv qab yuav tsum txaus siab tiv kev tsimtxom vim tus Tswv lub npe, qhov ntawd yog yam uas yeej yuav tsum raug (I Petus 4:1). Tswv Yexus tiv kev tsimtxom saum tus ntoo khaublig vim yog kev hlub, ces peb kuj yuav tsum vim txojkev hlub paub txaus siab zam txim rau tus neeg uas ua rau yus raug mob. Ntau zaus yus yuav tsum raug poob nyiaj txiag, poob koob npe kom lwm tus tuav tau txojkev ntseeg. Muaj qee zaug yuav tsum tau ua siab ntev, txaus siab raug poob ntau yam kom tuav tau lwm tus tibneeg tus ntsujplig.
Tibneeg lub siab feem ntau, leejtwg kuj xav kom lwm tus saib taus thiab ua haujlwm pub rau yus. Tiamsis tus uas ntseeg Yexus yuav tsum ua raws li tus Tswv tus qauv hais tias: “Yexus Khetos twb raug kev tsimtxom lawm, yog li ntawd nej yuav tsum xav ib yam li Yexus, nej thiaj li yuav muaj zog”. Qhov ntawd txhais hais tias cov ntseeg Tswv Yexus yuav tsum npaj txhij tiv kev tsimtxom uas tsis ncaj ncees, thiab raug quabyuam raws li tus Tswv uas yus tabtom ntseeg tus qauv. Tiamsis qhov uas peb tiv kev txomnyem vim tus Tswv lub npe yuav tsis nkim dawb do. Rau qhov tus neeg uas txaus siab tiv kev tsimtxom, txaus siab raug thuam, txaus siab poob txhua yam vim tus Tswv lub npe, tej ntawd qhia tau hais tias nws tsis raug tswj los ntawm tej kev ntshaw hauv lub ntiajteb no thiab kev khavtheeb. “Rau qhov tus uas raug kev tsimtxom, tus ntawd twb tso nws txojkev txhaum tseg lawm”, thiab yam uas nws tabtom saib ntsoov mus rau, yog qhov koob hmoov uas nyob mus ib txhis nrog Yexus Khetos (nqe 1).
Yexus Khetos twb txo hwjchim nqis los, muab Nws cov ntshav los txhiv tibneeg lub txim lawm, yog li ntawd thaum cov ntseeg txais yuav tus Tswv thiab ua kevcai raus dej, ces yog coglus tseg hais tias yuav tsis ua raws li lub ntiajteb kev ntshaw, tiamsis yuav ua lubneej pub rau tus Tswv, txawm yuav tuag los kuj txaus siab tuag vim tus Tswv. Yuav tsum npaj txhij tiv kev tsimtxom txhua sab hauv lubneej, tsis hais hauv lub cev nqaij daim tawv, tus cwjpwm, tej kev lomzem, nyiaj txiag los yog sab ntsujplig thaum peb tseem nyob hauv lub cev nqaij tawv no (nqe 2).
Nyob hauv lubneej uas raws tus Tswv qab, ntau zaus txawm peb ua qhov zoo los tseem raug lwm tus thuam, raug iab liam, raug cem; ntau zaus tseem raug poob ntau yam kom tuav tau txojkev ntseeg… Tiamsis peb tau kev txhawb zog rau qhov thaum peb lub cev raug mob, lubneej ntsib kev phom sij txog qib tas kev cia siab, ces peb qhov kev tsimtxiaj tau nthuav tawm, thiab peb hais tau li Yauj hais tias: “yog nws sim kuv, nws yuav pom hais tias kuv tsis muaj txhaum” (Yauj 23:10). Thov tus Tswv pab peb txaus siab hlo tiv kev tsimtxom raws li Tswv Yexus tus qauv, ncaj ncees mus txog hnub tuag kom tau txais lub kaus mom yeebkoob uas yog txojsia (Tshwmsim 2:10).
Thov Vajtswv,
Tus Tswv uas nyuam yaus hlub tshua. Ua Koj tsaug vim Tswv Yexus twb tiv kev tsimtxom vim nyuam yaus, thov pub dag zog tshiab, qhib siab, qhib kev totaub kom nyuam yaus pom tias qhov uas tiv kev tsimtxom raws li Koj tus qauv yog ib yam uas yuav tsum tshwm muaj hauv txojkev taug mus rau saum ntuj ceebtsheej. Thov pab nyuam yaus paub txo hwjchim, tsis ua raws sab nqaij tawv kev ntshaw, tiamsis ua lubneej raws li Koj lub siab nyiam, ua kom Koj lub koob npe nrov ncha hauv lub ntiaj teb no. Nyuam yaus tuav Yexus Khetos lub npe thov, Amees.
Peb txaus siab tiv kev tsimtxom raws li Tswv Yexus tus qauv nrog rau lub siab thiab kev xav li cas?
Nyeem Vajluskub hauv peb xyoos: I Kauleethaus 15
Kênh Youtube BHKTHN:
